藝廊咖啡室

最近酒店有個優惠給機場員工，有朋友送兩張優惠券給我試食。全buffet 很齊全。沙律吧有各式新鮮沙律菜及其他配料，例如紅菜頭、菠蘿、粟米、椂柚粒（很清新）等等。另外仲有煙三文魚、薯仔沙律、磨菇等等。食物夠新鮮，選擇算多。有凍海鮮，例如蝦、青口、硯，仲有壽司區和芝士區。賣相不錯，新鮮。熱盤方面有一般選擇，例如蒸蛋、春卷、蒸魚、紅酒燴牛尾、咖哩類等等。因為太多人在熱盤區搵食，所以沒有認真過去那邊取食物。另外有肉車、海南雞飯、日式拉麵，因為是廚師派發，感覺比較良好。甜品有movenpick 雪糕、窩夫、各式蛋糕、芝麻糊、麵包布丁之類。廚師𢳂雪糕要排長龍是常識吧。長者比較喜歡芝麻糊夠地道，而雪糕一定是年青人的主打。由於剛巧遇到有幾個本地旅行團ssss，餐廳充滿人流，食物補充都算快，但真的要用‘’搶‘’來形容取食物過程。比較斯文者便要多加考慮。幸好餐廳方面將團體坐位跟散客分開，尚算貼心。用優惠券價錢來到機場食buffet是可以接受的，但如果用正價或只有少量折扣，就不了。…查看更多

80日可以環遊世界，咁60日可以做啲咩呢？早前晌「富豪機場酒店」嘅「藝廊咖啡室」就推出咗一個「60日環球美食之旅」自助晚餐，顧名思義，去到9月10日前嘅兩個月，自助晚餐嘅主題就喺以環球美食為賣點。雖然（如無意外），無乜機會可以環遊到世界，但就可以嚐到環球美食，是夜，就同親友入嚟大擦番一餐，由頭食到尾，嚟一場毅力美食之旅，實行美味走天涯。據小弟所知，呢次嘅「環球」喺以8個國家為主題，包括：法國、意大利、德國、加拿大、智利、葡萄牙、越南及菲律賓，每星期輪流推出主題國家嘅精選菜式，分別有冷盤、熱食、甜品各3款主題菜，我哋呢晚，就遇上喺加拿大。由於「富豪機場酒店」嘅客人唔少都喺嚟自世界各地，所以，另一特色就喺遇正唔同國家嘅國慶日，就會額外加推當地嘅地道菜式，讓客人回味自己國家嘅味道，呢晚，就正正喺新加坡嘅國慶日。不過，就算唔喺主題菜式，佢哋自助餐本身所供應嘅菜式都唔少，而且，享用時間特長，由6:00pm去到10:00pm，絕對適合慢慢食、慢慢坐，以慢活態度去享用嘅自助晚餐。用餐區就分佈咗好幾個區域，裝修比較簡潔，且光猛企理，可能樓底唔高，所以，枱櫈嘅編排就唔會太密；加上今晚客人又唔算太多，座位嘅安排都較為鬆動。而食物區算喺集中晌餐廳嘅正中央，分割為唔同區域，以下就逐區逐區慢慢介紹有咩好嘢食。沙律吧一進入食物區，第一眼見到嘅就喺沙律吧、冷盤、凍海鮮。沙律吧嘅陣容唔差，目測所見，有5款沙律菜、前前後後有超過10款配料、5款醬汁及一啲橄欖油、黑醋，夠晒砌出一份豐富而清新嘅DIY田園沙律。如果你唔想煩嘅，再行過少少，足足有8款預製沙律，啱晒啲唔喜歡花時間搞咁多嘢嘅客人。款式包括：薯仔煙肉沙律、牛油果燒雞沙律、羽衣甘藍沙律、蘑菇沙律、意大利蕃茄沙律、新加坡芝麻蝦沙律（國慶日菜式）、白豆西芹沙律、粟米綠豆沙律配榛子。芝士拼盤走到沙律吧嘅盡頭，就喺芝士拼盤，雖然睇唔到有紙卡介紹有咩款式，但眼見就應該有4款：英國車打芝士、法國布利芝士、瑞士艾文頓芝士及荷蘭艾登芝士，仲有個圓蓋罩住，盡量保持衛生。可以配蔬菜條或克力架食，但個人建議就不妨配點麵包。