海龍王餐廳

生日可免費到海洋公園，今年也來湊湊熱鬧，順道探探孿生熊貓「家姐」和「細佬」。午飯時間須在園內用膳，海龍王餐廳名字霸氣，於是便決定在此一試其水準。海龍王餐廳的賣點是從上而下觀看如大銀幕的水族館景，感覺與別不同。午市有套餐供應，時間雖然不緊迫，但也不想費神，因此套餐正好合適。💢羊肚菌花膠雞蓉羹雞蓉羹的賣相與想像的不同，味道與攤販售賣的碗仔翅有點相似，湯羹的材料豐富但卻很細碎，比較難品味個別食材的味道。💢菌王黑松露蝦球蝦球的塊頭頗大，口感爽彈，大概用的是雪貨罷，然而蝦味還是可以的，蝦球與雜菌雖然只是合成的關係，但也沒有違和感。💢紅酒燴澳洲牛面頰牛面頰的份量很大，而且燴得相當軟綿，醬汁的調味也恰到好處，要是菜式的溫度能再高一點便相當完美。💢上湯金柱泡時菜基本是家常的灼時菜，時菜是油麥菜，上湯的味道很清淡，灑上少許炸瑤柱碎旨在為青菜提升身價，對味道的影響不大。💢玉桂蘋果芭菲芭菲的玉桂味非常突出，加上原條雲呢拿的加持，整個甜品香氣十足，甜度也非常合香港人的要求。水果質素一般，亮點是種類比較多。餐廳的冷氣有點大，因此餐後的一杯熱茶令我們可多坐一會兒。離開公園的時候，清理口袋才發現園方有贈送給生日人仕一張八折的餐廳優惠券，可惜慣常大意，白白浪費了優惠。…查看更多

適逢生日一家三口去海洋公園玩返日，多年後再到海龍王餐廳用餐,餐廳都已經由西餐變左中餐。於網上訂座時，有提前要求希望坐近魚缸位置。可能因為平日中午，餐廳連一半入座率都冇，亦成功被安排要求位置，3個人安排坐一張8人長枱。兩個大人叫左兩份中式套餐：湯+主菜+蔬菜 +白飯+餐飲頭抽乾蔥鱸魚柳 ($390/set) 做到外脆內軟，全餐飯最好食！紅酒燴澳洲牛面頰（$410/set)食落無論質感同味道都似台式牛肉面既牛𦟌，呢個再淋少少。個底有紅蘿蔔墊底。湯羹，菜，甜品都係普通。可能最新去過迪士尼酒店都係食午市中餐，有比較有傷害。跟餐凍飲唔使加錢。服務方面：未落單前有位服務員送餐埋黎，即刻比一位疑似經理既男士喝止。服務員冇留意到我只係剛坐底故之然有問題，但經理又好似惡左d。落單時候有位服務員聽完一次我食咩之後，唔夠幾秒有另一個人埋黎問多我一次叫左d 咩，佢既覆單係錯左一半。食左一陣想搵服務員幫手影完合照，係舉極手都冇人，有兩個服務員/經理只係企近入口位置。最後到自己自拍完食左一陣有另一個女服務員係附近，終於成功請到佢幫我地影相，但佢講普通話，又唔太聽得明廣東話咁。結論係雖然事隔多年，但兩次到訪海龍皇餐廳後都係覺得餐廳係"食環境"，服務同味道都令人失望。…查看更多

一家人帶爺爺嚟海洋公園，想佢坐得舒服啲所以決定嚟海龍王餐廳食午餐。我哋預早一星期訂位，但嗰時成個公園嘅餐廳都已經full booking，於是當日正午我哋準時用Gulu 攞飛，最終喺晏晝兩點鐘入座。全靠侍應姐姐貼心安排，我地一行八人可以坐喺最近水族箱嘅兩張檯，欣賞各式各樣嘅海魚喺眼前來回追逐。我嗰檯四個人嗌咗三個套餐，每個套餐包湯、小菜、時蔬、甜品、白飯同飲品，加埋已經夠四個人食。我地另外加咗$15叫杯啤酒。而我地叫咗嘅三個小菜，包括紅酒燴和牛面頰、黑松露蝦球同醬燒鱸魚，賣相同味道都OK，以遊樂場黎講算唔錯。其中最推薦醬燒鱸魚，表面鬆脆而肉質依然鮮嫩，而且份量好足。其他食物黎講係玉桂蘋果芭菲幾有驚喜，除咗擺盤有隻企鵝仔幾趣緻外，食落唔止香甜亦有雪糕清涼口感。整體黎講，主題公園嘅餐廳一般都係快餐自助形式而且人山人海（尤其疫情期間海洋公園同迪士尼都唔係開晒全部餐廳），但喺呢度就可以坐定定等上菜，同時欣賞海洋風光，算係值回票價。而且到訪當日雖然係星期六，但公園各項機動遊戲，包括動感快車、熱帶激流、越礦飛車、滑浪飛船等都唔開，所以慶幸有喺水族館食呢餐，算係我地旅程嘅highlight。…查看更多