私房菜就聽得多，私房火鍋又試過未呢？天后呢間大隱隱於市嘅「獅子林私房火鍋」就以私房飯堂為理念，唔單止挑選新鮮食材入饌，用心將傳統美食改良，仲可以按口味同需求，預訂一份專屬於你嘅特定菜單！
湯底及配料選擇多元化，亦可以按需求預訂私房菜單
樓上設有三個唔同大細房間，私隱度高
養生美顏 台式人蔘白湯鍋
師傅以台式養生鍋同美人鍋為靈感，設計出呢款以韓國人參、當歸、杞子、紅棗、龍眼乾、黨參等藥材熬製而成嘅台式養生人蔘白湯鍋，味道甘甜、補而不燥。裡面仲有吸飽湯底嘅蜂巢凍豆腐同台灣直送鴨血，絕對必食！
台式養生人蔘白湯鍋
酸香細膩 自家酸菜白肉鍋
自家酸菜白肉鍋同樣走台式風格，自家製酸菜醃製需時兩個禮拜以上，令酸菜足夠入味。配搭脂香十足嘅白肉，酸味突出但唔嗆、反而細膩柔和，配唔同食材都夾到。鍋中亦有唔少粉條，爽滑彈牙。
自家酸菜白肉鍋
生猛海鮮推介 南非鮑魚．新鮮龍躉
湯底係火鍋靈魂嘅同時，配料當然亦要有水準。餐廳精選各款時令產地直送海鮮，南非原隻鮑魚每隻約九頭大，肉質嫩滑彈牙，充滿鮮味。新鮮龍躉片更係用20至30斤嘅大龍躉生劏而成，魚皮爽韌、魚肉雪白嫩滑！而且一啲都唔腥呀。
南非原隻鮑魚
新鮮龍躉片
多款生猛海鮮
牛魔王必食！盛極安格斯牛拼盤
香港人打邊爐點少得肥牛？但隨著各位越食越精，睇嚟只有呢份盛極安格斯牛拼盤先滿足到牛魔王們。有齊牛胸爽、牛頸脊、牛舌、安格斯牛肉同安格斯牛粒，仲有秘製醬汁係專門帶出安格斯牛肉嘅牛香！牛胸爽係牛胸腔肋骨中間嘅軟骨，又稱「牛白肉」，爽口帶油香。牛頸脊油花適中，肉質軟嫩。牛舌鮮脆有嚼勁。
盛極安格斯牛拼盤(300g)
精心巧製 自家手打肉丸．餃子
肉丸同餃子都係唔少人打邊爐必食，同坊間千篇一律嘅肉丸唔同，餐廳唔單止堅持自家手打，仲會加入唔同創意配搭。例如性格四式手打墨丸就係混入芫荽、黑松露、鮑魚、蟹子，的確四款食材各自有唔同獨特香氣，風格多變又夠彈牙。而本土味四式豬肉丸就以家常肉餅常見嘅菜、蝦乾、土魷、鹹蛋黃作為配料，無諗到變成火鍋肉丸又幾好食幾過癮。唔好錯過自家餃子拼盤，一份有齊餃子、雲吞同韭菜餃，大粒飽滿、皮薄餡多。
性格四式手打墨丸
本土味四式豬肉丸
自家餃子拼盤
惹味炸物 蟹粉魚皮．蝦釀老油條．即炸響鈴
炸魚皮見得多，當一般火鍋店只有原味同鹹蛋黃味，呢度居然推出蟹粉炸魚皮，仲係用大閘蟹嘅蟹粉製作啊！師傅話想帶多啲新嘅口味畀大家選擇，蟹膏鹹鮮香濃，同鬆脆嘅魚皮好夾，當小食就咁食，或者浸幾秒湯底食又得。台式火鍋常見嘅老油條香脆又索湯，師傅就釀入彈牙嘅自家手打蝦膠變成台式蝦釀老油條，增加口感層次。講到索湯，當然不得不提最經典嘅即炸響鈴卷，脆口得嚟最緊要係乾爽唔油膩呀。
蟹粉炸魚皮
台式蝦釀老油條
即炸響鈴卷
特色推介 鮮鵝腸．雞子．紫淮山
為咗精益求精，師傅仲特別準備唔少需要花功夫製作嘅配料，例如鮮鵝腸近年越嚟越少火鍋店有供應，皆因一定要將鵝腸洗得乾淨先可以去除腥味，相當費時。但呢度就有老饕最愛嘅肥美鮮鵝腸，名副其實保留咗鵝腸裡面嘅肥膏，食落外脆內軟，油脂甘香！農場鮮雞子特別以紹興黃酒浸泡，提鮮同時減少腥味，口感嫩滑。新鮮紫淮山亦值得一試，口感同淮山差唔多，勝在含大量花青素，具抗氧化同美容功效。
肥美鮮鵝腸
農場鮮雞子
新鮮紫淮山
獅子林私房火鍋
地址: 天后永興街21號地舖
電話: 35636887
WhatsApp: 97362742