魚蛋佬

營業中

休息中

🇭🇰魚蛋佬·我地之前成日夜晚黎食宵夜架 但係疫情之後已經超耐無黎啦🤭🤭見近排天氣終於涼啲 我哋就決定再嚟 不過今次再黎佢啲鋪頭好似都轉左好多🥺·魚蛋 l 齋 $6之後就係呢間長期都超多人排隊既鋪頭啦 我自己覺得佢幾惹味既 超級掛汁 不過都係沙嗲佬既沙嗲汁惹味啲😉佢個魚蛋都幾彈牙既 但係我地就中意佢個齋多啲 佢係串到一層層咁 索汁啲之餘口感都豐富啲😎😎·📍西灣河筲箕灣道57-87號太安樓地下A28號B舖·

鍾意掃街既你隨左葵廣，你一定有聽過太安樓，今次介紹既係太安樓我最鍾意既一間小食。每次去幫襯都係同一個姐姐開鋪，佢話有好多人係網上知道佢地間鋪特登黎幫襯，講緊既唔係香港人而係其他黎香港旅遊既人，最多人係台灣人，仲有其他咩國家既人都有。老細係早年西灣河碼頭擺車仔檔賣腸粉同糯米飯，之後搬到太安樓賣魚蛋，最初無店名，係第三代蔡先生接手之後先改名做魚蛋佬，呢家已經有40-50年歷史。呢度主打就係香港人最地道既小食魚蛋，配上佢既秘製醬汁，隨左魚蛋佢既牛丸、牛柏葉都係好好食，都係配同一種醬汁。-1️⃣ 魚蛋 💰6 （👅: 8.5/10）我係幾年前幫襯都係6蚊串，到呢家都係6蚊無加過價，呢家係香港要搵6蚊串既魚蛋已經好難，仲要係好食既就可能得呢間。秘製沙嗲醬汁，食落係好似沙嗲同咖哩之間，辣度係小小辣，唔食得辣既人可能會有小小吃力，出邊食到既汁多數係死辣，一係唔辣 ，我覺得呢個完全係恰到好處，除左辣味仲有小小甜味，食落似係花生帶出黎既甜味，會有小小炸蒜粒，非常惹味。老闆娘話係秘製所以無講個汁係用咩材料，淨係話係沙嗲汁加十幾種材料。魚蛋唔係陳皮個種，口感彈牙爽口，一D都唔粉，有魚味，食落個醬汁入味，大細適中，

又係太安樓買完去公園食晚餐系列再再講多次 太安樓真係好多嘢食！！！次次經過都總有5-6人排緊隊但次次都捧住緊個肚 食唔落襯有一次口痕 就一人篤一串魚蛋🍡果然 次次都有人排隊係有原因嘅雖然本人鍾意食陳皮魚蛋多啲 而佢唔係佢係用唔會越煮越脹果啲魚蛋細細粒 一啖一粒而且都算彈牙 口感唔錯再嚟就係醬汁方面佢嘅秘製沙嗲醬我覺得好好味😋好濃味 但又唔算辣直頭想問吓有無沙嗲醬賣🤣價錢又唔太貴 $6有5粒絕對可以翻兜！！！沙嗲魚蛋 (5粒) $6 🙆🏿‍♀️

小時家住西灣河，行經太安樓一定「扭計」要媽媽買魚蛋食，當時還是推車檔。今天駕車駕過，泊正係門口「吉」兩串。魚蛋佬已搬了入舖，由魚蛋佬的兒子經營。要了兩串魚蛋兩串齋。講真，香港成千上萬的魚蛋檔，都是麵粉制成，重點是醬汁。魚蛋佬的醬汁十年如一日，但好的東西就是歷久常新下可以維持不變而且有生意。特別是齋，因為將醬汁吸入齋內，放入口時，醬汁湧出來的口感，是難以形容的滿足。所以，齋反而是我推介的重點食物。提一下，魚蛋佬在上年曾作義買，捐錢俾612，如此有心黃店，香港人應該要去支持下。

