【兩大日本師傅坐陣】江戶時代風格裝潢銅鑼灣日本料理新推介

真係好掛住日本啊！雖然暫時飛唔到，好在香港亦有唔少日本菜選擇。今次推介嘅「一瀧」就坐落於覓食熱點銅鑼灣登龍街，上到去先從江戶時代風格嘅裝修感受一下氣氛，聽住日文歌，再細味由兩位福岡出身嘅日本大廚精心打造嘅各式料理，好有去咗日本嘅Feel啊。

餐廳裝修走江戶時代風格，選用木作為主要建材，展現和風氛圍

餐廳由西村師傅及水崎師傅兩位日本大廚主理，供應多款刺身、壽司、爐端燒、燒鳥、鍋物。當中大量採用日本各地特色食材，包括佐賀金星黑豚肉、宮崎A4和牛、福岡三瀨雞等等。

供應各款日式料理之餘，亦有壽司吧可作席前廚師發辦

驚喜前菜　松露薯仔泡泡

日式薯蓉沙律相當常見，師傅就將其改良，將薯仔打成入口即溶嘅泡沫狀，加上半熟嘅溫泉蛋同清爽多汁嘅青瓜粒一齊食，既保留到薯仔嘅軟綿溫醇，亦大大減低飽膩感！加上酥脆嘅日本薯片同松露提味，一試難忘。

一瀧松露薯仔沙律

創意配搭　鰻魚牛油果卷+芝士吉烈黑豚卷

多款創意卷物亦見心思，黑色嘅鰻魚牛油果卷非常搶鏡，其實係加咗墨魚汁，將壽司返染色兼增添香氣。捲起燒香嘅鵝肝同牛油果，油潤軟綿、令味道層次更為豐富。上面鋪上大大塊蒲燒鰻魚，香味撲鼻、肥美軟嫩。最後以青瓜片點綴，同時平衡油膩感。

鰻魚牛油果卷

吉烈豬扒相信大家都食過，但做成卷物又會係點？師傅將柔軟多汁嘅佐賀金星黑豚肉炸至金黃酥脆，以紫菜同飯捲起後加上自家調配嘅芝士醬汁，香濃嘅芝士味同黑豚嘅肉香好夾！口感層次豐富。

芝士吉烈黑豚卷

必食推介　三瀨雞一夜干+IFC

一夜干源自北海道，原為保存漁產而將食材風乾，師傅就諗到將呢個處理方法套喺燒鳥當中，將福岡三瀨雞全翼醃漬及風乾一晚，再原隻燒香，雞皮會變得更脆，雞肉風味亦會更突出！雞中翼部分非常皮脆肉嫩，而雞翼尖就最香脆最入味。

三瀨雞全翼一夜干 (每日限量供應)

黑色嘅Ichitaki Fried Chicken又名IFC，即係餐廳特製嘅唐揚雞。選用嫩滑多汁嘅三瀨雞髀肉，醃製後裹上加入墨魚汁嘅麵衣再油炸。黑色嘅麵衣增添香氣，無骨雞肉啖啖香脆鮮嫩。可以隨喜好點少少自家沙律醬，酸甜醒胃。

一瀧唐揚炸三瀨雞

打卡必點！棉花糖A4和牛壽喜燒

暖笠笠嘅鍋物係唔少香港人嘅Anytime Favourite，何況呢度嘅和牛壽喜燒仲會加上棉花糖！師傅會先將自家調配嘅壽喜燒醬汁同新鮮蔬菜煮至半熟，上枱後煮滾再放上棉花糖，白色嘅棉花糖瞬間溶解喺湯汁當中，影相拍片一流之餘亦會增加甜香。配搭油花勻稱、牛香濃郁嘅A4宮崎和牛，建議滾三秒左右，半熟再加生雞蛋最軟嫩啊。