季季紅風味酒家

好少寫食評，但因為之前睇過食評投訴呢度嘅服務態度，食過之後好想幫服務員叔叔姐姐平反一下！記得差不多10年前住喺附近時幫襯過飲茶，印象只留有服務員都係比較年長的，沒有其他特別感覺。11月2號去完下白泥影日落後，壽星公喜歡廣東菜，咁就去食燒豬賀一賀佢來個小慶祝啦！門口比以前熱鬧咗好多。可能因為疫情，門口放咗幾架車仔 企住幾位店員，熱熱鬧鬧叫賣住外賣小炒、點心、2餸3餸。良心價格。入到去唔似新式服務，無人帶我哋位，見我哋望下望下，就好親切咁講「隨便坐啦」，原來係自己搵位⋯唔通服務真如評論寫嘅咁不濟？原來，服務就在你坐低一刻開始！一坐低，應有嘅服務都立即有，茶壺、洗茶壺、飯前花生，服務員全部隨時ready 服務你，點餐有禮貌，有耐性，仲有親切tim！睇得出係好積極嘅服務團隊，傳菜姐姐一出來，侍應立即上前上菜，感覺到員工們都在開心工作，笑容滿面、輕輕鬆鬆。他們的輕鬆自在源於熟練及合拍，他們會留意到我把湯飲完了，會問我要不要添、會提醒我小心夾餸時整污糟自己嘅闊衫袖等等。好似係好平常好應該有嘅餐廳服務，我亦講唔到有更特別嘅事令大家覺得「嘩！真係好好服務喎」。但全餐飯我係食得好溫暖、好親切，係出自真心嘅服務，係敬業樂業嘅服務，尊重自己嘅工作、尊重客人嘅需要。叔叔姐姐們，加油💪！已經搬出九龍幾年嘅我，會常常來喇！…查看更多

自友人婚後嫁入屯門區，我們幾位姊妹都未有時間登門拜訪，今天終於能夾到時間上門house warming了！是夜，她亦帶我們到這裡吃最有名的有米豬！由於訂位人數多，晚飯時間多分兩輪，6:00和8:00，我們吃6:00早一點，因大家都住港島東的。人婦難得細心地預訂了有米豬，我們亦散叫了幾款菜，以消解油膩。有米豬—先說主角，切之前侍應會先原隻捧上餐枱，讓我們看清楚原貌，亦好等我們相機吃先，這一點要讚一下細心！全隻有米豬確是十分大隻，相當有份量，同行7位女士都深知必定吃不完。過了十分鐘左右，切好的乳豬終於被捧到枱上，我們都「嘩」一聲！因看到米後份量更感倍增！一捧上餐桌上，已傳來陣陣香氣，大家都急不及待地或吃飯，或吃乳豬，或兩者齊吃！而我...暫與它無緣，但因飯香太重，我也忍不住拿了一點點嚐試，飯中加了芋頭一起炒，又吸了乳豬的油香，難怪香氣撲鼻，味道濃郁！蓮藕餅-自己不能評價，但其餘六位好友都對它讚不絕口，其中一人更不斷表示十分美味，相信亦是必吃之選！海皇雜菜煲-其實只想吃清一點的菜，也沒期望會有很多海鮮，但可能沒期望反倒有意外驚喜！海鮮有蝦、魷魚、珊瑚螃、蟹柳，質感爽口，為蔬菜帶來多一點鮮味，吃菜也不覺單調。菜心炒牛肉-這是例牌菜色，只怕牛肉炒得過老而韌，但這牛肉炒得嫩，吃下去依然軟腍，亦很野味，反而菜相對來說較為油膩。雜菌豆腐煲-一放上枱面，我們以為來錯，心想為什麼是白色的？原來湯底加入了椰奶，難怪一端上枱傳來陣陣奶香，令人食指大動，是我認為較特別的配搭。原本味道不突出的豆腐吸收了椰奶的精華，令豆腐吃起來倍感香滑，雜菌亦更野味！唯一小缺點是能看到湯面較多油，難怪越肥越好味！不一會兒已被我們掃清光！這頓飯雖然未全能盡吃，但珍惜是姊妹共聚的時光，但願再來時已釋放，享盡人間美味！…查看更多