麵包籃咁就不如順便介紹埋佢哋嘅麵包籃，位置就擺晌近咖啡機嗰邊，算喺食物區近尾嘅位置。麵包籃內有4款歐陸式麵包，即喺較有麥香，但質感會硬身少少，此外，上層櫃枱仲有啲麵包條同細細個嘅軟包，旁邊更有自動烘焙機，咁就可以食到熱辣辣嘅麵包啦。冷盤除咗晌啲沙律中間有煙三文魚之外，最吸引應該喺啲巴馬火腿、莎樂美及雜肉拼盤（凍肉腸），所以，一陣夾碟沙律都加多少少冷盤嘢襯托一下。老規矩，第一碟一定喺以沙律行先，再拼點冷盤食材，務求開開胃，增加食慾，強化一下戰鬥力。睇我碟沙律色彩繽紛，樣樣夾啲，喺咪好正呢？確實，沙律菜好爽脆，淋上意大利汁，酸香清爽，而其他預製好嘅沙律亦調校得味道唔錯，配上口感油潤嘅巴馬火腿，好滿意嘅「頭盤」。凍海鮮感覺就比預其失色咗少少，無生蠔或龍蝦之類嘅貴價海鮮，不過，仍有帝王蟹腳、麵包蟹、翡翠螺、青口、甜蝦、大蜆等多款，而且，全晚都不停有補充。既然凍海鮮嘅款式唔算話好多，一於就一碟過試齊咁多款，自行砌碟海鮮拼盤。長蟹腳幾多食，蟹肉鮮甜得嚟唔會太鹹；麵包蟹亦好好肉地，內裡蟹膏唔少，頗香腴；翡翠螺就貪佢肉質爽口，唧啲檸汁就仲好食；甜蝦一來夠大隻，二來口感夠彈牙，質素算唔差。魚生、壽司去到呢一組嘅枱尾，即喺沙律吧、冷盤、凍海鮮背後就喺魚生、壽司，以及一啲的骰嘅日式冷點，如凍蕃茄、豆腐，而魚生有三文魚、鯛魚、八爪魚及吞拿魚，貨色唔算突出，跟親友一齊試少少就算。中湯依晚中湯喺蘋果無花果燉豬肉，而燉湯一向喺搶手貨，食完兩道生冷嘢，喺時候飲個燉湯暖暖胃，個燉湯湯料十足，味道都唔錯，入口清甜又清潤。西湯而西湯喺甘筍薑汁雞湯，一身橙黃色嘅雞湯屬忌廉湯一類，不過，由於只影相，無飲過，就不作評論。熱盤去到中間另一組大長枱，就有十多款熱盤，有唔同地道特色，最討我歡心水就喺焗蠔、燒羊架呢兩道菜，此外，仲有肉骨荼（新加坡國慶菜）、香煎三文魚柳、里昂薯仔、燴雜菜、楊州炒飯、鮮菌扒小棠菜、南乳炆豬手、蒸扇貝……等等。烤肉另一邊廂，喺開放式廚房，長長嘅餐枱擺放多種熱食，先介紹喺烤肉，分別喺燒肉眼同燒豬脾，醬汁分別有黑椒汁、沙嗲汁同燒汁，再多配英國芥辣、法國芥辣。食肉獸嘅客人，相信都唔會錯過。泰國菜烤肉旁就輪到數款泰式食物，如泰式青木瓜沙律、泰式鳳爪沙律、巴東牛肉、香辣豬肉碎伴生菜、串燒、泰式蝦片……等等，喜歡泰國菜嘅朋友可以要少少嚟止吓癮。燒味檔燒味對我哋香港人唔陌生，尤其去飲茶，更會久唔久食到，故此吸引力喺麻麻。不過，就頗受外國客歡迎，始終佢都喺本土特色食物。反而，燒味檔嘅海南雞飯，就吸引唔少本地客喎，前枱仲備有辣椒醬、薑蓉、黑醬油，製作絕無欺場。印度咖喱咖喱亦喺佢哋嘅手本嘢，因為有印度藉廚師座鎮，一個個銅鍋擺放數款印度美食，計有：雞豆咖喱、咖喱魚、印度飯、印度薄餅、多款印度特色醬料，如薄荷醬、乳酪醬……等等。可惜無小弟喜愛嘅馬沙拉雞或天多尼烤雞。其他叫得其他，除因為唔知點幫佢分類，亦因為呢3款菜式就好隨意放晌一角，佢哋喺肉醬薯蓉、煙肉蒸蛋及焗芝士通粉，睇樣其實幾樣都唔錯架。喺時候上我嘅「主菜」，揀咗大部份肉類，話晒小弟都算算哋食肉獸，燒羊架、燒肉眼、巴東牛肉幾樣肉類都相當好食；焗蠔亦都不合，喺沙嗲始終擺成晚，效果無咁理想。