尚廚

長輩喜歡吃自助餐，因為不怎麼吃肉。自助餐食物種類選擇多，容易遷就不同飲食習慣的各人。餐廳有很多座位，成人正價$348，網上訂座或以會員卡結賬，均有不同折扣優惠，雖然自助餐的價格相宜，但人流稀少，入座率不到一半。自助餐的指定動作便是先吃魚生、冷海鮮和沙律作為頭盤。魚生和海鮮的種類屬大路貨色，鮮度也算合格，作為午餐非常足夠了。熱盤與主食也有不少，例如燒牛肉、燒味和即煮粉麪等，食物的質素中規中矩，以價錢論質素，也沒有什麼可以投訴的了。甜品枱七彩繽紛，選擇非常多，只是中午較少吃甜品，幸好餐廳也明白這一點，把甜品的份量做得很迷你，讓客人可以多嘗試不同的款式。一杯簡單的茶或咖啡便能為餐後的閑談提供輕鬆的觀感。———————————————————————使用優惠：以 Afiniti 卡結賬，其中一位食客可以免費。…查看更多

約朋友出街食冇咩諗法食乜，見到網上平台buffet買一送一幾抵，list出黎嘅野食都唔差，可以由6點半食到尾，可以傾計傾耐啲，一於試下！6點半前就提早放人入場，不過大家都守規矩6點半先開始夾野食😂俾我哋嘅枱係邊邊位，位置鬆動坐得舒服，唔錯。職員收碟fill水都快手，抵讚。野食方面熱葷款式都多，麻麻生冷野嘅朋友都有選擇～樣子都好精美～食落就不過不失中間出過一次芝士龍蝦，芝士味香濃～熱辣辣幾正～呢係甲羅燒係有啲驚喜！每枱有個小爐，俾你係出面攞甲羅燒番黎燒～每隻蟹蓋入面都有多多蟹膏🤭好邪惡生蠔估唔到算大隻！都新鮮。職員拆殼係耐少少，不過有用心洗乾淨係要讚嘅～同埋都比拆曬放係到衛生刺身正常發揮！夠肥美🤭煮番碗菜清一清，職員好熱情傾幾句～又加到大大碗😂甜品意外地多款式🤩睇落都吸引，冇影曬，但個session係放左幾張枱。Haagen dazs俾到8款味都少見，仲要有俾特別味～柚子芝士好食！抹茶就一向係最愛～冇影到而又特別鐘意嘅有即炸西班牙油炸鬼🤭整體野食、服務、環境、加上呢個價錢，同埋餐飲任飲！已經係性價比不俗可以同朋友黎坐下食下嘅一餐…查看更多