在叔叔出發前，一家人當然也要吃頓飯。本來叔叔屬意離甜魔家不遠的德國佬餐廳，但一想到之後一年都是吃西餐，還是改點中菜好了；臨急在屯門利小館及藍地季季紅中作選擇，由於後者有位就再訪了這裡了~藍地這家季季紅風味酒家數年前來吃過，印象挺不錯，但之後前往其他的分店試食，水準參差得十分可怕.... 因此這晚到訪前，也有點擔心味道不復當年，還好這次再訪水準還是滿意有餘的~這晚來到媽媽要先餵妹妹，點菜交由爸爸負責；先來紅瑞乳香豬 (1/4隻)，皮算脆肉也嫩，最大特點是帶有點點豬躁味，吃不慣的嫲嫲略「腥」，喜歡這味的婆婆卻連吞幾件! 個人認為是不錯的。又重溫了蓮藕餅，這是進步了的一味，因為成品香脆熱辣上檯，同時沒多少多餘油分，調味亦不重，吃來香口同時清爽。這頓飯上囝囝沉沉睡了，夜晚回家後也用這個拌白飯，解決了他的晚餐~其實上回媽媽最喜歡、也最想回味的菜式是這冰淋醬燒骨，這次再吃仍然美味，除因豬仔骨肥瘦適中，口感豐腴、鬆化又熱暖，外面那層薄薄的微甜的醬汁，也令滋味更加豐富、香蜜迷人! 連吃三件才感滿足。叔叔十分喜歡吃菜，是晚點了兩個小菜之多，首先是菜芯炒牛肉，其實大家都喜歡菜芯多於牛肉，依媽媽看單點炒菜芯其實更為適合。不過相比肉類菜式，其實這炒菜更加的油呢!還有金銀蛋菠菜，不管是菠菜還是面層的金銀蛋都份量十足，又沒多餘油分，媽媽大愛，吃了超多的一味。爸爸又點了兩隻乳鴿，媽媽都有心動的，不過最後還是怕了它的收奶功效，一點也沒有品嚐了......最後是份量最巨的燒鵝半隻，水準不差的，皮香肉滑汁亦鮮，不過可能這頓實在太多肉類 (但季季紅就是主打肉類為主，它的魚及海鮮並不好吃!)，最後吃剩了不少，要打包滿滿的一盒帶走。加上六碗白飯，店方不知怎的主動取消了加一，這頓埋單不過$770，便宜得令人發笑，所以還是非常抵食也值得推介的。但，一定只是藍地本店，去了其他分店 (特別是沙田店....) 的不要抱怨甜魔媽媽喔! 最後，老土也要講：送你，祝福千串!…查看更多

屯門之旅尾聲，屯門之友安排我哋去參觀妙法寺，然後去季季紅藍地總店食風味午飯。由於係中午12:30，總店座無虛席，人頭湧湧，嚇死了小妹﹗幸好，訂左枱，佢哋安排我們坐在對面新裝修的舖位中的vip房中，超級開心﹗因為成間舖得我哋幾個，有一位超級好笑容的阿姐專人服待我哋，簡直係超爽。屯門食肆上菜速度極快，一叫菜，不足五分鐘就可上菜，抵讚﹗因人數少，故與馳名的蝦禾米乳香豬無緣，只淺嚐了1/4脆皮乳豬。