有無諗過喺香港都可以置身於法國凱旋門下享受浪漫晚餐? “ROYAL INN”以巴黎凱旋門為靈感,設計出純白浮雕拱門,配搭水晶吊燈、歐式花境佈置,令人感覺置身於法國一樣。最近,佢地梗喺銅鑼灣開咗新分店,同尖沙咀店一樣主打歐洲菜。
![](https://www.openrice.com/userphoto/CMSContent/0/8B/001N7TF6E614848C36739Ej.jpg)
“ROYAL INN”尖沙咀店以純白凱旋門、乾花、落地玻璃打造法國浪漫感覺。
![](https://www.openrice.com/userphoto/CMSContent/0/8B/001N7UCA7CF64254C975C5j.jpg)
尖沙咀店室內有多盞水晶燈,浪漫唯美;室外眺望彌敦道,欣賞開揚都市景。
銅鑼灣新店: 落地玻璃望維園靚景
新店呢邊延續ROYAL INN的一貫華麗,甫入門口嘅古典噴水池係第一個影相靚位,店內仲有水晶燈、拱形窗打造法式浪漫,大落地玻璃更望到維園靚景。
![](https://www.openrice.com/userphoto/CMSContent/0/8B/001N7V34D540A2E044B768j.jpg)
銅鑼灣新店門口古典噴水池係影相靚位。
銅鑼灣店內特設2間VIP房,細房可容納約16人;大房則約40-50人,配備投影音響裝置可供商務會議、派對宴客;甚至包場舉行輕婚禮都得。
![](https://www.openrice.com/userphoto/CMSContent/0/8B/001N7WB8C58FF344759577j.jpg)
銅鑼灣店大拱形窗極具空間感,充滿法式浪漫。
![](https://www.openrice.com/userphoto/CMSContent/0/8B/001N7X53243B2E40DDFEB4j.jpg)
餐廳毗鄰維園可欣賞綠悠悠靚景,商場亦設停車場方便泊車。
最重要呢度CP值好高,每道料理、甜品只係大約$100至$300,仲要係食回本嘅份量,完全係抵食之選!! 好似佢哋嘅招牌酥皮焗龍蝦海鮮大雜燴,巨大化份量3至4人share都好夠。
【一嚐歐陸料理】齊飲紅白酒 食酥皮焗龍蝦海鮮大雜燴
人氣爆高: 招牌酥皮焗龍蝦海鮮大雜燴
嚟到必點一定係店家人氣爆高嘅招牌酥皮焗龍蝦海鮮大雜燴,完全係巨大化酥皮湯呀!! 一上枱已經聞到好香牛油味,有番茄濃湯、菌香忌廉、傳統海皇湯3款選擇。私心大推傳統海皇湯,係用法國普羅旺斯著名料理—Bouillabaisse海皇湯煮法,用大量洋蔥、藏紅花、香草、海鮮高湯煮製,每啖都係濃郁海鮮精華呀。
![](https://www.openrice.com/userphoto/CMSContent/0/8B/001N8057AD210414703BE4j.jpg)
招牌酥皮焗龍蝦海鮮大雜燴,未食已經聞到好香牛油味。
最後大廚會放入新鮮波士頓龍蝦半隻、鮮蝦、法國麵包蟹、海蜆、青口、魚柳、帶子等,再鋪上酥皮入爐即叫即焗。我哋一嚟就食啖酥皮先,新鮮出爐好酥脆鹹香。之後仲有大量海鮮一齊share,淨係呢個海鮮湯已經好豐富。
![](https://www.openrice.com/userphoto/CMSContent/0/8B/001N814CD2D5593B7B2022j.jpg)
足料海鮮+酥皮入爐烤焗,完美結合鮮味·酥香。
每日飛機運到 | 即開生蠔·法式煙肉芝士焗蠔
“ROYAL INN”會陸續推出限定歐陸料理、多款紅白酒,每日都會直送新鮮生蠔。嚟到除咗食即開生蠔外,冬天可以揀熱食法式芝士焗生蠔,有菠菜忌廉、香脆煙肉口味揀。
![](https://www.openrice.com/userphoto/CMSContent/0/8B/001N7YF03AD71D677D2EC3j.jpg)
