9月份好評餐廳十強
2016-10-05

9月,係開始踏入秋天嘅月份,不過依然無減香港人對雪糕、對甜品嘅追求,十強榜嘅頭3名有2間都係雪糕、芭菲甜品舖嚟。另外值得開心嘅係今次個榜,有成8間咁多嘅餐廳都係第1次上榜㗎,香港愈嚟愈多好嘢食喇~


第10位 程班長台灣美食
(*新上榜)

唔知係咪因為暑假興起食手工芋圓,連帶荔枝角呢間由台灣人開設嘅餐廳都多咗人去潮聖。第一次去必試招牌紅燒半筋半肉麵,湯底有濃郁牛肉味而帶微辣,牛肉鬆化軟腍牛筋軟腍富膠質口感。忠實Fans就可以點之前喺美食博覽大受歡迎嘅阿嬤傳統鳳梨冰小芋圓,鳳梨酸甜有致,大細芋圓都Q彈煙韌。


圖:F.nBreakyemenikwan


第9位 El Cerdo
(*新上榜)

荃灣呢間西班牙菜館有唔少特色Tapas方便大家一邊飲酒一邊嘆,例如炸黑毛豬火腿球外脆內軟,黑毛豬火腿鹹香同幼滑薯蓉又夠夾。洋蔥薯仔西班牙奄列香口得嚟又有蛋香。想再飽肚啲記得嗌招牌西班牙炒飯,有大蝦、青口、帶子、魷魚、豬腩肉同羊肉等,充滿鮮味。


圖:isaac仔仔


第8位 中村藤吉
(*新上榜)

香港人對抹茶嘅熱愛真係有增無減,呢間人氣日本抹茶老字號今次到尖沙咀店外賣店入十強榜,而且抹茶月餅有價有市。中秋過咗唔食月餅,仲有宇治金刨冰同各款軟雪糕嘅,無論係焙茶定抹茶都茶香十足。


圖:麵包超人Kikivicki


第7位 Hami Harmony

太子呢間田園風小餐館隔咗一個月再次上榜。招牌芝士什菌釀春雞有幾邪惡唔洗再講,再訪嘅各位吃貨可以試下佢地嘅飯同意粉。黑松露帶子什菌意大利飯香而不膩,飯粒又有咬口。而卡邦尼長通粉同牛油汁蜆肉自家製蝦米幼長通粉都調味得宜,同三五知己去Relax下啱哂。


圖:lychee.yeung


第6位 烏龍燒(*新上榜)

旺角呢間串燒店一反傳統,擺個爐喺枱面畀大家自己串燒自己燒,各款肉類、海鮮、蔬菜甚至迷你煲仔都應有盡有。唔洗驚燒唔好,因為枱面就有本秘笈。自己鐘意燒到幾成熟都得,而且自己任加孜然粉、七味粉、蜜糖、沙嗲醬等調味。最後叫多杯中式糖水沙冰,好玩又好味。


圖:糖小妹


第5位
The BASE (*新上榜)

觀塘工廈餐廳似乎成為潮流嘅寵兒,差唔多每個月都會至少有一間呢度嘅餐廳上榜。今個月就輪到呢間嘞。意粉、burger……正常café有嘅呢度都有,而人哋冇嘅佢都有。講緊嘅係爆炸飲品。一杯爆炸乳酪野莓沙冰,酸酸甜甜,上面加咗爆炸糖,咁樣飲又幾得意喎。仲想試其他特別嘢嘅話,有咖哩蕃薯條呀!


圖:chualam八寶飯團


第4位 康瑞涼茶

相信大家對呢間賣芋圓嘅涼茶舖應該都唔會陌生,係呀,佢又上榜喇!仙草百配固然抵食,芋圓地瓜圓小丸子……夾埋都係25蚊碗,但其實佢仲有其他好食又抵食嘅糖水㗎,下次嚟不妨試下酒釀桂花湯圓或者桂棗雪耳甜湯吖。


圖:hkfoodelicious紫兒


第3位 L'attitude
(*新上榜)

新開一排嘅韓風甜品,對於上榜即進佔第3位,一啲都唔意外。烏雲雪糕喺韓國紅咗一段時間,作為呃like名物,嚟到香港,like當然係繼續呃,去到舖頭枱枱都見到一嚿嚿雲,我指啲棉花糖呀,靚靚der甜甜der係幾治癒嘅。想與眾不同嘅,咪叫個轟炸軟雪糕囉,即係爆谷加雪糕,仲有得用test tube加焦糖醬添,甜魔至愛。


圖:nick422愛上兩個我


第2位  8鍋臭臭鍋
(*新上榜)

唔上榜都唔知原來香港咁多人鍾意食臭豆腐。呢間喺尖咀嘅台式火鍋店,總共有8種湯底揀,有芝士牛奶鍋呀、麻辣鍋呀咁,但去得嘅梗係要試招牌嗰款,即係招牌臭臭鍋呀。成煲湯都係臭豆腐味,連帶浸落去嘅肥牛呀、豬腸呀、麵呀通通都有呢陣味,鍾意食嘅就會覺得好正。


圖:wingtunghung幸樂兒


第1位  京林屋
(*新上榜)

抹茶甜品開到一街都係,呢間日本嚟嘅過江龍,用咗約一年嘅時間,終於成功打入榜,仲一入就做No.1。去到必食嘅香港限定芭菲,一杯食晒士多啤梨啫喱、大菜糕、紅豆蓉、抹茶雪糕同蕨餅,係爽嘅。但除咗去食甜品,試埋佢嘅麵食都OK㗎。


圖:heidima <IVY>





文:Kar、Cathy

隨時接收最新資訊
讚好OpenRice專頁!
關鍵字
排行榜
甜品
抹茶
芋圓
尖沙咀
觀塘
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
2月份好評餐廳十強
2017-03-06
【無綠不歡Green Monday】味覺顛覆 未來漢堡襲港
2017-04-18
荔園茶餐廳尖沙咀開店 焦糖溫泉蛋西多夠創意(有片)
2017-06-09
11月澳門美食美酒節 過大海嚐米芝蓮星級大廚手勢
2016-11-01
【飲食潮流】尖沙咀和風西餐大變身 春日抹茶甜品x西式日本烏冬
2017-02-27
法式輕甜泡芙Pop-up店登陸尖沙咀(有片)
2017-04-07
餐廳資料
更多
收起
本月熱門
尖沙咀新開素食自助餐 1.5小時任食40款菜式(有片)
2018-07-27
尖咀酒店澳洲海鮮主題自助餐 任食回本龍蝦生蠔毛蟹
7天前
半島海鮮主題自助餐 四小時任食龍蝦鮑魚蟹腳
2018-08-06
北角新海景酒店自助餐 波士頓龍蝦即劏吞拿魚
2018-07-26
旺角馬來蝦麵叻沙專門店 原隻軟殼蟹龍蝦做配料
2018-08-01