9月份好評餐廳十強
2019-10-09

9月份嘅十強名單,有8成都係第一次上榜嘅餐廳,當中有火鍋、有酒吧、有小店……能夠喺艱難時刻迎刃而上嘅,當然各自都有佢哋嘅秘技啦!

第10位  緣聚鮮鍋(*新上榜) 


圖:Miss K.fly

荃灣呢間餐廳,$200唔使就有得任食自助餐同火鍋,兼且食物款式多多,11個區內有壽司有刺身、有熟食有甜品,湯底仲有9款揀添,包括壽喜燒、芫荽、味噌地獄辣等都有得揀。甜品區有得夾糖,但最吸引莫過於係晚晚都有駐場師傅即席切原條吞拿魚啊!

第9位  美滋鍋    

  圖:KathyPun天天食好野

呢間新加坡嘅美顏火鍋店,開張4個幾月嚟已經係第三度上榜喇!長期受港人歡迎,無他嘅,全店粉紅主題啱晒打卡呃like嘅女生,內設室內兒童遊樂場又照顧到一眾家庭客需要嘛。膠原蛋白美容鍋近乎係必點,想試多啲款可以揀鴛鴦湯底,雪耳鮮椰子鍋都係另一推介啊,清甜可口。

第8位  何蘭正(*新上榜)

 圖:yimloismyfoodmylife4

位於中上環酒吧林立之地,能夠突圍而出,除咗因為呢度環境氣氛一流外,食物同手工啤酒質素之高亦係原因之一。麻辣控要試濃厚花生豆富配花生芽菜,麻香十足;飽肚少少嘅有香煎五頭深海大虎蝦配蝦皇醬QQ麵,味道香濃。雖然酒未必可以解愁,但試返杯城釀新出嘅 “The City is ...Shining”,earl grey porter嚟,心情或者會好啲嘅。

第7位  香香宮煮(*新上榜)

 圖:starrychow隨心隨生

睇個名就知呢度玩味十足,裝修好似回到古代咁,門口仲有張龍椅打卡位!主打各式火鍋,打邊爐都要滋潤嘅就揀花膠雞湯鍋啦,有半隻雞同花膠呀,另外特色卜卜蜆鍋、消暑冬瓜瑤柱鍋都好受歡迎。火鍋配料亦見心思,黑松露蟹肉餃幾鮮香,手打鵝肝墨魚丸裡面仲係鵝肝餡添,出面好少試到啊。

第6位  勝面(*新上榜)

 圖:loklok12378Pocaguri

台灣過江龍,主打糅合四川風味嘅麻辣牛肉麵。麻辣控一場嚟到梗係要試招牌麻辣·牛三寶湯麵,成碗橙橙紅紅咁,好有色水,麻香持久!牛三寶包括有牛腱心、牛頰肉,同牛頸脊,口感各有不同。麵款建議揀關廟麵,滑溜彈牙呢。

第5位  龍門冰室(*新上榜)

 圖:rubbishtrashSa820

呢間冰室唔淨止得一般茶嘅茶餐或者公仔麵,就連all day breakfast、鐵板扒餐同玉子燒等都有,其中個星級雜扒鐵板餐超豐富,又有西冷扒又有雞扒,仲有炸帶子同香腸,疊到高一高滿一滿,行完街食包飽肚!加上佢哋早前推出免費加油餐畀全港學生,結果日日都要接受「懲罰」,仲「罰」到打入十強都可以話係一個歷史。

第4位 Mamaday

 圖:CheesecakemuimuiDOMO肥

銅鑼灣呢間小店相隔一個月後再上榜,加上曾經係最多收藏餐廳第3位,足見大家對佢嘅喜愛有增無減!好多人去都會試招牌菜蒲燒鰻魚蛋包飯,不過薑蔥慢煮雞扒滑滑滑蛋包飯亦好值得一試,香口、嫩滑、惹味。另外推介豆腐豆腐豆腐咖啡。咖啡內放入豆腐雪糕,豆香味濃,仲要慢慢溶化時,豆味融入咖啡中,啖啖香口綿滑啊。

第3位  丸十あぶり牧場(*新上榜)

 圖:tracyman覓食小姐

主打燒和肉嘅嘅餐廳,最近以XO同蛋黃哥做主題,無論佈置定食物上都見到佢哋嘅踪影,吸引咗唔少fans朝聖捧場,特別係個迷你漢堡,好cute cute!牛魔王就要煩惱食邊款牛喇,多國唔同品種嘅和牛都有得食,但講到罕有嘅,就梗係M9+100%全血純種澳洲和牛啦,肉味都幾香濃。

第2位  Van Gogh SENSES(*新上榜)   

 圖:覓食寶寶蝴蝶結姐姐

藝術嘅嘢……入到去呢間餐廳就自自然會有啦~ 呢度獲得阿姆斯特丹梵高美術館獨家授權,裝修格局都好鬼靚,牆上有LED loop播梵高名作,餐具精品全部都好有藝術感,約埋閨蜜嚟享受個靚靚下午茶固然好,但lunch或晚飯嘅菜式亦唔輸蝕,香嫩軟腍嘅西班牙豬梅頭配芹菜蓉及青蔥萄葡酒汁都幾推介。

第1位  椰子日記(*新上榜)

 圖:cyps出奇蛋

榜首係一間新開嘅小店,主打椰子凍同椰子碗,富有創意,將平時大家最鍾意食嘅芋圓呀、super bowl呀等等放晒入個椰殼度,賣相一流之餘估唔到都幾夾。招牌雙層椰凍椰味十足仲帶奶香;巴西莓碗則以新鮮藍莓、士多啤梨等打成嘅水果smoothie,清甜juicy。


關鍵字
尖沙咀
銅鑼灣
十強名單
報榜
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
4天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
5天前