【海鮮專門店】超人氣龍蝦料理 價錢貼地驚喜!
香港人出名鐘意食海鮮,西環就有間主打龍蝦嘅海鮮專門店,用新鮮龍蝦烹調出唔同菜式,身為龍蝦迷一定要朝聖呀!龍蝦主題餐廳Lobster Shack係用新鮮龍蝦,特別鮮甜彈牙。負責人話希望食客可以喺輕鬆環境下,享用到價錢合理又高水準嘅海鮮。
西環有間主打龍蝦嘅海鮮專門店,龍蝦迷一定要朝聖。

價錢貼地 輕鬆試勻多款海鮮
其實Lobster Shack一向希望滿足每位食客,特別係對海鮮嘅渴望。所以多款海鮮食材—龍蝦、鱈魚、八爪魚等均主張新鮮即煮,而且價錢貼地,平日仲有特價㗎!就算一次過試勻幾款海鮮都唔肉赤。
吧枱位放滿龍蝦,仲可以望住燒龍蝦過程

超人氣龍蝦料理!
當然,多款龍蝦料理一直係店家主打,一嚐龍蝦原始鮮味嘅烤龍蝦外,龍蝦芝士通心粉、小龍蝦意大利飯、龍蝦包等特色料理都大受歡迎。有賴海鮮夠新鮮,大廚堅持用最少調味料,令食客品嚐真正鮮甜。

一嚐原始鮮味!烤龍蝦 
話明係龍蝦專門店,鮮味最突出嘅烤龍蝦真係必食。原隻龍蝦開邊,只用蒜蓉、檸檬、牛油簡單調味,再將龍蝦烤到微微焦香,熟度啱啱好,爽彈札實又有肉汁。

烤龍蝦勁厚肉,食到原始鮮味。

大受龍蝦迷歡迎!龍蝦芝士通心粉
美國人勁鍾意嘅Mac & Cheese,嚟到Lobster Shack變成升級版。大廚將意大利通心粉連同大量車打芝士一齊煮,然後面層再灑上大量芝士拎去焗,真係好邪惡~芝士控一定不可錯過!不過都真係有啲heavy,叫一份同朋友share就啱啦。
Mac & Cheese龍蝦升級版,超多龍蝦肉。

人氣高企!龍蝦包
龍蝦包可謂呢幾年嘅人氣食品,呢度嘅龍蝦包雖然就唔係啖啖龍蝦肉,但就將龍蝦粒及蔬菜混入沙律內,味道比起坊間食嘅更fresh。

幸福感爆滿!小龍蝦意大利飯
意大利飯係用番茄忌廉汁煮,米粒吸滿龍蝦醬汁精華,口感軟綿creamy,每啖都好有幸福感。小龍蝦肉、巴馬臣芝士勁香濃開胃,唔覺唔覺就清碟喇。

真正用龍蝦熬煮!龍蝦濃湯
一般龍蝦湯好易煮得死鹹,呢度嘅濃湯加咗龍蝦殼熬煮,濃中帶鮮,好值得一試。
龍蝦濃湯足料熬,濃得嚟有鮮味唔會死鹹。

【同場加映: 多款海鮮料理】
除咗爽食龍蝦外,同場仲有多款海鮮㗎。

經典料理有驚喜!炸鱈魚薯條
估唔到經典Fish&Chips都會有驚喜~首先係勁大份量,其次係炸魚好有鮮味,有別一般有雪味嘅炸魚呀,記住要配埋啤酒夠晒chill。

Q彈口感!烤八爪魚
八爪魚勁彈有口感,配埋醃漬茴香及蒜香蛋黃醬,好啱佐酒傾計。
烤八爪魚香口彈牙,好啱飲酒。

世界各地引入!時令生蠔
呢度亦會按時令引入各地生蠔,嚟到可叫員工推薦當日新鮮生蠔㗎。
按時令引入各地生蠔。

Lobster Shack
地址: 西環西營盤第二街6-8號地舖
電話: 23818138
* 資料由客戶提供