法式芝士焗生蠔,冬天想食生蠔就啱晒。
必試前菜 西班牙火腿芝士拼盤
前菜想慢食傾吓偈先,可以嗌西班牙火腿芝士拼盤一齊share。將西班牙火腿、松露芝士(Truffle Cheese)、戈貢佐拉藍芝士(Gorgonzola) 配上無花果、杏桃、多士等,鹹香開胃又有氣氛。
![](https://www.openrice.com/userphoto/CMSContent/0/8B/001N7ZA00349DC4FC934EAj.jpg)
西班牙火腿芝士拼盤,好啱飲酒傾偈。
多款手工意粉 推介:鮮海膽手工絲帶闊麵
呢度仲可以食到手工意粉—絲帶闊麵、意大利雲吞、戒指意粉,唔係度度食到㗎。呢款絲帶闊麵就最掛汁,加埋軟綿綿鮮海膽好有口感。
![](https://www.openrice.com/userphoto/CMSContent/0/8B/001N8206FFC3B9A47EFFE5j.jpg)
鮮海膽手工絲帶闊麵,同場仲有多款手工意粉。
夠晒份量 炭燒安格斯肉眼牛扒
炭燒安格斯肉眼牛扒足足16oz,一個價錢、兩個人食都好滿足。仲係選用出名靚牛嘅阿根廷安格斯,有各種份量、肉位選擇,好似安格斯裙柳牛扒、安格斯西冷牛扒、安格斯平鐵牛扒等。本身牛扒會配千層薯、車厘藤茄、天然海鹽。另外亦可追加香煎波士頓龍蝦半隻、燒牛骨髓、香煎鴨肝等。
![](https://www.openrice.com/userphoto/CMSContent/0/8B/001N8356A221960F6ED565j.jpg)
炭燒16oz安格斯肉眼牛扒。兩個人share都好滿足,更可追加多款配菜。
儀式感滿滿 | 火焰雪山
好有儀式感嘅經典甜品—火焰雪山!! 出場時會淋上烈酒點火,切開入面有蛋糕、雪糕。如果嚟慶祝特別日子,真係必食。
![](https://www.openrice.com/userphoto/CMSContent/0/8B/001N84A9ED20E06A8AFE4Ej.jpg)
火焰雪山即場點火,充滿儀式感。
經典甜品: 朱古力心太軟配雪糕
另一經典甜品朱古力心太軟,一切開即刻有滿滿朱古力流心,外層朱古力蛋糕亦焗得輕脆。
![](https://www.openrice.com/userphoto/CMSContent/0/8B/001N85EB56DD0E853748B8j.jpg)
朱古力心太軟配雪糕,一切開即流出朱古力好有幸福感。
【下午茶CP值高】
呢度仲有下午茶時段,可以揀IGable嘅三層架下午茶,又或指定單點都幾抵食,有時令新鮮生蠔6隻、煙三文魚檸檬忌廉芝士牛角包、海博瑞鱘魚子醬、Tiramisu、焗蘋果金寶配雲尼拿醬等,包$28或以下飲品/任何無酒精飲品半價。
下午茶想輕盈啲,又口痕想食啲香口嘢,呢款雞腿沙律就滿足晒兩個願望喇。即炸雞腿灑上松露同芝士,食啖脆雞腿再食啖沙律,即刻無咁罪惡感(笑)。
![](https://www.openrice.com/userphoto/CMSContent/0/8B/001N86F591E37604A5889Cj.jpg)
香脆松露芝士雞腿沙律,雞腿即叫即炸好香脆。
呢道大蜆扁意粉絕對有驚喜,如果你好鍾意海水味一定要試。呢道意粉一滴清水都唔使落,係用白酒、蜆水逼出大蜆鮮味,特別鮮甜。
![](https://www.openrice.com/userphoto/CMSContent/0/8B/001N87ABFDB02F5AE99555j.jpg)
香蒜鮮大蜆扁意粉,用白酒、蜆水逼出鮮味。
ROYAL INN (銅鑼灣店)
地址: 銅鑼灣告士打道311號皇室堡3樓313-314號舖
電話: 28183287
ROYAL INN (尖沙咀店)
地址: 尖沙咀彌敦道100號The ONE 1樓L121號舖
電話: 23218289