去邊度慶祝紀念日或生日，通常都會精心細選，環境要靚，食物質素要高……要搵間啱心水嘅餐廳，其實唔難。銅鑼灣有銀座式幢商廈CUBUS，座落喺鬧巿中一個相對安靜而又帶時尚氣質嘅角落，入面有唔少高質食店，當中包括有米芝蓮餐廳，菜式包羅萬有，包括日本菜、西餐﹑中菜﹑以及fusion菜等，任君選擇，而且好多間舖仲設有獨家開放式露台，景觀開揚。
日本菜
廚師發辦 滝壽司
呢間日本菜餐廳，唔止有壽司食，仲主打創意料理同omakase，全部食材都係嚟自日本，不時會按時令而更改菜單。
佢哋嘅Omakase會按時令而轉換菜式，好似而家12月咁，就加入呢幾個月先當造嘅香箱蟹 ，由越前港運到。呢種蟹嘅蟹肉較少，但就好甜。師傅仲要加埋太陽蛋嘅生蛋黃落去製作，令到蟹膏更滑更香濃。
另一道時令菜式係寒天鰤魚刺身，嚟自富山冰劍，仲要專揀15kg以上嘅鰤魚，師傅話愈大條愈好食。鰤魚運到港後，會先經過熟成工序一至兩日，再燒香魚皮，使之帶脆，而且燒過後油脂更香。
地址：銅鑼灣開平道1號Cubus15樓
電話：2782 0010
新舊融合 鮨金‧和食
呢間新餐廳嘅主廚有超過25年日本料理經驗，致力搜羅日本海、陸優質食材，以廚師發辦方式體現日本傳統同新派嘅烹調手法。
就好似迷你懷石料理咁，每道菜式都係選用新鮮嘅時令食材，由刺身、壽司、一品料理，以至到甜品，都可以見到主廚嘅用心。
日本麵豉松露忌廉汁手打稻庭烏冬配大蝦係餐廳另一主打，以手打稻庭烏冬配日本白味噌、鮮忌廉，再用牛油爆香，加入黑松露醬同大蝦，本身嘅香味已經難以抵抗，好似不斷呼喚緊各位吃貨咁。仲要配埋以肉桂粉、味噌慢煮嘅蘋果，果香中和返前者嘅濃香，整道菜嘅味道又多咗層次啦。
地址：銅鑼灣開平道1號Cubus 12樓
電話：3188 9908
日式鐵板燒 鐵板燒雪舟
呢間係香港第一間鐵板燒懷石料理餐廳，菜式大都配合四季時令食材結合鐵板烹調，再以講求精緻細密嘅懷石料理理念表現出嚟。
牛魔王要食牛，梗係食高質牛啦。飛驒牛肉係產於日本岐阜縣飛驒高山嘅黑毛和牛，肉質細膩柔軟、入口即化，脂肪豐富。餐廳選用嘅仲要係A5級別嘅飛驒西冷，肉香可想而知，佢哋仲係香港第一家岐阜縣授權銷售嘅餐廳。
至於鐵板波士頓龍蝦同樣吸引，選用嘅係加拿大新鮮活龍蝦，配上日本露筍，連香草 牛油汁都係由日本主廚親自調製出嚟嘅，呢道龍蝦就更見鮮甜，肉質亦相當爽口彈牙 ，海鮮迷唔好錯過。
地址：銅鑼灣開平道1號Cubus 8樓
電話：2576 0880
米芝蓮食店 玄鮨
連續5年入選為米芝蓮指南推介嘅壽司店，食材每日由日本新鮮空運到港，嚟到必點各款刺身。
豪華嘅特上刺身飯配料有十幾款，如拌飯一流嘅三文魚籽、豐富多樣嘅海鮮， 當然唔少得新鮮甜美嘅北海道海膽啦，加上醋飯拌入香菇漬物，齒頰留香，非常吸引。
燒吞拿魚喺秋冬呢啲涼浸浸嘅天氣嚟講，比較適合食熱食。先將吞拿魚沾點豉油汁，然後再拎去燒，陣陣魚脂香味已經搶先過味蕾，率先傳入鼻中，增加食慾。加上入冬後魚會較肥，魚味更香。
地址：銅鑼灣開平道1號Cubus 7樓
電話：2537 5555
不時不食 鍋処雪舟
由日本懷石料理御廚所開設嘅餐廳，將日本同各地唔同嘅元素融合一齊，並主張以時令食材入饌。
