9月份好評餐廳十強
2018-10-08

9月份開學月,除咗收拾心情開學之外,有冇周圍去開飯呀?今個月繼續都有唔少新餐廳上榜,踏入第四季相信競爭會更加激烈!即刻睇睇今個月十強先!


第10位    六両三

雖然上月跌出榜外,不過今個月再度回歸,始終台式食物都係長期受歡迎嘅!餐牌冇乜花巧,都係地道牛肉麵、魯肉飯等,但水準穩定,由台灣人主理更加有親切感。開飯仔食法係一碗魯肉飯再加牛肉湯,就可以試晒兩大拿手菜式喇。

圖:kanadskiyoting


第9位    團日式拉麵 (*新上榜)

呢間由香港人開設兼主理嘅拉麵店,其中一個賣點一定係門口部點菜機,真係似去咗日本咁呀!食物方面都好用心,有櫻花蝦、黑蒜油、辛辣及魚介四款口味,蝦油來自日本、黑蒜油係自家提煉而成,足料而且味道唔錯,難怪成日都有人龍!

圖:Aki Jaiyimlois


第8位    Chotto Maki (*新上榜)

日式卷物淨係得加州卷?非也!呢間卷物專門店帶美國風格,創意卷物有多種配搭,好似三文魚露筍配櫻花蝦、蟹柳配天婦羅蝦、鰻魚配帶子等五六款食材,仲可以自由創作,一啖咬落去勁豐富!而且即叫即製,係唔少附近OL lunch勝地

圖:Travel_bears啊蛋



第7位    慢理牆城 (*新上榜)

油麻地呢間樓上café位於酒店內,餐廳以環保木同植物裝飾,座位唔多,感覺都好悠閒舒適。食物如意粉、意大利飯等大份精緻,而且甜品同飲品都幾特別,好似一斟就會自動升高嘅特飲、可以自己 DIY嘅椰子雪葩等,打卡一流呀。

圖:蝴蝶結姐姐心太軟*~


第6位    Teru Teru Bōzu

上月嘅亞軍今個月微跌幾級,招牌木盒蒸籠飯材料豐富,可以揀松葉蟹肉、鰻魚等,仲有蒸白金豬肉、蔬菜等,蒸煮健康得來又夠原汁原味。仲有刺身、居酒屋小食等多款選擇。中價但有日本師傅坐鎮,質素有保證。

圖:GG1314minieater


第5位    花甜果室 (*新上榜)

呢幾個月不停被台灣過江黑糖珍奶攻陷,可能大家都飲到膩,所以今個月跑出嘅係漸層果汁!色彩繽紛但唔係色素,而係以天然果汁打成,招牌飲品她,與他的香水味係紅肉火龍果加蘋果、乳酪調成,好清新。

圖:小詩...熊遊世界


第4位 響 - Hibiki 日本燒肉

再次冧莊嘅仲有呢間燒肉放題店,刺身有海膽食、連喜之次、生蠔都有,但就冇得無限追加!其他肉類就有美國同澳洲和牛、日本米澤三元豚,雪糕有movenpick任食。難得放題都有靚料,未必一定只係劣食嘅。

圖:阿啦buddy123


第3位    Appendix Coffee & Bar (*新上榜)

唔少咖啡友鍾意去café hopping,呢間銅鑼灣新開嘅咖啡室好快就打入咗三強位置!吧位設計型格,日間賣咖啡,夜晚就變成酒吧。食物方面有一口一件嘅西班牙pinchos,亦有意粉、主菜等選擇,好適合嚟happy hour呀。

圖:So Mei Fishlamlamyuk


第2位    六十六十火鍋 (*新上榜)

火鍋店升行升市,呢間位於長沙灣嘅火鍋店有咩板斧一開就升上第2位?就係夠鮮!粥底火鍋有8款海鮮,包括肉蟹、鮑魚、扇貝、貴妃蚌、生蠔等,而精華所有煲到最後嘅脆米泡飯,勁香甜入味,絕對食留肚食呀。

圖:yobi109大食懶 W


第1位    一盛極牛 (*新上榜)

今個月榜首又係新店,並唔係普通嘅拉麵,而係好少見嘅和牛拉麵!而且選用熊本靚和王牛肉製成,半熟和牛質感軟滑,牛骨湯都好有牛味,加上粗曲麵條,比起一般濃厚豬骨、魚介湯係特別嘅!自問係拉麵控就要試試佢。

圖:fafa418kkmhung



文:Perrins

關鍵字
十強
排行榜
拉麵
台菜
卷物
日本菜
台式飲品
燒肉
火鍋
放題
cafe
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
幸福Pancake登陸銅鑼灣!鬆軟原味、開幕限定抹茶味(有片)
2018-09-24
地獄廚神Gordon Ramsay 尖咀再開分店 無敵海景伴威靈頓牛扒
3天前
濃而不膩!太子芝士麵專門店 必試芝士撈+咖哩撈+叻沙(有片)
2018-10-05
9月份好評餐廳十強
2018-10-08
Little Bao銅鑼灣開旗艦店 新增多款鹹香創新素食菜式(有片)
2018-09-21