嘩﹗果然係皮鬆香脆肉鮮滑嫩，脂粉比例適中，不肥膩且夠香夠脆。蓮藕餅炸得恰到好處﹗外面香脆，入面肉香夠juicy。若多點蓮藕，口感將會更佳。菠蘿雞粒炒飯好好味﹗飯粒粒粒分明，夠干身夠味道，又不會偏油偏鹹。加件乳豬及蓮藕餅嚟送飯，yummy yummy!蝴蝶腩豬肺頂菜膽湯簡直係極品抵食靚湯，足料火喉夠。乳白色湯水味濃清甜，朋友連白菜、豬肺等湯渣全都吃下，滴湯不剩。此外，我哋還叫了6款點心。坦白講，點心除左蟹皇干蒸燒賣妤味外，其餘點心質素屬一般貨色。蟹皇干蒸燒賣賣相吸引，啖啖爽口鮮味的豬肉蝦肉，就加橙色蟹子點綴吊味，料足餡靚，口感不俗。季季蝦餃皇可算是失敗之作，皮薄卻穿窿，餃中的湯汁早已流走了。筷子一夾餃皮和餡料就馬上分裂離析，蝦肉欠缺鮮味及較為乾身。北菰綿花雞豬皮頗多、雞得一少塊、蟹柳一條，味道偏淡。鴛鴦水晶飽有豆沙餡和奶黃餡，小妹只試左豆沙餡的水晶飽，水晶皮略厚、豆沙餡偏甜。千層馬拉糕熱辣辣，有蛋香，頗鬆軟。白灼生菜唔夠鮮嫩，有渣，又偏油。…查看更多

友儕飯局，當中有人提議到屯門藍地大街的「季季紅」試吃這裏"會飛、會走"的招牌菜大勝雞及乳香豬。其實對這酒樓響噹噹的名字早有所聞，但要我這四肢不勤的懶精由港島區搭車老遠跑到屯門來，實在有點為難，幸好友人自願充當柴可夫，那就卻之不恭了。藍地村距離屯門市中心約 5至10 分鐘車程，地方頗隔涉，雖然不算難找，但由於市區無直接車可到，只可轉乘輕鐵於藍地站下車。「季季紅」這間經典的乳豬酒樓向來都是藍地的飲食地標，再加上有電視台拍的飲食特輯推波助瀾，導致這裏經常滿座，幸而店子並無坐地起價，堅持不收加一，擺明酬謝一眾山長水遠到藍地揾食的食客。酒家對出有免費停車位，泊好車後，一行七人沿著藍地大街步行，細意感受街道旁邊帶著元朗流浮山小鎮風情的色彩，看來大家不一定要去台灣海角七號才可體會到這種平靜的自然生活。至於點菜的重任，就交由食友全權負責，不過其實到這等出名小店都不外乎吃那幾樣招牌菜，所以只要把那獨門燒乳豬、會飛會走大勝雞、甚麼冰梅骨等通通點上就一定錯不到那裏去了。豬肺頂蝴蝶腩燉菜膽 -- 朋友是出名的"湯痴"，每逢外出用膳，無論甚麼粟米紅蘿蔔湯、西洋菜陳腎湯、螺頭蜜瓜煲雞湯、白菜菜乾湯都要喝它三數碗才擺休，更何況是這裏出名的豬肺湯，我這視湯如命的友人便一口氣點上三大煲，其吸湯能力，不可謂不驚人。其實豬肺湯是一種頗受歡迎的湯水，不過處理就比較麻煩。豬肺是便宜的食品，煲上三小時已非常腍口，而且潤肺止咳，對肺弱易咳的人及煙多而茶水少的人都有很大益處，特別在天氣乾燥的季節就更加有療效。這裹的豬肺湯份外香濃，因大廚用上豬肺頂、蝴蝶腩來熬湯，且每天由早上 10am 熬到下午 3pm，足足 5 個小時，故此火候十足，不寒不燥，難怪友人話「飯可以不吃，湯卻不可不喝」了。