Taste of Hong Kong 美食節 2019 場內美食率先試及活動預告
2019-03-12

各位為食貓,聽唔聽到召喚?年度大型美食節Taste of Hong Kong又嚟喇,唔經唔覺今年已經係第4年。規模比以往更大,參與嘅餐廳更多。而 OpenRice作為大會官方媒體合作夥伴,當然就會率先同大家預覽場內美食啦~

今年活動定於3月21-24日,喺中環海濱活動空間舉行,有近四分三嘅參與餐廳都係首次登場㗎,每間餐廳都會特地為今次活動而設計一款會場限定菜式,即刻同大家睇睇其中幾間先~

地道希臘菜  Artemis and Apollo

對於希臘嘅藍與白,可能係好多人心目中嘅旅遊天堂。未去到希臘之前,都可以食住希臘菜先嘅。呢間餐廳主力提供多款希臘菜式,其中菠菜芝士批更加係得呢個活動先有得食。餐廳每日新鮮炮製黃金千層酥皮,夾住菠菜同羊奶芝士,酥脆內軟,仲有啲微辣添。

希臘鹹鯡魚子醬可以配埋pita bread一齊食,大廚喺鯡魚子醬中加入檸檬汁、紅椒粉等,味帶微酸,幾開胃啊。

香烤豬肉串配香蒜乳酪醬則係以炭火烤燒豬肉,使之帶有煙燻味,連埋洋蔥等配菜夾入薄餅,搽埋酸中帶辣嘅香蒜乳酪醬,好鬼香口。

而塞普勒斯沙律亦富當地特色,材料包括小麥、香草、蕃茄、香蒜紅蔥乳酪同石榴籽,食落口感豐富,小清新。

罕有中東菜  Francis

香港唔多地方食到中東菜,想試嘅話就要趁住今次活動機會,到訪呢間餐廳嘅檔位喇。會場限定菜式:烤牛肉番茄中東包嘅香料味超濃郁,好係中東地區嘅感覺。

Te Mana羊架入口軟腍,帶有陣陣羶香,配埋香橙醬、乳酪同芫荽,令到整體嘅層次感更豐富。

以色列最出名嘅嘢食,一定有鷹嘴豆份!鷹嘴豆蓉配中東芝麻醬再搽埋pita bread咁食,完全係中東風味啊,但啱唔啱口味就見仁見智喇。

最後仲可以試埋中東傳統甜品Knafeh,係以炸麵粉條包住鹹芝士喺中間,係幾有特色嘅,想試下新奇嘢嘅朋友可以一戰。

特色歐國菜    Bibo Silencio ✕ The Ocean

呢幾間西餐廳聯乘合作,提供幾款特色歐國菜式,首推鴿肉野米配墨汁海苔脆片、豬肉凍、鮮蠔忌廉汁係會場限定菜式,塊炸紫菜超脆,而且好搶味。薄身嘅鴿肉底下,暗藏咗野生米飯同豬頭肉,配埋用新鮮蠔製成嘅忌廉汁,香脆可口,用手拎住食先至夠滋味。呢道菜最特別嘅地方仲係由六手聯乘合作製啊!

香煎法國小龍蝦配紅菜頭醬及法式黑血腸。小龍蝦相當鮮甜,仲要拆晒殼起晒肉,方便進食。

呢粒圓波波係吉列和牛釀鵝肝嚟,內有乾坤啊!和牛有技巧地唔會炸到全熟,保留到肉汁之餘亦有香脆口感,食到中間仲有淡淡嘅鵝肝醬香。

甜品方面,蛋白杏仁餅呢款法式甜品,黑麻麻嘅竹炭餅底夾住嘅係充滿冰感嘅士多啤梨,同埋雲呢嗱雪糕,不過咪話開飯仔唔提醒你,超甜啊。

特色粵菜    海景軒

呢間尖沙咀酒店級嘅中菜廳,一向都有創作多款特色點心。今次就帶咗幾款招牌菜去Taste of Hong Kong畀大家一嚐大廚手勢。好似招牌菜「龍皇白玉卷咁」都相當考功夫,頂層係鮮味嘅星班肉包住南雲火腿,跟住有蝦膠釀冬菇,綠色嗰層口感軟滑到好似mousse咁嘅,原來係蛋白菠菜蓉。而成道菜嘅精髓就在於啲醬汁呀!係鹹蛋黃汁嚟,淡淡鹹香撈埋食好開胃。

水晶牛肋肉亦係另一道花心思嘅菜式,師傅先挖空咗個水晶梨,釀入已經炆燉咗兩個鐘嘅牛肋肉,再用返啲汁嚟炆梨,令到水晶梨清甜爽口中滲有陣陣牛香,而牛肋骨肉質軟腍,肉味夠香。

