唔少人放假都會過大海覓食，而家唔使過海都食到澳門人氣美食喇！「叠記咖喱」喺澳門有近80年歷史，係當地著名嘅老字號咖喱店。最近開到嚟香港，除咗保留最原始嘅祖傳秘方同招牌款式外，仲有好多香港店限定美食，近近哋都食到澳門風味啦。
「叠記咖喱」1947年開業，起初由第一代兩夫婦挑起扁擔喺街邊販賣咖喱牛腩河；到60年代推起木頭車擺檔，繼第二代接手先正式喺澳門大馬路落腳開創始店。手藝至今已經傳承到第三代，店主放棄飛機師嘅高薪厚職接手家族生意，為嘅係保留每代人嘅心血同始終如一嘅味道。
【必食！招牌辛辣甘甜咖喱汁】
嚟到一定要試吓呢度嘅鮮炒咖喱同傳統橡筋麵，前者要喺原始咖喱膽定期加入過百種香料熬製，味道香濃；而後者嘅「橡筋麵」其實係澳門老一輩經常食嘅傳統麵餅，憑住彈牙煙韌口感因而命名，坊間好少食到㗎～
咖喱牛腩麵($43)
識食一定係食招牌名物——咖喱牛腩麵!!! 咖喱牛腩會先炆後炒，完美逼出牛油香同時更入味，再加入新鮮滾起嘅麵餅同牛骨湯底，最後按個人嗜辣程度滴上靈魂辣醬，真係一上枱已經聞到咖喱香。建議口感控可以揀橡筋粗麵，特別Q彈有咬口㗎！而牛腩軟腍重牛味，牛魔王favourite。
咖喱牛腩飯($48)
飯桶一樣有得揀！咖喱醬汁本身已經好佐飯，加埋啖啖肉嘅軟腍牛腩，真係好食到汁都撈埋。
牛三代麵($63)
想食得豐富啲嘅話，推介呢款牛三代！一口氣食勻咖喱牛腩、牛筋同鮮牛肉，每款分量都幾多，牛筋煮到軟化滑嫩，食起嚟帶少少黏口膠質，感覺有滿滿嘅膠原蛋白!! 鮮牛肉大大嚿夠彈牙，一次過滿足晒三個願望啊！
餃餃麵($55)
店主喺設計餐牌上融入港式車仔麵特色，客人可以自由配搭36款配料、自選6款麵底同6款醬汁。選擇困難可以直接揀餐廳推介配搭，呢款就有魚片、魚蛋、水餃同雲吞，無論配辣醬定清湯都好滿足。
【開胃特色小食】
蘿蔔牛雜($88)
香港有唔少牛雜Fans，呢度處理牛雜嘅技巧純熟，會將佢哋徹底清洗乾淨、辟走腥味，食落無乜內臟腥味㗎。部位主要有牛腸、牛肺、牛肚同金錢肚，食落鮮味突出而且分量慷慨，配埋吸滿湯汁嘅蘿蔔好惹味。
澳門特式豬扒包($38)
澳門名物都帶到嚟香港～呢款香港店限定小食可以單點或下午茶套餐($38起包飲品)。豬仔包搽上薄薄一層牛油，烘到外層脆卜卜，中間夾住塊豬扒肉質軟腍，一啖咬落口層次豐富！
咖喱魚蛋($15/10粒)
新店注入唔少香港本地元素，可以舒服坐定定咁食咖喱魚蛋啦。魚蛋脹卜卜富魚肉味，店家特調嘅秘製辣醬惹味又帶刺激感，不斷有口水分泌超爽啊。
叠記咖喱
地址: 太子花園街224號地下A號舖
電話: 21160463