即煮麵檔跟燒味檔一樣，本地人經常食魚蛋炒、車仔麵，就會覺得啲粉麵唔特別，但對外國客而言就完全變成另一回事。故此，目測所見，點粉麵嘅都喺外藉客居多，再者，個麵檔又設計得幾有地道風情。3款粉麵、12款配料可以自由配搭，但最特色喺3種湯底：越南牛肉湯、新加坡蝦湯、馬來西亞喇沙湯，以及8種調味用嘅配料，做到一絲不茍。其實都想試，不過，之前幾道菜食得過飽，又想留肚食甜品，故此，放棄心愛嘅喇沙湯麵。甜品喺意外地有咁多選擇，仲分開3個區域，夾夾埋埋超過30款。依家就等小弟逐區介紹，第一區已有10多款甜品，憑相片記錄，包括：加拿大冬甩、意大利芝士餅、糖果（專為小朋友而設）、焦糖燉蛋、朱古力慕絲、餡批、啫喱糖、馬卡龍、即製班戟、吉士咖吔多士、蘋果金寶及窩夫，喺咪淨喺呢張枱嘅甜點都夠晒你食呢？隔離另一張餐枱，除有啲生果外，仲有朱古力噴泉、夏日刨冰、紅豆沙、豆腐花，不過，幾樣嘢都唔喺我嘅心水。甜品嘅款式仲未完，晌雪糕櫃旁，仲有其他甜品，計有：朱古力芝士蛋糕、芒果忌廉蛋糕、木糠布甸、黑朱古力蛋糕卷、焦糖燉蛋、芒果布甸、忌廉脆筒、宇治綠茶紅豆慕絲、鮮果啫喱粒、草莓乳酪慕絲。喺咪無講錯呢，佢哋供應嘅甜品真喺超多。識我嘅朋友都知小弟都算喺甜品癮大，所以，先嚟一大碟甜品拼盤，隨心揀咗7款甜點，今次就唔逐樣評，但整體質素唔差喎，尤其件芒果忌廉蛋糕，芒果超清甜，芒果味濃，忌廉蛋糕柔滑軟綿；馬卡龍做得極有水準，有脆而煙韌嘅口感，滲出清幽綠茶味；朱古力冬甩無死甜，個甜甜圈煙韌有咬口。Movenpick雪糕壓軸就梗喺啲好嘢啦，簡直就好似成間Movenpick雪糕嘅Pop –Up店開咗晌度咁，唔止前後都打咗大大隻Movenpick字樣，雪糕櫃上嘅口味名牌，數一數，足足有17款之多，再望望雪糕櫃內數一數，堅有17款口味（其中士多啤梨口味喺重複咗）。小弟未食勻全港嘅自助餐，但食自助餐嘅經驗唔少，有得10款知名品牌嘅雪糕已經唔多，但有成17款口味嘅真喺第一次見。先嚟一小碗：瑞士朱古力、楓糖合桃、榛子，Movenpick雪糕本身軟滑而頗有奶香，而且，味道濃郁，3款口味都好有個性，尤其楓糖合桃，楓糖嗰陣甜味好清潤，合桃仍然喺脆口。再追加多一碗：檸檬青檸雪葩、熱情果芒果雪葩、焦糖，兩款雪葩志在清新一下味蕾，前者十分清爽，檸檬跟青檸嘅味道讓人感到好清新；後者則酸香中滲出芒果嘅清甜味，裡頭仲有少少果肉；焦糖一向喺小弟「飛弗」。其他，十幾款真喺好難取捨。火焰雪山我諗睇完以上甜品一環嘅分享，已經流晒口水，點知甜品環節嘅介紹仲未完，每晚不時有啲「期間限定」嘅特色甜點供應，一聽到侍應敲鐘，就知有好嘢出現。是夜就有懷舊嘅火焰雪山。大大個嘅「雪山」由廚房推出，淋上冧酒再點火，微微火光，再散發少少酒香，吸引唔少人出嚟圍觀。薄薄一片「火焰雪山」，外層嘅蛋白餅脆脆地，外圍包住軟綿嘅朱古力海綿蛋糕，內裡唔喺傳統嘅三色雪糕，而喺士多啤梨、薄荷碎朱古力及香桃，配搭又幾特別，整體味道唔錯。D24榴槤拿破崙更驚喜喺加推榴槤拿破崙，唔單止酥皮做得超有水準，酥香脆口，咬落咔咔聲，而且，裡面夾有吉士及D24榴槤果肉，仲要榴槤落得無手緊，爆晒餡，所以，非常好食。不過，唔知邊日會出，真喺可遇不可求呀！