炭燒乳豬 -- 這味農場炭燒豬，據聞廚子會挑選自家內地工場供應約3斤半至4斤重又不太肥的新鮮豬隻，先醃味、風乾及烤至7成熟，接柯打才燒至金黃全熟。師傅會以全炭火燒烹調方法，令乳豬的皮更香脆，肉汁更豐腴。這隻乳豬送上飯桌時，溫度仍算溫熱，而且由於這些豬比一般乳豬多養兩星期，所以除香脆外還多了一層薄肉，難怪吃起來皮薄香脆，肉質亦夠嫩滑，口感十分豐富，再加上酒樓所配的一隻帶有酒香的海鮮醬，令人感覺到酒家一份有心思的配搭。服務員更稱如果沒有預訂的話，每天未到 9pm 大多已售罄。會飛會走大勝雞 -- 另一招牌大勝雞，據聞這走地雞養足150日，師傅更以原味白切炮製以突顯雞的鮮味，所以吃起來雞肉味道濃郁但不覺肥膩，雞咬下還是很嫩口，果然如麗梅姐講「雞有雞味」，是一個不會在一般食肆找到的新鮮感。冰淋醬烤骨 -- 其中一食友是美式食物焚化爐，所以對這充滿美式 ribs 影子的醬烤骨讚口不絕，當然這醬烤骨沒有美式豬肋骨般入口即溶，一咬便骨肉分離，但總算肉質滑，口感酥香，而且每啖均滲透醒胃的酸甜味道，當中濃濃的話梅味，惹味非常，令人食慾大增，絕對是一眾食肉獸的不二之選。豉汁蒸大鱔 -- “鱔” 是香港人對鰻魚的俗稱，此品狀若蟠龍，將其切後蟠放在圓盤中，加豉汁蒸熟稱為豉汁蟠龍鱔，是粵廚傳統名菜。這裏的蒸大鱔肉質鮮甜嫩滑，味道香濃，鮮美而有豉汁之芳香，煞是滋味，席上各人品嘗過後，都讚賞不已。蓮藕餅 -- 出街食飯間中都會叫番碟家鄉蓮藕餅，不過一般食肆為求方便，大多只是將蓮藕刨絲再混上其他材料搓成圓形，有的甚至把蓮藕切片，再於兩片蓮藕中間夾上肉碎，這樣做出來的藕餅不但不正宗，更不會好吃。其實蓮藕餅正確做法應是將蓮藕鋤碎，再混入攪爛豬肉、葱粒、芫茜等材料搓成圓扁狀，再將兩面煎成金黃色，這樣做出來才有咬口。這裏的蓮藕餅雖然豬肉多蓮藕少，但豬肉夠鬆化，蓮藕爽口，況且煎得異常香口，加上外型超級豐滿，食一件已等同吃了半碗飯啊。椒鹽鮮魷 -- 其實椒鹽鮮魷要做得香脆，秘訣在於麵粉放多一點，油猛一些，炸魷魚時炸耐點，魷魚愈細隻愈薄肉，容易炸得香脆。這裏的椒鹽鮮魷做得夠乾身，上碟時熱辣辣，外脆內軟，漿粉夠薄，鮮魷新鮮彈牙，入口溫熱，不過椒鹽味不重，可能廚師想保留魷魚鮮味。這頓充滿圍村風味的晚飯，吃得各人都肚滿腸肥，價錢絕對超值，只是 $968, 更由好客的友人搶著結賬，謹在此謝過友人的盛情美意。其實季季紅在屯門市中心及沙田也有分店，可惜各食客的評語大多較負面，看來還是回到藍地去吃會比較安心。…查看更多