我繼續在「西灣河」食街「太安樓」裡面一邊「掃街」，一邊慢慢等候晚餐時間來臨，期間我在「太安樓」往「香港電影資料館」那一邊位置，光顧港式小食店「魚蛋佬」，購買了一串「魚蛋」。「魚蛋佬」店舖實際規模其實非常之簡單，入面只有狹小的空間，放置了一個看似是雪櫃的物體，方便店主一個人在裡面工作，和製作售賣「魚蛋」食品給食客享用。「魚蛋佬」裡面的「魚蛋」口味屬於「沙嗲」，「沙嗲」醬裡面的辣味固然濃厚，但是其實「沙嗲」醬的辣味裡面，原來還有夾雜少許來自「花生」的甜味。至於「魚蛋佬」製作的沙嗲「魚蛋」實際口感方面，沙嗲「魚蛋」一串有五粒，「魚蛋」實際體積屬於中等，不算完全發漲漲大那一種「魚蛋」。「魚蛋」體積雖然不大，但是口感仍然算是彈牙。至於「魚蛋佬」的沙嗲「魚蛋」實際售價價錢，一串五粒的沙嗲「魚蛋」賣港幣六元，平均計每粒「魚蛋」賣一元左右，價錢尚算便宜，再計算口感和「沙嗲醬」的甜辣味道，「魚蛋佬」性價比頗高，下次可以繼續幫襯。

小編好少去港島東區，今次先係第一次去太安樓覓食⋯⋯🙈 今次試咗呢間喺晚飯時間都排長龍嘅小食店，老板娘講嘢真係好風趣，收錢嗰陣佢仲要雙手接錢，超級好禮貌同好服務😝 大家一定要多啲去幫襯同搵老板娘傾吓偈～😋 沙爹魚蛋 $66蚊5粒魚蛋真係好抵！呢隻唔係好實嘅陳皮魚蛋，而係比較彈牙嘅。沙爹汁少少辣好惹味，魚蛋索咗好多醬，多到爆晒出嚟😆 佢哋篤魚蛋嘅方法有啲唔同，竹籤尖嗰邊係手揸嗰邊，小編本來想提老闆娘係咪調轉咗支籤拮，原來呢件事勁有智慧🧐 原因有兩個，第一係如果尖頭向外嘅話有機會拮親食客個口，第二係袋落膠袋嘅話有機會篤串個袋，調轉支籤就安全好多喇！呢舖真係勇氣智慧也永不滅😝

經過太安樓，想食少少野，一入去就係魚蛋佬，見到有啲人在排隊，排我前面的食客都買兩串即食，食完一串先攞另一串，之前又聽聞過呢檔啲魚蛋幾好食，就排隊買左串魚蛋食，真係ok好食啲醬汁，這醬汁真的得重要😆。

經過太安樓香港而加她少有呢d甘集中特色架食物一條街仲要系以台灣小食為主馳名鷄蛋，蛋撻，車仔面經過呢間，見甘多人排隊，加入埋六元五粒沙嗲味好濃，同印呢果d有差別不過好吃，魚味農缺點就系汁會滳，容易整度衫

好鍾意太安樓呢個地方，雲集咗多間小店式食肆，食物都係外賣嘅小食為主，咁就可以一口氣掃幾間，感覺就似香港版嘅士林夜市咁。聽過人哋話魚蛋佬嘅醬汁唔錯，甚至比食物本身仲出色。不過之前唔知係唔係因為太夜嚟定其他原因，每次都係閂咗門嘅，呢日早咗少少嚟，咁就買咗一串魚蛋食下，六蚊有五粒都算係平。魚蛋中等身形，食落比較軟綿，冇彈牙口感，但質感唔錯。醬汁濃稠同埋均勻咁沾晌表面，微辣惹味，食完都冇太重嘅口渴感，唔算非常出眾，但過一過口癮都唔錯。