啡茶咖啡、奶茶、檸茶、檸水任飲任斟，仲有多款味道嘅川寧茶包，就算無果汁，都唔愁飲品無選擇。其實，佢哋都有鮮榨果汁及意大利San Pellegrino出品嘅果汁供應，不過，就喺額外收費嘅項目，故此，現場所見，飲嘅人就唔多。整體而言，食物嘅選擇唔少，而由於客源關係，加入唔少本土特色食物。當然，甜品一環就非常突出，除款式多，又有啲限定甜品，所提供嘅Movenpick雪糕真喺無可挑剔。加上地方夠大，服務又唔錯，仲可以趁機去埋東薈城行吓Outlet嘛。依家閒日星期一至五，自助晚餐做緊$468 + 10%（成人計），星期六、日及公眾假期就$498 + 10%（成人計），不過，用HSBC就有65折，折咗三百幾，絕對食得過！…查看更多

與相識多年的舊同學一家作短期聚會，由於其居住於青衣城一帶等緣故，所以就於商場內集合，卻是吃午飯的地點另有目標，今次就由主人親自駕車前往，到達了赤鱲角機場的富豪酒店，當中亦有一間藝廊咖啡室，固然亦有自助餐等物供應，亦由於舊同學是機場員工之緣故，所以這酒店間不少食肆，亦享用相關的折扣優惠。一生中已吃過多遍自助餐，相信大家的經驗只會更多，所以也無需詳談環境了，只覺面積於闊寬之餘，桌子間的距離也是恰到好處，配合明亮的環境，倒給人一份怡然舒適的感覺；重要的是有別於市場的各大旺區，還是未有吸納到國內的一眾遊客，場內除了少數東南亞裔的食客外，其餘的就剩回港客了，確實少了那份「壓迫感」。吃自助餐看似選擇眾多，歸納起來仍是那幾大類的食品，先以海鮮冷盤來說，場內當天供應了翡翠螺、青口、與及凍蝦三款，無疑於款式上稍為「蝕章」，根據嫂子之言，酒店內理應有龍蝦仔供應，既然當天不見，算我欠上了一點食緣。總算還是找到煙三魚及肝醬批等物，此外亦有數款cold cut，都是一些大路的凍肉片，較「名貴」的還是切了片的Salami，場內亦有數款芝士供應，多是一些較為淡身的款式，軟硬俱備。再看看沙律吧，約有九至十款的菜蔬可供選，只看菜蔬的質素，還是稱得上新鮮有餘的，配合四款特色的醬汁，只覺一切還是對辦。再將視線移過隔鄰，亦有幾款東南亞風味的醃製冷盤，分別以柚子及南瓜為主，亦有長通粉沙律等物。奉上了食物的特寫照，只覺海鮮的質素還算不俗，就是捨棄了優質的藍貝Blue Mussels， 降格為普通的青口，只顧著量多這個因素，無疑也是一種「浪費」。看煙三文魚的肉質也是肥胦，恰好的鹹度亦能吊起了食慾，配合清新開胃的沙律，算是開了一個不俗的勢頭。吃了一輪冷吃之後，循例也想喝上一碗熱湯暖暖胃子，分別有中式的粉葛湯、與及西式的大蒜薯蓉湯可供選擇。最後只舀了半碗白湯，入口下除了Creamy之外，當中於濃厚的薯香之中，亦帶上一股不輕的蒜味，再用來配上餐包，味道可真不俗。來到日本區方面，只覺這所謂的壽司吧，只得三款作選擇，挾了一件蟹柳壽司，再加上一件加州卷，只覺入口之下.......飯粒偏硬之餘，飯內半點醋味也是欠奉，再吃下去之時，稍為大力一點，已是散了開來，相信優劣已是不明而喻。還是來碗蕎麥麵較為穩當得多，其實也只是普通貨色，勝在加入了冷麵汁、蛋絲及蔥花等點綴味後，這麵條於爽口之餘，也真多了一點兒的味道。