第1次到季季紅，係今年年頭啲事，印象中隻炭燒乳豬好食，其他菜式都係大碟又抵食啲，返到屋企同我個皇太后同家姐提及，佢地都好想試下，就襯母親節啦，可以滿足兩位母親嘛~1行6人，條長路遠黎到屯門藍地，目的只有一個，大家都係為左味炭燒乳豬，是夜精選有：豬肺菜膽湯，上枱果陣聞到好香啲菜乾湯，應該好足火喉，入口夠味，而且唔覺有味精，D菜膽係後加入個湯裡面啲，所以唔爛，仲好甜，連皇太后都話得呀~大勝雞，第1次去季季紅食飯已經有叫呢味，入口果陣個腦已經立即諗緊，點解響香港食雞……竟然有雞味啲? 二話不說再夾多件，再同Cobi爸講，佢都話隻雞好好味，一定係新鮮雞，夠香又夠滑，D雞皮仲好脆口…救命呀~個腦鬥爭左幾耐至可以唔食件雞皮呀，試問咁好啲質素，今次我地點會唔encore呀~乳豬燒鵝雙拼，本來叫左半隻燒乳豬，Cobi爸特然想食燒鵝，所以轉左做雙拼，上枱後大家都急不及待品嚐個乳豬，嘩!乳豬皮好薄，燒到又甘香鬆脆，脆皮下有層肥膏，不過唔多，肉質好嫩，果然名不虛傳。可惜今次得6個人，叫唔到個「蝦禾米釀乳豬」添；燒鵝個look得，入口就唔掂，肉韌!難聽D講句要用手扯先扯得開，好唔掂。冰淋醬烤骨，雖然已經叫左好多肉，不過呢個菜式響網上啲評價好好，所以今晚全家人都變左食肉家族添；外貌似金沙骨不過用左京都骨啲醬汁，入口好惹味，酸中帶甜；因為炸過，所以有層薄薄地啲粉漿響嚿排骨上面，層粉醬又扣住左D醬汁，個口感好酥，好脆，係一道有驚喜啲菜式。聽個待應介紹，個醬汁係用白鑊炒香啲糖，再加上醋而成啲，一唔留神，個醬汁就會好易燶，炒工唔錯。蓮藕餅係呢度推介之一，一個好家常啲小菜，其實好容易做，只要你肯花時間將所有啲材料切切剁剁；我食過兩個唔同啲做法，一個係將啲蓮藕刨成蓉，一個係切成粒，個人喜愛後者，有口感嘛，季季紅啲做法正合我意；講番味餸，蓮藕同豬肉啲比例唔係好平均，豬肉多蓮藕少，不過都食到蓮藕啲爽甜，好彩啲豬肉搞得夠鬆化，如果唔係就會好實，個餅亦煎到好香口，餅邊仲有少少燶燶地，又唔油，點埋個喼汁仲可以令到個餅冇咁肥膩添! 一碟有成8大件，真係明正言順啲「抵食夾大件」呀~金銀蛋莧菜，終於可以有味清清地啦~ 菜好嫩，而且冇唸過係咁大碟架，抵食!蝦醬炒通菜，蝦醬啲比例剛好，唔太咸，又夠鑊氣，不過油就多左少少啦~講完菜式啲質素就到講下個環境同服務，安排坐位非常差，明知果間房啲冷氣有問題仲安排入坐，D待應仲”昆”我地話部冷氣啱啱開，所以未涼啫~不過就越食越熱，Cobi爸就一路出汗一路食，我地追問下至話部冷氣壞左，真係火都黎呀! D待應見我地開始發脾氣就嗱嗱淋攞部風扇入黎，我地至舒服D咋…離哂譜!老實講，服務就麻麻地啦，但呢個價錢，算唔錯啦，好食得黎又要平又要正，想點啵!係坐位安排得好差啫。至於未食過炭燒乳豬啲，真係值得一試!太子永合隆啲炭燒豬，1條骨已經收你$70，咁你地話呢到係咪抵食好多呢~…查看更多

