劉森記麵家 (桂林街)

個人都係鍾意去番舊店多D, 起碼冇咁多人... 之前食完腸粉就再呢食劉森記... 劉森記先係我既正餐吧!一坐底緊係先拎一大碗佢地免費既籮白.. 我自己好鍾意食酸籮白, 香港有得免費食籮白既我唸就只得一家了籮白酸度岩岩好, 好食再上既就係佢地既湯, 我覺得佢地冇落味精.. 鍾意呢度既湯比其它麵家既濃味D... 一家食店既好與壞就係由細緻野可以見到吧~主菜就係蝦子鵝腸撈... 佢地麵夠彈牙唔洗多講, 蝦子夠多唔會唔夠食..鵝腸好食..雖然唔可以求係新鮮鵝腸但我覺得幾好... 要話既就鵝腸冇咩味... . 順帶一提都唔知點解澳門賣所謂蝦子麵既可以咁貴.. 同呢度比劉森記既蝦子一定多過佢地果幾間幾倍... 免貴羅白湯蝦子鵝腸撈…查看更多

師傅都有好一段時間冇同好友食家"乜都放入窿"黎個單獨飯局, 無他嘅各有各忙, 加上每次同好友食家"乜都放入窿"嘅飯局, 一定唔止一間食店, 至少都有三間唔同嘅食店, 而師傅舊有嘅食評亦堆積如山, 遲遲未寫, 為免壓力太重, 所以就暫且抖一抖! 而家就等師傅重溫番三個幾月前嘅深水埗三食啦!話說好友食家"乜都放入窿"就好少黎深水埗搵食, 撞啱嗰日師傅就好想黎呢區試下間呢區頗出名嘅酸辣粉, 於是決定黎呢區食野啦! 出左地鐵站, 師傅同好友食家"乜都放入窿"邊行邊講, 講緊呢區有好多正野食之際, 細問之下先知呢間咁出名嘅食店好友食家"乜都放入窿"從來都未試過, 既然如此, 二話不說即刻入去!兩個人入到去兩個搵個位坐底後, 師傅就覺得有兩款食物係應該要試, 一款係蝦子, 另一款係黑栢葉, 最後商量左一陣就柯打左蝦子撈麵同埋黑栢葉蝦子撈麵! 等左一陣就有得食喇, 蝦子撈麵師傅就唔再多講, 皆因之前嘅食評已經講過, 反而今次係主力想講下黑栢葉, 皆因師傅都係第一次品嚐; 黑栢葉份量極多, 賣相甚靚, 冇漂染到嘅柏葉感覺更加新鮮同衛生, 放一件入口, 發覺黑栢葉非常爽口, 絕對唔韌, 唔需要點豉油亦唔覺淡口, 再加上旁邊嘅蝦子勁香, 真係好好味; 而麵質就維持一貫高水準, 爽口彈牙, 又冇咩鹼水味, 加上麵身夠乾, 口感真係正到冇得頂, 而家師傅諗起都想再食呀!總括黎講食物質素頗好, 環境地方就逼少少, 服務普普通通, 而價錢亦唔算貴, 廿幾蚊有咁高水準嘅麵, 絕對抵食! 好友食家"乜都放入窿"都邊吃邊讚, 亦證明師傅冇介紹錯, 食晒之後即刻埋單, 準備去另一個目的地! 笑臉一定會比, 而且有機會一定會再黎!…查看更多

尋日放左監, 師傅一條冷貢左出去深水埗, 遊遊蕩蕩漫無目的咁行! 行到咁上下, 忽然間覺得非常肚餓, 於是師傅就即刻諗下有咩好食, 本想食酸辣粉, 點知去到又幾多人, 於是靈機一觸, 就決定黎呢間食店, 皆因師傅都好耐冇黎過喇!入到去地方唔係好大, 求其搵個位坐底, 不過師傅發覺好多空中轟炸機, 非常擾攘! 算喇, 拿拿聲柯打野食, 食完即閃! 師傅本來諗住食蝦子撈麵, 不過見只係比多四蚊, 於是就揀左炸醬蝦子撈麵!炸醬蝦子撈麵未到, 個湯先上; 唔理咁多先飲為敬, 湯底熱辣郊而且味道濃郁, 有蝦味, 一d味精都冇, 飲完兩啖後, 已經好醒胃, 正; 跟住等多一陣炸醬蝦子撈麵都登場, 先講下個賣相, 炸醬放埋一旁, 而麵嘅上面有著勁多蝦子, 而麵嘅底裡亦有菜心伴著, 非常之好; 跟住再試下個麵先, 麵質就煙韌爽口, 一d鹼水味都冇, 好味到停唔到口, 師傅覺得淨係食麵都值回票價; 而蝦子就好加上炒得好香, 味道唔會過濃, 亦冇燶, 配埋麵一齊食, 勁正; 至於炸醬份量適中, 肉絲鬆軟, 不過就略嫌唔夠酸亦唔夠辣, 味道一般; 最後菜心嘅份量都算多, 亦算嫩綠鮮甜, 加上冇渣, 絕對收貨!總括黎講食物質素尚佳唔差, 環境地方就一般, 今次真係多左好多空中轟炸機, 未知是否受天氣影響? 服務亦算合格, 而價錢亦唔算貴, 炸醬蝦子撈麵都係廿八蚊, 如果淨係蝦子撈麵都係廿四, 都幾抵食! 師傅都有一段時間冇黎, 但感覺依舊, 所以笑臉一定有唔甩啦, 有機會一定會再黎, 全因物有所值嘛!…查看更多