日本靜岡小店「五要素食堂」主打薄餅、意粉，香港係唯一海外分店，最近一同研發100%和牛漢堡，暫時香港獨家發售㗎！
日本岩手縣黑毛和牛漢堡自選套餐，香港少有100%和牛漢堡。
最平$88食到100%和牛漢堡
100%和牛漢堡咁罕見，全因日本和牛身價不低，「五要素食堂」當然佔盡地理優勢由日本總店引入和牛。150g漢堡扒混合30%肥和牛&70%瘦和牛手打而成，肉厚爆汁又有獨特油香，其他產地牛肉難以代替。而家最平$88就食到，更可優惠價追加多款小食，CP值極高呀！
全店4款和牛漢堡選擇
和牛漢堡$88 終極和牛漢堡$98 松露和牛芝士漢堡$98 火焰和牛漢堡$88 |
追加多款配料&優惠小食！
每款漢堡都可以升級Double和牛，並可追加配料—意大利藍芝士、豪達芝士、墨西哥辣椒、黑松露鮮菇、脆巴爾馬火腿、和牛漢堡扒，生酮人士亦可轉生菜包，相當貼心。
雖然有咁多追加配料，但真心漢堡本身已經好豐富！基本款和牛漢堡已經有150g日本岩手黑毛和牛扒、焦糖洋蔥、意大利脆巴爾馬火腿、美國番茄、美國牛油生菜啦。反而用優惠價追加小食，食得仲爽。
追加優惠價小食
男爵薯仔沙律及洋蔥湯$18
超脆薯條$28 檸檬胡椒薯條配特製丘比醬$38 蟹肉味醬薯條$48
南蛮風炸雞$48 海苔水牛城雞翼3隻$38 巴馬臣蒜牛油雞翼3隻$38 鰹魚芝麻雞翼3隻$38 靜岡和風雞翼3隻$38 靜岡柚子胡椒雞翼3隻$38 |
【和牛漢堡】基本款超豐富 留肚掃優惠小食
每個漢堡都可以無限追加小食，以和牛漢堡為例，追加海苔水牛城雞翼、蟹肉味醬薯條埋單只係$174，已經大滿足啦。
日本岩手黑毛和牛漢堡、海苔水牛城雞翼、蟹肉味醬薯條
【終極雙層和牛漢堡】Double和牛合共300g！
每款漢堡都可以升級Double，2塊漢堡扒加埋300g㗎！不過食落一啲都唔膩，因為焦糖洋蔥甜甜哋；加埋美國引入嘅番茄、牛油生菜都特別大塊清甜，好清爽解膩。特別鍾意佢哋用咗牛油生菜，相比一般生菜會鬆軟啲，唔會太爽脆搶咗和牛肉感。
呢度全部雞翼都係新鮮炸，極級脆！最值得一試就係日本自家研發—鰹魚芝麻雞翼，灑上真·鰹魚碎令雞翼有種鮮味香口感覺。
終極雙層和牛漢堡、鰹魚芝麻雞翼
【火焰和牛漢堡】墨西哥紅椒+意大利藍芝士有驚喜
日本料理一向辣得低調。今次火焰漢堡大膽用上墨西哥紅椒，同時保留低調作風先用醋醃製紅椒，大大降低辣度之餘，辣中帶酸反而好惹味開胃，就算唔嗜辣都可放心食。
火焰漢堡另一驚喜點，係特別用咗意大利藍芝士。因店家研發過程中發現藍芝士特別濃郁，可以平衡辣味又好夾。
火焰和牛漢堡、靜岡和風雞翼
【雙層和牛漢堡】配名貴伯爵茶解解膩
火焰漢堡以外，全部漢堡都用上荷蘭哥達芝士。恰好同藍芝士相反，哥達芝士味道淡雅，唔會搶走牛味之餘，軟綿綿口感加埋肉汁好正。此外，每款漢堡都以意大利巴爾馬火腿取代一般煙肉，店家特別將火腿香炸2次勁鬆脆，唔會出現煙肉太乾太硬嘅情況。
如果驚雙層漢堡太膩，小食同飲品推薦—南蛮風炸雞、涷檸檬伯爵茶。日本炸雞醬汁係蛋漿+白汁，綿滑清新；檸檬茶則以名貴伯爵茶葉沖製，獨特茶香解膩一流。
雙層和牛漢堡、南蛮風炸雞、涷檸檬伯爵茶
【松露和牛芝士漢堡】黑松露&洋蔥湯食出儀式感
當你第一啖咬落去，就會發覺麵包係特別鬆軟。因為係自家製新鮮出爐法國牛油包嚟㗎。臨上碟前，會抹上蒜蓉牛油再燒一燒，口感鬆軟又脆卜卜。
如果食burger都想食得有儀式感，可以揀松露漢堡再配男爵薯仔沙律及洋蔥湯，儼如一場輕鬆西日fusion晚餐。沙律係自家研製，加入意大利銀魚柳提鮮，一啲都唔單調㗎。
松露和牛芝士漢堡、男爵薯仔沙律及洋蔥湯
【松露雙層和牛芝士漢堡】歐洲超脆薯條無得輸
漢堡同薯條一直係perfect match，所以呢度嘅薯條絕不馬虎。特意由歐洲訂購超脆薯條，就算閒置十幾分鐘或外賣都依然好香脆，可以揀一般鹽味、檸檬胡椒或蟹肉味醬。
同場仲有意大利咖啡機沖製嘅多款拿鐵，少女心爆發嘅涷靜岡草莓拿鐵，真係用新鮮靜岡士多啤梨打成蓉，女生一定要試呀。
松露雙層和牛芝士漢堡、凍靜岡草莓拿鐵
火焰雙層和牛漢堡、檸檬胡椒薯條配特製丘比醬、凍咖啡拿鐵
五要素食堂
地址: 尖沙咀彌敦道100號The ONE3樓L308號舖
電話: 28892240