來到了烤肉區域，為何連基本的燒牛肉也欠奉，只得半隻火雞，亦已初切得肢離破碎，隨意地拿了兩大件，沒有連皮之下，只覺肉質偏向於乾瘦，如果沒有燒汁及金巴利醬的幫助，也真的很難完成下去，而沒有「釀餡」的烤火雞，亦是一隻不太達標的火雞。再將視線移到隔離的意粉吧，只見約有五款麵類，都是那些長通粉、螺絲粉、蝴蝶粉、意粉及通心粉之類，也隨意點了一些長通粉，此外再加些火腿、Bacon、蒜蓉、磨菇等，再用鮮茄醬炒之.......至於這個蕃茄醬炒長通粉，吃下去的味道尚算可以，炒得熱騰之餘，期間香氣也是撲鼻而來，略嫌蕃茄醬酸了一點，但入口下的長通粉還是帶點嚼頭，整體還是可堪一嚐。來到初大部份人忽略的熱盤區，這裡約有十款上下之數量，分別有西式的焗薯及煮雜菜，下面的意大利紅酒炆鴨算是有點特色，不過拿上手時已是剩下小半了。另有意式蕃茄醬丸子與及牛油煎龍脷柳兩項，味道倒算中規中矩。再來上一條清蒸紅鮋，論及肉質與鮮味來說，還是弄出了一點味道，再拿多一隻煮青口，乃就完成熱盤區的部份。場內亦供應著即焗的Pizza，味道主要以芝士及蕃茄醬為主，看批底雖未算太薄，總算入口下仍是脆身有餘，此外亦見到吃印度菜常見的薄脆........來到印度專區，亦找到了牛油煮咖喱雞及印度黃飯等，這裡的咖喱雞雖未算辛辣惹味，總算是來得香濃，再舀上一口混入黃薑粉的印度米，還是過了一點印度癮；卻是未見到Nann Bread供應，始終有點遺憾........看來說得太多了，順道奉上一些取來食物的特寫照。還見到泰式專區，找到的分別有泰式的紅咖喱牛肉、冬蔭宮汁煮烏頭，與及泰式雜菜之類，當然還是可以找到大大鍋的冬蔭宮湯。因為主菜的胃納接近見頂的關係，所以也沒有嚐到冬蔭宮湯，至於烏頭及牛肉，也只屬不過不失，同場還有幾隻泰式烤雞翼，也只屬普通而已。其實印度及泰國等南亞風味，不免有重叠的地方，倒不如集中火力，主攻一項好多。來到了甜品時間，以往的自助餐經驗當中，多是將蛋榚陳列於公開位置，任由食客給予提取，倒是第一次遇見這種情況，將所有的餅食及布甸等物，一併放入餅櫃之內，想吃甚麼款式的話，就勞煩職員拿來給你........當日也無心戀戰，只吃了士多啤梨慕絲、朱古力芝士餅、與及銅鑼燒三項，平心而論，整體味道還是不俗的。來個最後一擊，既然有人弄製法式班戟，也就點了一份，只見年輕的女甜品師，將粉漿煎成薄薄的一片，在摺好之後，再鋪上橙片及香橙糖漿上去，同場更有多款的雪榚，應屬於Gelato之類，乃就來了三球........無論是色、香、味的層面，這個班戟配雪榚的組合，都給予令人驚喜的感覺，再用來配送咖啡，可謂接近完美，最後雖然還有豆腐花及紅豆沙可供享用，因為實在太飽的關係，看來是時候鳴金收兵了。由於舊同學屬於機場員工的緣故，每人折算起來，也只約一百四十元而已，算起來認真實惠。可惜論到選擇方面，也真是有點乏善足陳，個別味道還是不俗，其餘倒是平平無奇，據主人家所言，也可能是轉了餐牌的緣故，比起平面上選擇的花多眼亂，這裡明顯是比了下去，總算見識了機場一帶的飲食風貌，同時亦多謝今餐由舊同學所請客。陵之微調：平評分(以10分為滿分)：味道 6.5 環境 8 服務 7 衛生 7 抵食 8用餐於二零一四年二月八日正午 …查看更多