烤魚控都係嗜魚之人，魚嘅質素真係好重要呀。尖沙咀呢間「小魚兒」聽名就知係主打烤魚，但估唔到佢哋嘅魚全部即日喺香港街市買，游水魚夠新鮮健康。呢度有4款魚＋7款湯底揀，今次就揀咗2款湯底試—活火山泡椒剁椒豆花、鳳梨香辣豆花，前者勁辣；後者辣帶酸甜，解渴解膩好啱夏天食。
活火山泡椒剁椒豆花＋江團魚
4款魚中最大熱嘅係江團魚，因為魚肉特別嫩滑吸湯，將辣湯滿滿吸收，咬開就滲出魚汁。活火山湯底除咗有泡椒外，仲特別加咗剁椒，辣味嚟得更勁更快，鍾意辣嘅話一定要試呢個組合。
鳳梨香辣＋紅三刀魚
最新引入被稱為「魚王」嘅三刀魚魚油偏重，所以入口甘香鮮甜、魚味濃郁，最好食係魚背鰭邊位，魚油特別豐腴，油香停留口中回甘。近年喺香港已好少見，喺烤魚店食到實屬難得。
我自己鍾意食辣，但實則又唔太食得辣，夏天揀呢個菠蘿香辣湯底就啱。辣度依然夠勁，但就有輕甜微酸菠蘿解解辣，辣得嚟啱啱好。而且菠蘿止渴開胃，炎熱天氣食特別舒爽。
酸菜魚系列 車仔麵式揀配菜
有時夏天熱到無咩胃口，食得唔多但又咩都想食啲，呢度就有酸菜魚系列 (同系列仲有毛血旺系列、水煮魚系列) ～原窩酸菜魚上枱，窩底仲有超厚、超Q彈寬粉。配菜方面則以「車仔麵式」揀，可揀3、4或5款配菜等，想試多幾款都唔會貴。
值得一提嘅係，酸菜魚嘅酸菜係自家製，一般酸菜總係偏酸或偏甜，佢哋嘅酸菜反而係以「香」取勝，入口會即刻散出一種酸菜香，酸甜度平衡唔會太突出而掩蓋魚味，值得一讚。
串燒飲酒 宵夜傾計好地方
呢度除咗係一間烤魚店，仲係一間「川式居酒屋」～因為呢度亦有多款燒烤、串燒同超過30款清酒，開到夜晚11點～唔少人唔係為烤魚而來，而係喺宵夜時段嚟飲杯酒、食串燒。
印尼大頭蝦
最好先預訂嘅大頭蝦，因為高質量少，極厚肉多膏，味道口感都拍得住龍蝦。一般燒大蝦肉會好乾，但呢款大頭蝦因為殼同肉都夠厚，燒出黎唔乾之餘仲好Juicy，切開蝦頭位仲有豐富蝦膏呀。
炭香串燒
呢度嘅串燒有居酒屋級數，特別用日本爐＋陶炭燒製，陶炭可以散發獨有嘅炭香，但唔會產生炭灰，好食又健康。特別推薦口感彈牙嘅新鮮白鱔串燒，咬開仲會滲出魚油甘香。
仲有灑上孜然粉嘅雞翼串燒，雞皮亦燒得香脆。
飯後小酌 冰鎮鮑魚佐酒
夜晚飯後想搵個地方同朋友坐低飲杯嘢，呢度亦有凍食嘅麻辣小菜—冰鎮大連鮑魚、秘製醬嘅香辣魷魚、爽口麻辣海螺等，飯後想過吓口癮仲可以解膩佐酒。呢度有30款清酒外，亦有多款本土手工啤、啤酒塔、沙冰揀。
冰鎮鮑魚
(左起) 麻辣海螺、冰火魷魚
超過30 款清酒、啤酒選擇。
父親節
21號星期日
送每位冰鎮鮑魚兩隻
午市
12：00-3：00 7折
晚上分三段
17：00-18：00 8折
19：30-20：00 95折
21：00-21：30 7折
冰鎮鮑魚可以同優惠同時使用
小魚兒
地址: 尖沙咀金馬倫道16號金馬大廈1樓
電話: 23282122