各位蟹迷，都會好期待每年嘅11月至3月，因為全年淨係得呢段時間可以捕獲香箱蟹咋。香箱蟹即係雌性松葉蟹，主要係食佢嘅蟹膏同蟹籽。廚師仲要細心咁將蟹肉拆出再放入蟹殼內，方便進食。蟹肉鮮甜、蟹膏甘香，蟹籽脆口。
嚟自日本北部深海嘅鮟鱇，含有豐富膠質，有保養皮膚青春同美顏嘅功用，深得女生歡心。喺呢個冬天，最啱就用鮟鱇嚟做打邊爐食材，配埋餐廳自家特製嘅味噌湯底，即時變成鮮甜可口嘅養顏鍋。
地址：銅鑼灣開平道1號Cubus 6樓
電話：3188 3350、3188 3351
西餐/ Fusion
高質法國菜 Chez Moi
呢間法國菜餐廳由私房菜做起，一步一步變成今日嘅規模，大廚更曾經喺香港嘅五星級酒店做過。
香煎法國鵝肝配焦糖蘋果係一道幾受歡迎嘅菜式。烹煮鵝肝時輕輕加咗啲白蘭地，就令到整體嘅味道帶點甘甜，另外仲加咗提子砵酒，以中和鵝肝嘅油膩。鵝肝表面煎得好脆口，而入面就刻意仲係生生地，令到口感更滑身。
至於傳統法國菜油浸鴨脾，需要預先以香草、香料等調味料醃過夜，再放落油度滾起，低溫浸煮4個鐘，最後用190度火焗脆層皮。食落鴨味濃郁，仲好juicy，啲肉汁全部留返喺度，就連碟上嘅燒汁亦係以鴨肉同鴨汁自家調製！
地址：銅鑼灣開平道1號Cubus 11樓
電話：2881 1929
多國風味 Town
主力提供多國菜嘅餐廳，大廚喺夏威夷出身，喺日本長大，而家嚟到香港工作，食勻多國美食。餐廳更曾多次獲米芝蓮星級推薦。
夏威夷生牛肉薄片，無論主角牛肉定側邊嘅配角都相當吸引。牛肉好彈口，原來係澳洲和牛嚟。有幾片日本玉子蛋，就加咗sake去煮，好甜身。另外仲有海膽伴碟添呀，每啖都係一種享受。
海膽意粉可以話係餐廳嘅Signature dish，扁幼身嘅意粉全由人手打，加埋香甜嘅北海道海膽同埋鹹香火腿，味覺滿足前，眼睛同鼻子已經率先被餵飽，食落creamy，口感好rich，意粉亦有彈牙之感。
地址：銅鑼灣開平道1號Cubus10樓
電話：2568 8708
中菜/ FUSION
創意中西合璧 CUBUS 28
位於商廈頂樓嘅新派中菜廳，裝修風格具時尚感，望落一啲都唔似中餐，就連menu上嘅嘢食都係傾向中西fusion。
好多人去食中餐都會鍾意叫海蜇，嚟到呢度就更加要叫喇！因為呢度嘅係「手撕法國鵪鶉伴海膽汁海蜇」，賣相精緻，並以嫩滑嘅法國無激素鵪鶉代替雞絲，而海蜇就用日本海膽汁撈勻，啖啖滲有鮮甜味。
鳳眼餃可以話係廣東傳統懷舊點心嘅一種，而家唔係太多地方有得食。三款鳳眼餃各有特色，黑色嘅係用竹碳粉製，綠色嘅用菠菜汁。以新鮮蝦肉、菇類同甘筍等為餡，再喺開口位加上三文魚籽，成隻餃就係一個字，鮮！
地址：銅鑼灣開平道1號Cubus 28樓
電話：2562 3123
養生中菜 格格府御膳
呢幢商廈亦有食中菜嘅地方。格格府御膳主打特色天津同京川滬菜式，從裝修到食物都營造出古代格格尊貴養生嘅飲食文化。
平時食開嘅通常都係鹹味嘅雞，但呢道「柑桔蒸滑雞」兩旁放滿柑桔，原來係因為呢道菜以自家新鮮醃製柑桔製作，取其甜甜酸酸之味，配埋落本地新鮮滑雞度就格外開胃。雞肉亦甚為鮮嫩，同柑桔都幾夾。
大阿哥明蝦球選用印尼虎蝦，蝦球醬汁以京式做法，運用酸甜辣調味，兼且加入各種古酒，例如女兒紅、桂花陳、花雕等炮製，煲出嚟嘅醬汁相當濃郁。粒粒蝦球都大大粒，好飽滿，口感彈牙。溫提一下想食嘅話要一日前訂定呀。
地址：銅鑼灣開平道1號Cubus 5樓
電話：2779 1038