男友仔屋企人見我甚少去屯門飲茶, 所以特意帶我黎名人飯堂一試.十二點多黎到等位, 未算最多人既時間, 但都幾亂, 雖然話係攞飛等位, 其實攞左飛後都無地方企, 大家都見天氣熱塞左係酒樓入面, 地方已經細, 大家企晒係度已經無地方行了. 幸好只等了十幾分鐘就有位了. 一坐低, 原來係搭枱, 不過都無所謂, 有個伯伯無拎飛就埋黎擺位, 最後伙計都搞惦, 另一邊既食客先有位坐....先睇睇點心紙, 揀了幾款點心. 等位時已見到其他食客枱上的豉汁蒸鱔飯好吸引. 所以我地都唔執輸 另外再點了燒鵝燒肉飯同蓮藕餅.點心類:雞扎 - 足抖唔錯, 好新鮮, 熱辣辣.山竹牛肉 - 牛肉球幾大粒, 因為我唔太好, 所以無試豬腳彊 - 有D豬腳未入味, 因為攞點心時已見有D豬腳係岩岩放入去, 連色都未變. 只係伙計將佢再撈一撈令佢變色. 彊幾辣, 旦好硬, 雞蛋應該浸左好耐, 硬到幾乎咬唔入. 連旦黃都變左黑色.廚房類:燒鵝燒肉飯 - 燒鵝較肥, 但肉幾淋. 燒肉皮脆肉嫩蓮藕餅 - 份量好多, 且好大塊, 幾乎食一塊已經飽了. 爽口得黎淋淋地. 好香口. 男友仔話, 呢個蓮藕餅隔夜都一樣好味豉汁蒸鱔飯 - 份量又係好多, 咪以為佢午市會求其D, 估唔到誠意十足. 撈飯一流!個人認為點心類一般, 但廚房類係唔錯! 有機會可以一試晚飯! 仲有係, 幾抵食的茶樓!!PS: 差不多尾聲時, 發現牆上有大曱甴, 好驚.....…查看更多

一行五人, 由粉嶺出發去屯門藍地, 經過一輪尋覓, 終於搵到佢地個停車場, 原來就在妙法寺隔離既車房, 由於事前訂位已經通知要等我地到左先燒乳豬, 一入到面口未坐低, 已經有位姐姐走黎招呼問係咪上次黎食覺得隻豬唔夠熱, 咁當然就話係啦, 佢話冇問題, 你地坐定左我即刻叫師傅同你燒熱佢, 我覺得呢個服務真係好食物質素係唔差既, 除左我覺得隻豬有股騷味之後, 其他人都覺得好食, 真係皮脆, 少肥, 有肉, 而且真係上菜既時候係熱既, 我最鍾意食既係黃金蝦同埋蓮藕餅, 夠乾身, 脆口, 絲瓜平時我係唔鍾意食既, 但係是晚我都食左幾件, 不錯, 最少令我接受到絲瓜既味道, 湯亦都唔錯, 大家黎食飯既不妨叫佢地既湯, 雖然我地只係叫左其中一款, 但係咁啱隔離枱又叫左另一款, 朋友話聞到覺得好香喎, 我諗應該都唔錯, 雞皮的確係爽口, 雞肉都係實既, 我諗走地雞應該係咁啦, 而且冇乜肥, 如果想食滑滑既雞肉, 我諗應該就唔多啱食啦, 朋友仲叫左個炒飯外賣, 冇照到相啦, 但係應該唔錯, 而且向車度都聞到炒飯既香味, 下次去我地一定要試下....飯後仲有糖水送, 不過我就覺得略甜啦, 紅豆沙朋友話麻麻地, 我食西米露就覺得甜左少許啦, 食左咁多野, 計埋茶錢, 汽水同白飯, 埋單都係$761.00, 淨係原隻乳豬都$380.00啦, 我地仲要係將食淨既乳豬帶返屋企, 計落其實都幾抵食啦, 仲要免收加一添, 黎緊應該會黎試下飲早茶, 到時再黎報告…查看更多