【康得思酒店星級外賣】米芝蓮中菜、西式輕食都有

疫情持續人心惶惶，大家都想食餐安樂茶飯，最慳力安全當然係外賣啦。而家外賣選擇越嚟越多，連酒店質素都有！今次就搵嚟旺角Cordis, Hong Kong康得思酒店嘅外賣自取服務，酒店有齊米芝蓮星級食府「明閣」、歐陸風餐廳及酒吧「Alibi – Wine Dine Be Social」，同埋全日供應自選特色菜式嘅「The Place」。

酒店餐廳當然有保證，三間餐廳都係即叫即煮，確保食物質素安全衛生，無論喺屋企定Office 都可以食到酒店級菜式喇！

喺屋企食米芝蓮「明閣」菜式

以前無諗過喺屋企都食到米芝蓮菜式，「明閣」有多款米芝蓮星級點心、至尊蜜汁叉燒等。同場仲有多款限定套餐，一人套餐只係HK$108 仲有天天老火湯附送，套餐選擇包括至尊蜜汁叉燒飯、富貴鹽香雞飯、鵝肝叉燒葱花炒飯等。

另外亦設二人或四人套餐，HK$338 起可自選兩款或四款小菜 (連絲苗白飯及天天老火湯)，包括鳳梨咕嚕肉、遠年陳皮和牛面頰、花椒羅勒未來牛肉漢堡等。

歐陸風餐廳及酒吧「Alibi – Wine Dine Be Social」

除咗中菜外，酒店仲有高質嘅西餐廳。「Alibi – Wine Dine Be Social」外賣菜單有小食、主菜同埋配菜揀，當中主菜新喀里多尼亞大蝦海鮮飯就用西班牙辣肉腸、番茄乾同煙薰藏紅花等炒製，相當香口。小食同配菜則有黑松露火腿芝士多士、迷你澳洲赫里福德有機草飼牛肉漢堡、香炒花椰菜苗等。