Little Bao銅鑼灣開旗艦店 新增多款鹹香創新素食菜式(有片)
2018-09-21

邊個話burger就一定係西式嘢?有本地女廚師一直創作多款新菜式,其中一道招牌菜就係中式漢堡包啦,即係用饅頭夾住嚿豬腩肉,既似台式刈包又似西式漢堡。呢位舊年獲選為「亞洲最佳女廚師」嘅年輕女師傅May Chow,最近喺銅鑼灣開咗間旗艦店,地方比中環總店闊落得多,而且menu上嘅菜式仲多咗成倍!有唔少創新嘅素食添呀。

紫菜墨魚脆脆同墨西哥炸雲吞都係新增嘅菜式,前者以新鮮墨魚製作,手打成墨魚丸,再放入馬蹄,外層圍上紫菜,最後加埋黑蒜醬,彈牙得嚟亦有爽脆口感;後者則係用上新鮮蝦滑製成炸蝦雲吞,上面就加自家製牛油果醬同花椒菠蘿莎莎。

酒煮大蜆隻隻蜆都好大隻,見到已經流晒口水,仲要酒香味不斷咁飄入個鼻度,完全係未食已經要先醉啦!蜆浸紹興牛油湯,啖啖酒香,肉質鮮甜。留意返記住要成碟嗶到底喎,因為啲蜆下面仲有薯蓉呀!未咁樣食過薯蓉?估唔到又幾夾喎,索晒啲酒香同蜆汁,不得了。

May表示餐廳雖然以快餐形式供應食物,但卻係fine dining嘅水準,用嘅食材以新鮮為原則,而且用嘅都係常見嘅食材,不過就會諗方法令到佢哋變得特別。就連炸雞,都會用新鮮三黃雞!三黃雞嘅雞味重、嫩而多汁,而且皮肉之間仲會有啲雞油,令到隻雞炸完出嚟都仲好juicy。佢哋嘅炸雞有三款口味,分別係原味、四川同香辣,辣嘅程度逐級遞增,好有刺激感。但又唔會一味死辣,辣中帶麻香。而且因為係新鮮雞嘅關係,雞肉鮮嫩,即使係雞胸嘅位置亦唔鞋口。

素食菜式都有唔少,好似香口嘅黑松露薯條呀,炒小椰菜呀咁。炒小椰菜呢道菜值得介紹下,幾特別,坊間好少食到呢個煮法,一球球小椰菜混入魚露焦糖醬、辣椒、花生同青檸去炒,鹹鹹香香係幾惹味。

油醋野菇沙律亦花咗唔少心思,特以白醬油同白醋汁製作,食落甘甜,作為前菜係幾開胃。

至於中式漢堡,除咗有招牌豬腩包同新鮮三黃雞包外,仲有素食選擇——Impossible素包。塊「扒」好厚身下,食落都幾有肉味,而且仲好似牛咁,有得揀要medium等熟度,但原來係塊以百分百純蔬菜製成嘅植物肉扒嚟呀,配埋黑椒汁、腐乳沙律醬、鹹檸檬昆布沙律咁食,同真‧漢堡無異,層次仲相當豐富。

最後介紹返杯特飲,Osman’s Fizz,cocktail嚟,以桂花酒、接骨木花syrup、gin再加佛手柑等溝成,賣相靚靚仔仔之餘,花香味頗為突出。


小包包
地址:銅鑼灣Fashion Walk 京士頓街9號地下H1號舖
正式開業日期:9月26日

文、相、片:Kar


關鍵字
銅鑼灣
漢堡
中式
素菜
素食
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
4天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30