PMQ咖啡市集回歸!海外人氣品牌+本地特色咖啡
2019-10-04

今次咖啡市集以「咖啡X旅遊」為主題,邀請六間嚟自台灣、泰國等地嘅人氣咖啡品牌,同本地特色咖啡店!同時亦有咖啡體驗區、咖啡品牌導賞、手沖咖啡工作坊等唔同活動,加上多間生活小店,包括大熱麻糬Bagel,同會場限定手工雪條呀。
 


PMQ同啡聞再次合作舉辦PMQ Coffee Agenda,共有6間海外人氣咖啡品牌,同超過25個香港特色咖啡同生活小店,唔少都有推出市集限定,錯過今次機會之後未必有得再試!
 

海外人氣咖啡品牌

清邁 Graph Coffee co


MONOCHROME($50)


SOMPETCH($50)

嚟自泰國清邁,主打100%泰國本地咖啡豆,連製作特飲嘅House Blend當然亦係泰國咖啡豆啦。MONOCHROME以Espresso配搭活性炭、雲呢拿同牛奶,形成搶眼黑白漸層。略嫌活性炭味道蓋過咖啡香氣。而SOMPETCH就喺Espresso同牛奶中加入朱古力同橙汁,上面再加奶泡、朱古力同橙片,咖啡、橙嘅酸味同朱古力甜味平衡返,飲落無想象中咁Heavy。
 

曼谷 Factory Coffee



咖啡豆($160/包)

喺2017同18年連續兩屆奪得「泰國咖啡師大賽」 冠軍,唔少Coffee Lover去到曼谷都會特別去買佢哋嘅咖啡豆!今次佢哋帶嚟唔款咖啡豆,可以先聞下Sample,或者試飲再揀心水。比較特別嘅係DARTH VADER,係佢哋嘅Signature Espresso,產自泰北,帶牛軋糖同杏桃香。
 

高雄 Artigiano



咖啡豆($130-320/包)

品牌嚟自台灣高雄,主打直火烘焙嘅咖啡豆,咖啡師形容如果平時飲嘅咖啡豆炒豆方式類似鐵板燒,咁直火烘焙就似係烤肉,爐火會直接傳到爐倉,非常考驗烘焙師嘅功架。今次帶咗五款直火淺度烘焙嘅咖啡豆,當中冠軍沃卡帶蜜糖香氣,酸度適中口感順喉,非常易入口。咖啡師仲教大家,熱飲主要係咖啡香味,凍咗就可以品嘗到咖啡豆嘅原味。
 

本土特色咖啡品牌

Cupping Room Coffee Roasters


Champion Cocktail(市集限定,$60/杯)

呢間咖啡店今年代表香港,喺德國柏林舉行嘅世界咖啡調酒大賽中得到第二名!今次就將喺香港攞獎嘅咖啡調酒帶到嚟市集,門市反而無㗎。用自家House Blend ATTABOY咖啡豆配Gin酒、西柚汁、荔枝糖漿,最後噴上蜜桃酒,令呢杯Cocktail飲落更Fruity亦更香!
 

厚啉。咖勹一


宜蘭粉圓拿鐵($48)

店名喺台語係「好飲咖啡」嘅意思,呢支宜蘭粉圓拿鐵用嘅係高雄程式咖啡工作室嘅伊薩瓦多咖啡豆製作Espresso,配搭牛奶同宜蘭老店嘅粉圓,特別在於粉圓係香港老闆自己用黑糖同高雄天池冬瓜茶熬煮,味道唔會太甜蓋過咖啡香,而且口感更軟Q喔!另外仲有黑糖冬瓜茶拿鐵($48),同樣選用天池冬瓜茶,係無加任何水,剩係用冬瓜同黑糖慢熬12個鐘,香氣醇厚。
 

Rest Coffee Gin


Lotus Fizz($100)

位於西九文化區海濱嘅呢間咖啡店以藍染為主題,今次就主打糅合茶嘅Gin同Cocktail。呢杯Lotus Fizz以經典Gin Fizz為藍本,用武夷嘅奇蘭岩茶浸喺Gin酒當中,再加入檸檬汁同梳打水。所以調配出嚟嘅飲品橙黃明亮,帶蜜糖香。
 

生活小店精選美食

Bagelroom


黑糖紫薯貝果($27)


抹茶黑芝麻白玉貝果($35)

Instagram人氣手作Bagel亦嚟到市集!堅持無油低糖純素、無防腐劑、每日新鮮製作三大原則。有唔少創意口味,當中以有白玉,即係麻糬餡嘅口味最受歡迎。Bagel煙韌有彈性,麻糬軟糯,口感豐富。
 

Twenty One from Eight


(左)波爾可麗露($35),(右)提拉米蘇麻糬($38)


(左)羽衣甘藍菠菜蛋餅(市集限定,$58),(右)牛油果鮮蝦牛角包(市集限定,$68)

觀塘工廈Cafe將佢哋嘅甜品同鹹點帶到嚟中環,包括本身係餐廳週末限定嘅提拉米蘇麻糬!裡面有一粒粒麻糬,最好即買即食呀。另外有兩款鹹點係市集限定,羽衣甘藍菠菜蛋餅係蛋奶素,牛油果鮮蝦牛角包分量十足。
 

I See I See


手工雪條(三款市集限定口味,$42)

而呢間手工雪條品牌今次推出三款市集限定口味,分別係用咗瑞典Oatly燕麥奶嘅Earl Grey口味, Oatly朱古力燕麥奶香蕉口味,同Hoegaarden啤酒青蘋果口味。品牌全部雪條都無添加色素或防腐劑,亦無麩質。
 


今次市集仲有「啡我莫屬」自定咖啡體驗專區、市集咖啡品牌導賞、手沖咖啡工作坊、咖啡烘焙體驗課程、用咖啡渣DIY身體磨沙膏及手工肥皂工作坊、植物奶咖啡拉花班等活動等緊大家參與㗎!
 


PMQ Coffee Agenda
活動日期: 即日起至2019年10月7日(11:00-19:00)
地址: 中環鴨巴甸街35號PMQ 元創方地面廣場




文、相:Cathy

關鍵字
中環
PMQ
咖啡
市集
手沖咖啡
精品咖啡
貝果
手工雪條
飲食潮流
開飯仔為大家發掘香港這個美食之都的最新美食資訊,分享飲食潮流文化。
本月熱門
【隨時更新】便利店尋寶 每周新品速報
4天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
5天前