日本超人氣和牛燒肉Wagyumafia嘅副線品牌Yakinikumafia早前正式登陸香港，亦係餐廳除東京總店外嘅首間海外分店！餐廳所用嘅和牛都係經專人精挑細選過，香港亦係唯一一個獲創辦人濱田壽人肯定可以將成隻牛出口嘅城市，所以食客就可以品嚐到稀有嘅和牛部位。最近餐廳新推出$980尾崎和牛Omakase套餐，包括六款較稀有和牛部位，仲有前菜、炒飯、沙律及甜品，以呢個價錢嚟講絕對抵食！
因為創辦人剛開始事業時經常到訪哥本哈根，所以Yakinikumafia香港以坐落於哥本哈根嘅卡斯特魯普國際機場作主題，對於最近去唔到旅行嘅香港人嚟講，都係一種望梅止渴嘅新體驗。
尾崎和牛Omakase套餐($980)
Omakase套餐包括六款較稀有嘅和牛部位，仲有前菜、尾崎和牛炒飯、胡麻沙律、尾崎和牛咖哩飯及北海道牛奶軟雪糕。大廚會根據當日嘅和牛嚟決定供應部位，而且絕對唔會為和牛預先調味，每個部位都會根據特性配上唔同醬汁或配料食，令客人感受到唔同和牛部位嘅優點。
每次上肉時，店員都會以特定姿勢及全體員工講一句口號，為用餐增添不少趣味。
前菜係枝豆及和牛肉骨湯，後者將神戶和牛及尾崎牛骨清燉最少24小時至湯呈乳白色， 加入日式高湯令層次更豐富。
和牛呈上次序會由油花較少嘅開始，上牛肩胛肉Bolar Blade (左)呢個部位活動較多嘅關係，較有咬口，每邊燒15秒再配上清新嘅長野縣芥末食就最啱。而牛肋條 Rib Finger(右)位於肉眼同肋骨之間嘅部分，肉味濃郁，建議第一邊燒10秒，另一邊燒5秒，配搭柚子大根蓉享用。
而每兩款肉中間都會呈上沙律或飯等平衡大家嘅味蕾。胡麻沙拉將4-5種唔同蔬菜如生菜、細香蔥、羽衣甘藍、芝麻菜及西洋菜等拌上芝麻籽、芝麻油、米醋、醬油及Meurine(一款味道較濃嘅甜清酒)，清新開胃。
同樣都係屬於肩胛位嘅Blade Cap(左)，呢款肉紋理同油花恰到好處，建議每邊燒10秒，搭配蒜片一齊食。肩里脊內側肉Chuck Flap(右)係肩胛骨後方部分，係非常罕見嘅切面，每隻和牛大概只可以切割到兩公斤，雪花紋理及油脂較多，建議每邊均燒20秒，同招牌「Big Eye」燒烤醬及生蛋黃一齊食。
用尾崎和牛牛脂及蒜片炒出嚟嘅和牛炒飯，味道香濃之外牛味仲特別重。
嚟到大家最期待，油脂最豐富嘅兩款！肩板腱 Chuck Eye(右) 係位於肩膀到前腿上部之間嘅部位，肌肉發達且雪花部份較多，味道濃郁。而肩胛板腱肉 Top Blade(左)以擁有「最佳紋理」嘅和牛部位而聞名，每隻和牛只切割到三至四公斤肩里脊內側肉，口感嫩滑油花超豐富，入口即浴。因為油花較重嘅關係，兩款都建議第一邊先燒25秒令牛肉帶焦香，然後另一邊燒5秒便可同與招牌辣醬及柚子辣醬食。
食晒牛肉後會上埋一小碗嘅和牛咖哩飯，以尾崎和牛肉醬配搭一系列香料，包括小茴香、薑黃、肉桂、印度香料及荳蔻，仲有蘿蔔、番茄、 山椒粉及辣醬以加入麻辣風味。和牛咖哩配上日本越光米，烹煮過重無添加水，所以香氣特別濃！最後以用北海道牛奶自家新鮮製成嘅軟雪糕作結尾！
地址: 上環荷李活道233號荷李活商業中心2樓202號舖
文: Yanica
相、片: Tom Li