由於疫情關係，仍未出外旅行嘅機會，除咗行吓山、郊遊吓，「宅渡假」就成為另一放鬆心靈選項。之前好幾次「宅渡假」都喺揀晌新界區或離島區，而今次就揀咗入嚟將軍澳嘅「九龍東智選假日酒店」，整個套票包入住當日自助午餐、標準客房、免費借用單車及翌日自助早餐（$1,100 + 10%），都算抵玩。不過，雖然入住喺「假日酒店」，但午餐、早餐都喺晌對面「九龍東皇冠假日酒店」嘅「尚廚」餐廳享用，皆因「假日」本身喺無餐廳。酒店正正位處「將軍澳」站上蓋，黐住「PopCorn」個大商場，位置就非常便利。作為酒店食自助餐嘅地方，一般個場都幾大，呢度樓底都幾夠高，一邊又喺落地大玻璃窗，對住商場平台，所以，感覺都幾唔錯。而最估唔到，今日喺星期五，即喺閒日，入座率目測都應該有9乘，可見大家都要靠食餐自助餐嚟舒緩吓抗疫疲勞。 我哋原本喺被安排住晌裡面近食物枱嘅位置，雖然，枱與枱之間都有啲高身嘅透明膠板隔住，但始終都多人，老婆就想食得安心少少，所以，要求坐出「門口」位得唔得，相信呢組位置喺以前客滿時，想多做幾組客人而設，依家就啱晒我哋，得幾個人同我哋諗法一樣坐出嚟。餐廳有另一個連住平台入口，基本上，喺唔多人行過呢個位置。 嚴格嚟講，個自助午餐喺無咩主題，不過，睇門口棟咗個價錢牌，叫「蠔得喜」自助午餐，賣點喺有生蠔供應囉。平日嘅原價要$328 + 10%，如網上訂可以去到75折，實價$280，晌呢個時勢，都算抵食。整個場地嘅格局，都算幾歸一，以正門入口計，靠右喺甜品區，然後靠左一直走到尾就喺各項食物區，唔會東一忽，西一忽。飲品因為就近晌門口，先介紹一下先。基本上，一邊喺凍茶、凍啡、果茶同檸檬特飲，而另邊就喺熱茶、咖啡機，都喺啲大路嘢咁啦，任斟任飲，喺咁上下架啦。如果想飲番杯，餐廳亦提供紅白餐酒，但就需另外收費。 沙律自助沙律吧唔算喺好大陣容，有數款沙律菜，十零款配料，幾款醬汁，以及少少預製好嘅沙律，但亦有亮點，就喺標明用上水耕菜，唔需要使用農葯，自然更健康，質素亦更穩定，當然，成本亦會高啲。 凍肉盤、芝士盤晌沙律吧中，就有少少雜綿凍肉盤、挪威三文魚，喺唔少自助餐必見嘅冷盤嘢，小弟一向用嚟襯沙律食；下面就放有芝士盤、乾果、水餅，少有淨食，大多數都夾吓啲沙律、頭盤一齊。 刺身、壽司、和食本身都喜歡食刺身、壽司，不過，平常食自助餐就好少揀，因為覺得大多數都喺普通嘢，但點都要講兩句，有冷麵、雜綿壽司同4款刺身，款式就唔多，卻喺唔少港人嘅喜好。 介紹完上述幾個大類，就嚟一份超級頭盤，樣樣執啲，睇見都好豐富啦，除沙律菜外，加烤南瓜、阿枝竹、煙三文、凍切肉、芝士、刺身、橄欖、粟米粒、藜麥、乾果……等等，淋上油醋，的確幾酸香醒胃，清爽怡人，開開胃等陣可以大開殺戒食盡啲。餐湯、麵包自助餐就一定會提供中湯、西湯，前者有蓮藕煲唐排，後者就喺蘑菇忌廉湯，兩款都唔喺咩特別嘢，不過，食完一輪頭盤凍嘢，都會飲少少湯暖番個胃。而麵包無放晌餐湯旁，反而晌甜品區嗰邊，因為嗰邊有個暖櫃擺甜點，正好烘熱住啲包。小弟就揀西湯，雖然只不過喺蘑菇忌廉湯，但真材實料，好濃菌香，又夠滑溜，而襯個湯，除拎咗一小個歐陸麥包，仲加多件迷你葡撻同蘋果卷，個包煙韌有麥香，搽上少少牛油都好好食，皆因喺「暖笠笠」，而葡撻同蘋果卷都正喎，尤其後者，捲住好多蘋果肉，好清甜。海鮮吧依家生蠔唔再喺自助餐必然供應嘅食物，太多基於食衛安全去考慮，而呢度就以生蠔作為賣點，所有生蠔都喺即開。此外，海鮮類仲有黃金螺、青口、凍甜蝦、大蜆，唔算多款，但自助午餐而言，算喺好OK。 啲生蠔每次限攞兩隻，對我嚟講真喺無乜所謂，反正我都喺少試一下。樣樣海鮮要啲，再搭啲生果，少有咁樣配搭，但感覺幾清爽，再者，啲海鮮質素都OK，生蠔厚肉爽口，帶濃濃海水鹹鮮味。 熱食、即煮檔跟住輪到介紹熱盤呢個大片區啦，先一口氣介紹晒有啲咩食，包括：土耳其烤肉卡巴、即煮粉麵、點心、燒西冷、中西式熱盤、海鮮生滾粥檔、燒味……等等，雖然無咩亮點嘢，但以自助午餐計，陣容都算豐富啦。 老婆就有試吓啲粥，我就留肚掃甜品，所以，粉麵、粥品、點心、燒味呢啲常食到嘅就無要，不過，執吓執吓都砌到一大碟「主菜」，有燒西冷、秋刀魚、烤豬肋骨、餃子、卡巴同啲蔬菜，幾款肉都唔錯，西冷軟腍富肉香，秋刀魚同餃子喺老婆推介，而卡巴唧上大量牛油果醬，老婆見到都搶住試，加上啲烤肉好惹味，又熱焫焫。 甜品近入門口位就喺甜品區，分兩組位置放滿中西式甜品、雪糕，而且，睇得出有刻意嘅佈置，感覺更吸引。無影低啲甜品名，但從影低嘅相，有16、17款左右，款款都精緻的骰，又多元化。 兜咗一圈，鎖定晒心水目標，就揀咗芒果布甸、意式草莓奶凍、迷你鮮果撻、芒果拿破崙、紅豆綠茶芝士蛋糕、意大利芝士蛋糕、榛子朱古力蛋糕及熱情果慕絲蛋糕共8款，綜合而言，質素比預期好喎，布甸、奶凍做得滑溜，拿破崙夠酥脆芝士餅吊出鹹香味，慕絲蛋糕口感柔滑，滿足。老婆都鍾意食甜品，但胃納有限，通知就黐我嘅甜品拼盤樣樣試半口，反而，佢自己就會攞碗豆腐花食，因為，佢一向鍾情豆製品，佢話個豆腐花唔錯，好夠滑溜，有豆香。Häagen-Dazs雪糕甜品中，有品牌嘅雪糕亦喺唔少大酒店自助餐嘅必然選項，一共有6款口味供應，包括焦糖脆餅、芒果、比利時朱古力、抹茶、曲奇雲呢嗱同士多啤梨，有專人負責服務，但小弟就鍾意自己落手，因為會砌得靚仔啲。 因為見個暖櫃有啲雞蛋仔，所以，就雪糕配雞蛋仔，不過，可能睇相就睇唔到啲雞蛋仔。焦糖脆餅、芒果、比利時朱古力雪糕喺小弟心水，加多球抹茶，又去朱古力噴泉嗰邊加啲朱古力漿。HD雪糕就唔使多講，質素唔差得去邊，夾雞蛋仔食，過足癮啦。今次兩日一夜之旅，安排好晒各項行程，朝早已去咗一轉「鯉魚門石礦場」影吓相，勞動吓，所以，作戰狀態幾好，掃咗好多碟嘢，之後上房抖一抖，然後再借單車踩落海濱睇睇日落，不知幾寫意呀！…查看更多