呢間點心舖成日都會同唔同卡通做聯乘，你哋鍾意嗰隻出咗場未？今期輪到P助同粉紅兔兔上場喇，有成11款點心、3款麵飯、8款甜品同3款飲品咁多，有幾款仲要係流心嘅添，粉絲表示要分幾多次先食得晒啊！

可愛度最高嘅，應該就係呢個粉紅兔兔流沙包喇，內餡以鹹蛋黃混合好立克粉、煉奶同植物牛油做成，流心效果都幾澎湃下。

流心蜂蜜西多士，拎開面嘅粉紅兔兔手工糖霜餅乾，就係一磚邪惡西多喇，邪惡在於，一切開啲奶黃就係咁湧出嚟喇，仲可以自加蜂蜜添，睇你對甜嘢有幾愛喇。

另一樣流心嘅點心係菠蘿流心奶黃包，迷你菠蘿包頂層都酥脆嘅，咬開小心流奶啊！

P助腸仔包都係今次先新出嘅點心嚟，中式包包住德國腸，不過就乾咗少少。

粉紅兔兔士多啤梨果凍，有一粒粒真嘅士多啤梨肉㗎。

其餘（部分）點心包括：

粉紅兔兔蝦餃、 蜜汁叉燒包

 粉紅兔兔蛋白撻

 雞肉咸水角

蔥油雞扒飯、椒鹽粟米豬扒飯、XO醬大蝦炒腸粉

 草莓大福 四季水果茶、桃味梳打特飲、Oreo脆脆朱古力特飲

另外仲會送cute cute撥扇同杯墊，又食又拎。

点心代表
地址：尖沙咀彌敦道100號The ONE 3樓L308號舖
期間限定：即日至6月30日

文、相：Kar