【全球首間】荃灣DONKI迴轉壽司店29/10開幕 壽司$12起 必食吞拿魚拼盤
2021-10-15

DON DON DONKI嘅貨品包羅萬有,但近期熱話一定係佢哋即將開幕、全球第一間自家品牌迴轉壽司餐廳!店舖喺DONKI荃灣店Food Court旁邊,以新鮮食材、上等壽司飯同壽司醋製作約90款壽司。

店內設有卡座

魚缸內有多款活海產

餐廳以「日本魚市場與海底世界」為主題,更設有魚缸保存多款活海產,畀你品嚐最新鮮嘅壽司。

選用北海道七星米

壽司飯同壽司醋係壽司嘅靈魂之一!餐廳選用有良好光澤、黏性同甜度適中嘅上等北海道七星米原米,再自家研磨。而壽司醋則混合純米大吟釀同2種紅醋,再配上用北海道利尻昆布加鹿兒島縣嘅鰹節煮成嘅高湯,製成味道適中嘅壽司醋飯。

壽司有4類收費

壽司$12起,而最貴係$37,按碟嘅顏色分成4類收費,而開飯仔喺每類收費都有唔同嘅精選推介。


黑色碟($37)


吞拿魚拼盤

香港人大愛嘅拖羅有拼盤款式,畀你一次過品嚐大拖羅、中拖羅同赤身。而選用嘅藍鰭吞拿魚喺克羅地亞用3年時間天然海洋養殖,油香十足,而且肉質彈滑。

金色碟($27)

日本產鯛魚

日本產鯛魚係當造款式,魚肉爽口鮮味,CP值幾高。

原條穴子

原條穴子係其中一款令人大滿足嘅款式,用長過手掌嘅穴子包住壽司飯,要分幾啖先食完。

紅色碟($17)

左:三文魚拖羅|右:油甘魚

左:日本帆立貝|右:松葉蟹肉

$17嘅價位都有三文魚拖羅、松葉蟹肉日本帆立貝同日本油甘魚等高質選擇。其中三文魚由挪威冰鮮直運到港;而油甘魚則喺愛媛縣較平靜嘅海港養殖2年,所以佢嘅飼料都經過精心計算,以控制其油分同卡路里含量。

灰綠色碟($12)

左:蟹味噌|右:火灸香蔥赤海老

最平嘅灰綠色碟壽司款式大路啲,其中日本產池魚、蟹味噌同火灸香蔥赤海老都係唔錯嘅選擇。

外賣壽司套餐($79起)

吞拿魚套餐($200)

三文魚套餐($90)

1人份壽司套餐($120)

呢度另有外賣壽司套餐,有1-4人嘅分量,亦有配合香港人口味嘅吞拿魚套餐同三文魚套餐,當中包含以下嘅壽司款式:
吞拿魚套餐:包含黑色碟吞拿魚拼盤嘅款式,有大吞拿魚腩5件、中吞拿魚腩3件同赤身2件。
三文魚套餐:三文魚腩2件、三文魚2件、火炙明太子三文魚2件、火炙照燒三文魚2件同花之戀2件。
1人份壽司套餐:大吞拿魚腩、鯛魚、三文魚、墨魚、帆立貝、赤貝、赤海老同鮭魚籽壽司各1件,而2人前就係double分量,如此類推。

兒童壽司套餐($79)

而兒童壽司套餐有三文魚手鞠壽司、甘海老手鞠壽司、吞拿魚沙律軍艦壽司、海鮮沙律軍艦壽司、香蔥吞拿魚腩軍艦壽司、芝士粟米軍艦壽司、腐皮壽司同鰻魚壽司各1件同蟹柳玉子手卷4件。


鮮選壽司 海之戀店 
地址:荃灣大河道100號海之戀商場2樓2001號舖


文:Cathy.C
相、片:Wilfred


關鍵字
DONKI
壽司
迴轉壽司
刺身
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2021生日優惠】持續更新! 11月壽星免費嘆自助晚餐/燒烤/甜品
2021-11-02
【隨時更新】零食速報 每周新款零食、酒品點評
4天前
10月份好評餐廳十強
2021-11-04
【2021聖誕】美食多籮籮!4大聖誕市集逐個睇
2021-11-15
【2021聖誕】甜蜜蜜冬日!6大聖誕節下午茶精選
7天前