Backpacker情侶中環開新派台式餐廳 必食本地蝦醬x台式鹽酥雞便當
2021-06-23

留喺香港都可以感受去旅行去Hostel嘅感覺!中環呢間新店由一對90後Backpacker情侶開設,擺滿旅行書同各地特色擺設,食物主打無味精新派台灣菜,好似鹽酥雞便當配大澳蝦醬,早餐店肉蛋吐司升呢變厚切版等等。可以嚟一邊嘆台式美食一邊Plan下個旅行大計呀。
 


旅窩店名嘅有「鍾意旅行嘅大家窩在一起」嘅意思,皆因兩位店主都係非常鍾意旅行嘅背包客。英文名Carpe diem就有活在當下嘅意思,希望將呢間小店打造成好似Hostel Lobby咁,聚集同樣鍾意旅行嘅各位,一齊開心Share旅遊見聞!
 


招牌豆乳鹽酥雞便當(Lunch Set $88)

Lunch Set以台式同台泰Fusion便當為主,套餐附前菜、主食同飲品。前菜越式小清新青瓜酸辣爽口,開胃解膩。而豆乳鹽酥雞係指參照台中鹽酥雞做法,醃肉嘅時候加入腐乳增加鹹香!雞肉之後會裹上椒鹽同炸漿炸至金黃色,外脆內滑,同炸九層塔一齊食更有台灣風味。
 


亮點在於另上嘅醬汁係用咗香港大澳出產嘅蝦醬調配,食落蝦味突出,同鹽酥雞好夾!而且醬汁帶少少甜味,同時增加香氣同味道層次。滷蛋有誘人溏心效果,鹹香入味。便當亦有椰菜同炒粉絲,前者係台灣便當常見,爽口清甜;後者改用韓國粉絲,口感煙韌。
 


招牌車打芝士肉蛋吐司($92)

靈感嚟自台灣早餐店嘅吐司,店主再加以改良,例如麵包用無防腐劑嘅厚切方包,口感更扎實。肉亦從薄肉片改為炸豬扒,用肉質嫩滑嘅肉眼以鹽酥方式炸熟。再配搭車打芝士、蜂蜜芥末醬同半熟蛋,增加味道同濕潤度。
 


焦糖脆脆香蕉忌廉糯米窩夫($138)

唔少鍾意台式甜品嘅都係煙韌控,所以店主設計嘅時候就加入糯米粉同少少木薯粉,令窩夫焗出嚟口感更煙韌!即叫即製嘅窩夫微脆軟彈,仲有少少蛋香。配搭雲呢拿雪糕、香蕉、朱古力醬,同自家製焦糖脆脆,整體味道香甜。
 

更多【新店直擊】:
1. 牛肉丼新選擇!日本燒牛丼元祖登陸旺角 最平$45
2. 深水埗新開民族x旅遊主題餐廳 特色土耳其早餐+異國風菜式
3. 人氣自由配漢堡店進駐大圍 推介新龍蝦蟹肉凍堡+爆汁海膽吉列蠔堡

 

綜合水果鮮果茶($48,或Lunch Set+$30)

茶底係冷泡四季春,減少咖啡因同時味道亦更甘甜。配搭青檸、西柚、橙、熱情果等鮮果,味道水果酸甜為主,後韻就係四季春嘅幽香清爽,甜度適中好啱消暑。
 


草莓石榴Calpis梳打($52,或Lunch Set+$25)

Calpis(可爾必思)係一款日本同台灣常見嘅乳酸菌飲品,配搭士多啤梨同石榴呢兩款酸酸甜甜嘅水果,味道以乳酸味為主,酸甜平衡又帶少少氣泡口感。另外如果有需要用飲管嘅話,餐廳亦會提供可食用嘅木糖醇飲管以支持環保,呢款飲管仲有士多啤梨同檸檬口味㗎!
 


餐廳有Postcard畀大家免費拎走,仲特別印咗Travel Itinerary,方便大家喺餐廳睇旅遊書或者傾計時,可以Plan定下個旅遊大計





旅窩 
地址:中環鴨巴甸街42號地舖




文、相:Cathy

關鍵字
中環
台灣菜
便當
吐司
窩夫
旅窩
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
7天前
【隨時更新】最後倒數!2022即將結業嘅人氣餐廳
1天前
尖沙咀最新露營主題日式燒肉店!3700呎室內Glamping體驗
2022-07-25
全港8大人氣沙嗲牛麵!煲仔沙嗲牛肉麵、 沙嗲牛肉沾麵
2022-08-03