第10位 鮨文（*新上榜）
入元朗唔只得九吋長壽司嘅，呢間高級日本餐廳打正旗號正宗日本菜，材料超過90%由日本入口，價位由$600至$1,300，比中環嗰啲平幾成，食咩由師傅話事，特別推介出面較少食到嘅拖羅面頰同拖羅魚鮫，肥美到入口即溶！仲有款清酒蒸黑鮑，隻鮑魚真係成個拳頭咁大！
(Photos by karenlamhk& silverthoughts)
第9位 Sister Korea Café
邊個話大圍屋邨冇好嘢，上月新入榜第3位，今個月下跌6級但仍然留到喺度，睇住佢哋嘅芝士蛋溶岩豚肉飯同芝士排骨拉出芝士絲，芝士迷表示要流淚了。
(Photos by sugar_tang)
第8位 Chibee Chicken and Beer
7月上榜，8月落榜，呢間位於銅鑼灣由韓國Oppa開嘅炸雞店今個月返嚟喇，必試係佢哋嘅原創忌廉羅勒香蒜醬，香濃得嚟唔會蓋過雞味，加多個啤酒麗塔，好似去咗韓國Happy Hour！
(Photos by VCY& 愛吃達人)
第7位 BAKE CHEESE TART（*新上榜）
呢間北海道過江龍都唔使我解釋點解入榜，基本上每日都會見到佢嘅消息，講下條龍點長法，芝士撻由法國加日本三種芝士溝埋聽落都知邪惡，咬開見到半熟狀態嘅芝士，姊妹們又點忍到口。
(Photos by zoeebo & msamypoon)
第6位 諾亞半熟蛋糕專門店
微升一級，第4次入榜，分店又越開越多，證明半熟蛋糕熱潮仲未減退，唔知會唔會畀半熟芝士撻取代呢？
(Photos by herbert）
第5位 Burgeroom
每隔一排都會再見嘅Burgeroom Keep住係大家心水食店，龍蝦漢堡、軟殼蟹漢堡、鵝肝牛肉漢堡仍然咁吸引，食完唔知要跑返幾多次步贖罪！
(Photos by 新地食記 & bonbon妮)
第4位 Tokyo Secret 味之藝術
憑住佢哋極浮誇嘅造型雪糕上月成功登上榜首，不過你知女仔個心變得好快，市面又有好多新嘢搶咗佢哋相機嘅Focus。
(Photos by sugar_tang& Joanna H)
第3位 Metal Steak（*新上榜）
全港首間日式「半立食」扒房，食幾多計幾多，即叩即燒，以火山石爐燒，火力均勻，點埋4款自家製醬汁(雜果黑醋、柚子味噌、忌廉芥末籽醬及日式黃芥辣)仲惹味，而且價錢大眾化，最便百幾蚊食到美國安格斯牛扒，多幾舊水食到佐賀A4和牛，中環嚟講好抵食！
(Photos by cs-ze& TCMG)
第2位 Seoulmate Café（*新上榜）
由韓國人開設，難怪韓風味超濃，室內環境令你有跳出香港嘅感覺，仲有個後花園，再加埋杯紫薯Latte同紫薯蛋糕，係休閒放假之選。
(Photos by etata& 白雪姬)
第1位 Stacks（*新上榜）
冬甩Out 啦！雞蛋仔Out 啦！鯛魚燒Out 啦！究竟仲有啲咩可以用嚟夾雪糕？呢間新店開咗兩個多月就打入咗今次排行榜第一位，全憑佢哋破格嘅曲奇夾雪糕，曲奇每日新鮮製造，雪糕口味亦古靈精怪，可以一試紅莓芝士餅夾玫瑰雪糕，仲可以夾楓糖煙肉味雪糕，仲新出咗菠蘿包夾雪糕添，相機食先怪又要出動啦！原來呢度係TVB「大隻仔」溫家偉投資7位數開，佢仲會成日親自睇鋪，畀你哋捕獲到佢就真係食晒冰淇淋！
(Photos by natfoodiary_& 霖迪)
按此瀏覽「最新餐廳排行榜30強」
文：Marcus
讚好OpenRice專頁！
