90分鐘任食貓山王等即開榴槤!任食品鑑Party直擊(有片)
2019-01-30

如果你特別鍾意食榴槤嘅話,或者都知道香港有舉辦過榴槤放題!日前開飯仔就去咗其中一場,30分鐘試完五款唔同品種嘅馬來西亞榴槤,之後就係90分鐘任食時間。當中有咩值得留意,下次又係幾時?睇開飯仔報告啦!
 



榴槤BB日前同馬來西亞聯邦農業促銷局合作舉辦任食品鑑Party,不過因為要等位於馬來西亞嘅自家果園出產品種數量及質素穩定先舉辦,所以下一場預計要等到今年7月啦。想知道最新消息可以留意佢地Facebook
 


任食品鑑Party歷時兩個鐘,頭30分鐘係品鑑環節,一邊聽老闆KK介紹馬來西亞榴槤,同唔同品種嘅特色,一邊可以品嘗品鑑盤上嘅榴槤。榴槤全部都係樹上成熟後由馬來西亞空運到港,活動當日即開,保證新鮮。
 



品鑑盤每件榴槤肉都有棋仔標示品種,想試真啲唔同味道嘅話記得按順序,由最淡食到最濃,好似今次就由比較甜嘅金包試到最後係甘味濃郁嘅貓山王。而每人亦會有一支水,可以開定先,食完一款就飲兩啖水清一清口腔,反正有30分鐘可以慢慢試真啲吖嘛。
 


D13 金包

果肉顏色橙黃,果肉外面有一層衣,口感Creamy而且甜度較高,係相對易入口而且深受女士們歡迎嘅品種。活動當日嘅金包的確非常香甜,有啲似食緊榴蓮甜品!
 


D24 山頂XO

XO係比喻呢款榴槤肉獨特嘅酒香,無論係香味定餘韻都相當濃郁。果肉柔軟,甜度適中。
 


D198 金鳳

馬來西亞當地同貓山王同樣廣受歡迎嘅品種之一,榴槤體型較細而果肉淡黃細長,果核比較細所以最啱鍾意啖啖肉嘅朋友。香味濃郁味道甘甜,有一絲絲口感。
 


D200 黑刺

相當名貴嘅品種,喺出產地馬來西亞價錢亦比貓山王更高!皆因種植環境條件苛刻,產量唔高。另一方面亦因為味道層次豐富而近年受到追捧,甘甜中帶少少類似黑朱古力嘅香味。
 


D197 貓山王

果園嘅貓山王都係嚟自超過30年樹齡嘅老樹,所以回甘係五款當中最濃烈嘅。柔軟果肉有入口即溶口感,甜味之後係帶微微酒香嘅甘味。
 

更多【飲食潮流】:
1. 【隨時更新】便利店尋寶 每周新品速報
2. 100%香港製造無添加蛋卷 金沙口味最啱拜年
3. 楊明夥拍朋友開燉湯店 為都市人原盅燉無味精靚湯

 

品鑑環節過後就係90分鐘嘅任食環境!因為金鳳同黑刺數目不足,所以任食環節只有金包、山頂XO同貓山王三款品種,會先由工作人員奉上一碟碟即開榴槤果肉,食完就可以隨時舉手再加,唔洗走嚟走去自己夾呀。


雖然唔係全部品種都有得任食,不過值得一讃嘅係任食嘅榴槤水準保持得唔錯,添加嘅速度亦合理。老闆KK亦會同時介紹更多榴槤知識,例如底部呈六星嘅係咪假貓山王?可以邊食邊學。
 


暫時最高紀錄依然係香港嘅94粒,同新加坡嘅200粒榴槤。據開飯仔觀察,現場女士大部分都食到20粒,男士平均都食到30粒,最高係超過40粒。
 


咁無得參加榴槤放題嘅呢段時間點算好?佢地最近推出賀年福袋,裡面會有貓山王榴槤爆谷、貓山王榴槤脆脆、貓山王蛋卷、榴槤拉茶等,可以止下口癮,又或者拜年送畀榴槤控!
 


另外榴槤品鑒盤喺觀塘店長期供應,一盒可以試到五款榴槤。會有金包、山頂XO、貓山王加兩款珍貴馬來西亞榴槤品種。
 





榴槤BB
地址:觀塘敬業街65-67號敬運工業大廈2樓B號舖




文、相、片:Cathy

關鍵字
榴槤
榴槤放題
貓山王
觀塘
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
2019-07-10
炎夏感bye-bye!6至7月下午茶推介
2019-06-24
美食荒漠不再 馬鞍山8間新餐廳推介
2019-07-02
6月份好評餐廳十強
2019-07-04
盛夏Take個break 7-8月下午茶推介
2019-07-16