點心拼盤有狀元茶粿、香煎鹹魚包,前者煙韌,後者富鹹香。

蟹黃蟹粉香酥卷係活動限定嘅菜式,膏蟹拆肉後,再連同麵包拎去脆炸,口感酥脆又帶蟹香,蟹迷唔好錯過。

瑞典米芝蓮三星    The Flying Elk Hong Kong

香港少有嘅北歐菜餐廳,仲要係由曾獲瑞典米芝蓮三星大廚主埋,食物水準絕對有保證。為咗今次活動,特別設計咗北歐風味熱狗。冇錯,雖然佢個樣唔似我哋一般認知嘅熱狗,但係佢係挪威傳統美食嚟。師傅用薄餅皮包住咗好多餡料,包括有蝦沙律、腸仔、牛油薯蓉同酸瓜等,口感豐富,拎住食都好方便。

而佢哋嘅招牌菜係感覺輕盈嘅自家煙燻挪威三文魚,加埋酸瓜、芝士等,又幾夾。

另外仲有鮮味鴨絲沙律同小龍蝦包

著名越南餐廳   Chom Chom

呢間位於中環嘅越南餐廳首次參與呢項盛事,佢哋一向主張無味精、全自家製材料嘅越南風味嘢食。呢次特地創作咗「是拉差香烤粟米」為會場限定菜式,帶有牛油香同微辣嘅粟米,配埋脆口蝦片一齊食,係幾滋味。

牛小排生菜包則係限量版菜式,用生菜包越式燉USDA牛小排、米粉、辣椒、花生醬料等,一啖咬落去腍嘅脆嘅鹹嘅辣嘅都有,口感豐富惹味。

另外仲有清新、香滑嘅越式煎魚柳同越式牛肉卷。

正宗江南菜式   奧卑利

大館內主打江南菜嘅奧卑利,平時嘅小籠包已經好受歡迎,今次仲推出咗兩款新口味,包括活動限定嘅麻辣黑豚肉小籠包,同限量版菜式嘅佛跳牆小籠包。前者紅色外皮已經係畀咗預警大家,啜一啜湯汁,香辣味道慢慢滲出,幾過癮。而後者嘅食材相當矜貴,真係用咗鮑魚、海蔘、花膠等佛跳牆嘅料去煲湯,然後再放入小籠包內,好清甜。

另外兩道菜式分別係充滿櫻花蝦鮮味嘅手工粢飯,同埋外脆內嫩嘅苔條黃魚柳。

居酒屋料理    Zuma

上年都有駐場嘅Zuma,今年就帶嚟會場限定嘅薄切鱸魚。唔好睇少呢薄薄地一片鱸魚,配埋柚子汁、松露油同三文魚子,一啲都唔簡單,柚子嘅提吊使之既鮮且香。

辣烤紐西蘭Te Mana羊排連八丁味噌係限量版菜式,肉質軟腍,香口不在話下,難得烤完都唔會太乾身,仲有肉汁!

其餘可以品嚐嘅仲有熊本吞拿魚他他連味噌包、牛油果墨西哥辣椒手卷同微甘軟熟嘅甜品:綠茶香蕉蛋糕及椰子雪糕連花生拖肥醬。

入去搵食固之然重要,但都唔好錯過其他活動呀。
1. 倫敦香水品牌Miller Harris到時將會係首次喺亞洲亮相,有得試cocktails之餘仲有專家指導配搭唔同嘅招牌香水。
2. 3月22日晚,Stella Artois會舉辦世界啤酒大師比賽
3. 咖啡品牌Nespresso會喺周末免費派咖啡
4. 兼有國際及本地星級廚師即場示範各種烹飪技巧,Wolf仲有抽獎送烤箱
5. 多隊樂隊同DJ現場音樂表演

其餘參與餐廳名單:
環保餐廳John Anthony、北歐現代美食The Flying Elk、希臘美食Artemis and Apollo、廣東菜代表海景軒、中東菜Francis、新派日式料理及酒吧Okra、現代日本菜Haku、手製意大利麵餐廳Pici等。


Taste of Hong Kong 2019詳情 :
日期及時間:
3月21日(四):6pm – 10pm
3月22-23日(五、六):12:30pm – 4:30pm、6pm – 10pm
3月24日(日) :12:30pm – 5:30pm
地址:中環海濱活動空間 (中環龍和道9號)
網址:www.tasteofhongkong.com 
網上訂購門票:https://hongkong.tastefestivals.com/zh-hant/tickets/


文:Kar
相、片:Tom Li




關鍵字
中環
美食節
Taste of Hong Kong
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
【隨時更新】便利店尋寶 每周新品速報
2天前
尖沙咀新商場開幕 過江龍餐廳一覽
6天前
【特約分享】食魚生轉運 三種好意頭日本海產介紹
3天前
日本人氣茶室登陸尖沙咀 招牌Tea Set、甜品推介(有片)
2019-09-25
【特約分享】茶記實測 西多、菠蘿油控必睇
2019-09-19