彩福皇宴 (京瑞廣場1期)

今日放假，特登同爸媽去飲茶，見石門呢間酒樓都開左一段時間都未去過，今日就黎呢度會一會佢。去到酒樓原來呢間酒樓都唔算細，個大堂都幾大，又冇柱位，裝修都幾光猛時尚，座位夠濶落，唔會俾人覺得枱連枱既擠逼感。如果擺酒呢度都幾適合。因為我預先book了枱，所以唔使等位就可以直接入去，侍應安排了我們入房坐和預先問定我們要什麼茶，所以一坐低就好快有茶送上。房入面得幾張枱，環境清靜，同朋友黎飲茶傾偈就啱晒！我們坐下後第一時間就睇下有咩好野食，原來呢度有幾款點心係得過獎，咁當然唔好執輸叫幾款黎試下佢啦，額外再叫了其他點心和一碟炒野。三個人食應該夠吧！叉燒腸上枱，他們用一隻長碟來盛載，叉燒餡算幾多，腸粉都幾滑，唔錯！第一款得獎點心上枱，呢碟叫做芝心海皇千絲春卷，淨係睇個樣都已經殺晒！啲米粉絲炸得好鬆脆，包裏入面的芝士餡幾濃，入面仲有冬菇，加埋一些蝦粒，外脆內軟，非常香口鮮味，食完一粒都忍唔住要再食多一粒！我最喜愛的咸水角新鮮炸起，面頭好脆，入面熱騰騰，餡料十足，正！銀芽肉絲雙面黃，一上枱感覺好大碟，未食都覺得抵食！麵炸得好脆，加上肉絲同芽菜，令成碟麵都香氣撲鼻，我都不禁食左三碗！嘻嘻！！第二個得獎點心係旋風流心奶皇包，外表成個旋風造型，相當得意，一咬落去啲奶皇就好似火山爆發咁流出，奶皇好香滑，個包好軟腍，真係值得回味！蝦餃皇皮做得夠薄，入面的蝦好爽脆和飽滿，值得推介！第三款的得獎點心係原隻鮑魚燒賣皇，他採用細細隻原隻鮑魚放上面，口感彈牙唔靱，配埋個燒賣皇一齊食，簡直係人間美食！呢度既食物質素同環境都唔錯，下次會再來！…查看更多

今日放假陪媽咪大人飲茶，就去開佢平時飲開嗰間彩福皇宴石門分店飲茶，梗係要食連續五年榮獲點心大獎，既原隻鮑魚燒賣皇啦$35有三隻，賣相吸引而且燒賣非常大粒，肉質彈牙，上邊嗰隻鮑魚又鮮味彈牙，值回票價！食燒賣梗係要配埋蝦餃皇啦，$30有四隻，不愧為蝦餃皇，份量大隻，一粒蝦餃皇裏邊有好多隻蝦，蝦味重而且彈牙，皮薄涵靚又多汁，正！沙薑雞腳$46，雞腳好入味，而且唔會煮到一pat pat，有口感！北菰棉花雞$24，棉花雞索晒上湯味，軟綿綿，又到咗甜品時間，好耐都冇食過家鄉甜簿餅$27，出邊好少酒樓有得食，甜簿餅皮煙煙銀銀，包住砂糖花生椰絲，甜甜蜜蜜，外皮仲有少少香脆，下次黎依度大家可以食下，貪靚嘅阿媽梗係食返個原個棷皇燉燕窩孝敬下媽媽先$45，棷皇好滑又夠香既棷皇味，面頭嘅燕窩都唔少添，份量大，可以夠兩個人品嚐，抵食，呢度有免費升級陳皮普洱茶，飲到香香嘅陳皮味，環境舒服，出菜快！…查看更多

好友喺沙田石門返工，星期六上午仲要返工，所以就好友放工直接喺嗰頭飲茶。我比較早到，咁就先上酒樓攞左飛先，不過都唔需要等好耐就已經可以入坐。我地見到其中有張點心紙寫住榮譽金獎點心，我地就選左兩個得獎點心。黃金流沙包，不愧為得獎點心，真心值得推介。入面流沙餡好滑好CREAMY，甜度適中。芝心海皇千絲春卷 用上一條條如髮絲嘅麵條絲包成，入口非常香脆。煎芋頭糕足料，芋頭味香濃，質感挺實，唔會靠溝粉，煎得都好香口。雞扎我無食，不過齋睇嗰賣相都唔差。鯪魚肉煎釀虎皮椒煎得夠熱夠香，尤其係鯪魚肉果一邊，泛起金黃色而有點脆口，入口熱騰騰，鯪魚肉彈牙有鯪魚香，虎皮椒爽口，吃起來唔會太辣。椒鹽龍鬚炸得好脆，又唔會覺得油膩，食唔停口。蝦餃皇嘅皮做到薄身，中間嘅蝦肉鮮美爽彈好新鮮。四個人，埋單都只係三百頭，人均消費一舊水都唔洗，位置都頗鬆動，坐得都舒服，眞係週末有口福。…查看更多