Salamat Cafe

假日有時都會早少少起身，為左去食個Brunch，知道元朗一直有一間人氣高企既Cafe，每次經過都大排長龍，為左避開人龍，今日特登一早店舖開門就去到！環境位於元朗劇院附近，比較入既位置，Cafe又唔算好細，都有室外位置可以坐，地段比我既感覺旺中帶靜，幾休閒既感覺。餐牌價錢最平$68就有交易，中午想鋸扒，食澳洲西冷都係$118，每份Lunch Set都包餐湯及茶，價錢相宜。餐湯是日餐湯係忌廉湯，都幾濃稠，忌廉味夠。美式雞扒煙肉芝士漢堡配吉列炸蝦&咖哩粗薯條 $68賣相吸引，漢堡包頗為大個，麵包係用上有芝麻果款，不過麵包就略為易塌，而内裡既雞扒燒得好香，有啲似日式燒雞既味，肉質都幾嫩，煙肉有兩、三片，每啖都咬到肉，芝士就只放一片，漢堡包面積較大，得某啲位食到芝士，放多一片味道會更全面。而吉列炸蝦&咖哩粗薯條十分香口，咖哩粗薯條估計係灑上咖哩粉再炸，每條都微微金黃色，食落咖哩味唔重，但味道都不錯。香燒美國肯瓊香料豬肉眼扒配燒菠蘿&雜菜沙律 $88餐廳招牌之一，見好多人都會點呢款，好抵食，皆因$88食到咁大塊咁厚身既豬肉眼扒！接近1個硬幣既高度咁厚，表面燒既紋路不錯，入口都帶有焦香味，不過始終咁厚，燒既時間一定唔短，久之肉質就會偏乾偏韌，好難控制，呢塊都不乏有此問題。(左)芒果多多冰 $48 及 (右)紅紅芝芝 $48(跟餐飲品半價 $24)芒果多多冰芒果味較薄弱，但夏天飲都幾消暑。紅紅芝芝芝芝即係芝士奶蓋，不過分層做得不明顯，芝士奶蓋唔多，但都有鹹香味，紅紅即士多啤梨，似糖漿沖成，一開始飲覺得味道平平，但愈飲愈好飲，成杯飲哂~總括而言，假日早上去Cafe嘆個Brunch加杯咖啡(今日太熱，飲左消暑類凍飲)，真係忙碌打工仔生活苦中一點甜，加上價錢唔貴，難怪小店如此受歡迎。…查看更多

「salamat」呢個外文字原來翻譯起來即係感謝o既意思，佢係間唔大o既餐廳，一角為open kitchen，繁忙時間見住廚師們埋首工作，餐檯o個邊一面有住貓貓造型燈飾，另外兩邊有雙向玻璃窗，採光度十足，雖然正午時份可能會有少少熱。一坐低，侍應哥哥見我地又袋又盛，俾o左個藤籃我地裝o野，非常貼心。午餐先有一個daily soup，侍應哥哥介紹今日呢個係甘筍薑忌廉湯。橙與白o既衝擊中顯露高雅o既雲石pattern，會品嚐到甘筍清甜o既味道，加一點兒唔過火o既薑o既辣度。黑松露忌廉汁吉列雞柳&野菌意大利飯($72，午餐平日無加一) o既雞肉去晒皮，risotto o既飯粒偏硬身，蘸上非常濃厚o既忌廉醬汁。黑松露自然散發住淡淡o既獨特氣息，連同瀋上o左大量芝士碎，口感豐盛。香燒美國肯瓊香料豬肉眼扒配燒菠蘿&雜菜沙律($88) 真係救命，超犯規，塊扒厚到……我諗有3-4 cm！原來豬扒都有肉眼部位，佢外面燒得甘香惹味，一切開，裡面雖然厚身，但唔都會唔熟或者過熟，好考廚師功架，同埋好難得成舊o野咁厚都醃得咁入味，呢個真係幾surprised，讚！餐飲除o左檸茶檸水仲有中國同日本茶——食西餐配中國茶係咩玩法？即管試下。嗌o左一杯玄米茶，一杯鐵觀音。雖然從招紙無辦法睇到係邊個品牌，但個茶包非常之精緻，應該都係靚o野。三角立體設計，裡面裝住多片原片茶葉，加水沖多杯都仲得。…查看更多