Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11

又有新嘅茶飲店啦~ 呢間喺銅鑼灣開業嘅台灣回流店,藝人鄧麗欣(Stephy)係老闆之一,主力提供健康嘅天然台式茶飲,更有加入香港少見嘅白木耳。同時,同Snoopy聯乘合作,推出一系列特飲同精品,各路粉絲要集合啦。

「我哋都鍾意去旅行,又鍾意茶飲,所以就希望做一間又好飲又健康,又好玩嘅茶飲店。」呢個品牌由Stephy同兩個朋友一齊創立,兩年前首先喺台灣開設第一間舖頭,跟住開到美國、加拿大、馬來西亞等地,而家終於都開返嚟香港。「我地都考慮同計劃咗好耐,終於都可以實現,好開心可以喺自己地方有自己嘅品牌;加上我哋都好掛住自己嘅飲品,而家未飛得去台灣,就要喺香港有自己舖先可以飲到自己嘅飲品啊。」Stephy表示每間舖頭嘅飲品雖然都係大同小異,但裝修就各有特色,希望可以帶到多啲新鮮感同打卡點畀大家。好似今次銅鑼灣呢間,就以Snoopy為主題啦,有成幢Snoopy牆身,fans要去報到啦。

飲品方面,主要分為三大類,包括純茶、果茶同埋珍奶,茶底全部選用台灣茶葉,主要以蔗糖同各種天然材料調配。其中奇異果白木耳更係每朝以新鮮奇異果打汁製作,味道微酸,白木耳爽口,仲有粒粒碎冰,清新解渴。

蜂蜜檸檬奇亞籽亦係推介之一,漸層顏色相當吸引眼球,而幾種食材搭埋一齊有種小清新嘅感覺,酸甜度剛好,除咗奇亞籽之外仲有珍珠咬口,多重口感。

比較特別嘅仲有蕎麥芝士奶蓋,蕎麥茶味香濃,傳出陣陣烘烤麥香,奶蓋軟滑,鹹中帶甜。

Snoopy fans嘅話就唔使諗咁多,直接揀Snoopy棉花糖特調朱古力沙冰榛子奶蓋啦,朱古力味香濃但又唔會甜得過份,仲要有粒大大粒勁cute嘅snoopy棉花糖啊!不過每日限量50杯咋。

 復克珍珠歐蕾


舖頭同時有多款獨家Snoopy商品,好似飲水機、白色造型杯、全黑Snoopy 3D杯等,分兩個階段發售,第一輪而家開始咗喇,第二輪就係9月22號起。銅鑼灣店快閃到10月頭咋留意返,跟住輪到沙田區接力快閃,而旗艦店則喺旺角登陸。

1011 Sip Tea
地址:銅鑼灣記利佐治街11-19號名店坊地下17號舖
期間限定:即日 至 10月7日

文:Kar
相、片:Tom Li

關鍵字
銅鑼灣
快閃店
茶飲
開飯星探
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12