第10位 合益泰小食
唔知係咪因為上個月有腦場電腦節帶旺人流，所以深水埗呢間街坊小食店再次進入每月10強。唔少人平日嚟都要排隊買嘅就係呢度嘅腸粉，貪佢手拉有米香，品質水準Keep到，醬料落得夠多，而且一份4條都係$7咋！清甜無渣嘅蘿蔔同真材實料嘅冬菇豬肉燒賣都係推介。平靚正得嚟又醫到肚，嚟到深水埗的確要一試。
Photos by chungyin1228 & 技巧樹熊第9位 Bondi（*新上榜）
近年荔枝角工廈進駐咗唔少隱世優質餐廳，呢間以澳洲做主題嘅西餐廳就係其中之一。環境闊落企理得嚟食物水準亦唔錯，蟹皇意大利飯配軟殻蟹採用正宗做法，米粒外軟有硬芯，咬落特別有嚼勁，蟹皇汁香濃而軟殼蟹亦香脆唔油膩。烤焗豬鞍架配秘制蘇梅醬配搭得宜，酸酸甜甜嘅蘇梅醬同肉質嫩滑嘅豬鞍非常夾，加埋香甜紫薯蓉夠飽肚。
Photos by milosecar & miss 123第8位 康瑞涼茶（*新上榜）
呢個暑假手工芋圓大熱，平民天堂葵廣同有香港小士林之稱嘅太安樓都有芋圓食，不過最後跑出嘅，係深水埗呢間藏身於中醫館嘅涼茶店！一份特式仙草百配就有齊芋圓、地瓜圓、小丸子、仙草凍、薏仁、西米、紅豆等，手工芋圓同地瓜圓煙韌彈牙，同滑溜軟滑嘅仙草凍可以話係絕配，味道清甜自然。小店座位有限，建議外賣拎走慢慢嘆。
Photos by ChloeLeung9775 & alwaysweetooth第7位 HeSheEat
因為一個電視節目介紹，令到銅鑼灣呢間餐廳再次衝上十強榜。睇返食評，唔少客人都同意佢已經由甜品Cafe轉型做一間正餐甜品飲品一站式滿足哂嘅西餐廳。焗龍蝦仔黑魚子牛角包配薯條及沙律有酥脆牛角包配分量十足嘅而且隻隻彈牙嘅龍蝦仔同脆卜卜嘅黑魚子，非常滋味。加多碟外脆內軟又有蛋香嘅綠茶窩夫做甜品，心滿意足。
Photos by mjqueen7e & 肚餓的遊戲第6位 良記餐廳(老鳳冰室)（*新上榜）
深水埗懷舊裝修嘅新派冰室，將港人嘅集體回憶茶餐廳嚟個新玩法。原味波波奶茶有兩大粒奶茶冰球，有食家建議整碎個奶茶波一齊飲，特別濃郁之餘又有沙冰口感。黑松露炒蛋多士唔單止有厚身炒滑蛋，上面仲加咗香噴噴嘅黑松露醬，連埋烘過嘅脆口多士一齊食，一邊嗌邪惡一邊心思思諗緊幾時再嚟Encore。
Photos by tandco & weishirizhi第5位 霸嗎拉麵
呢間拉麵店每次行過都係排晒長龍嘅，開飯仔試過去食都要排起碼半個鐘，咁多人食抵佢第3次上榜嘅。呢度嘅雞肉叉燒應該唔使我再多講啦，唔好畀佢嘅視覺呃咗你嘅味覺。拉麵湯底幾濃，不過份量唔算好多，大食少少嘅應該一碗唔夠，叫多碟小食，沙拉唐揚炸雞唔錯，炸完都唔太乾，如果再多啲沙律醬會再開心啲。
Photos by lucywu & 王大敏第4位 Three Dice Kitchen （*新上榜）
第一次上榜嘅分子料理餐廳，原來價錢都唔算話太貴，二百零蚊都可以食到餐。有機會嚟試嘅話，留意下哈密瓜分子晶球配西班牙黑毛豬火腿，餸名好長但道菜其實係得一粒波，樣靚味都夠甜。另一道幾特別嘅係用咗椰菜花整嘅龍蝦慕絲，面頭嘅慕絲龍蝦味濃，混咗少少魚子醬，嗶到底就係椰菜花碎，唔食都唔知夾。
Photos by CentiMetre & hihi1234567890第3位 The Little Corner
連續兩個月上榜，證明香港人都真係好鍾意食雪糕。呢間嘅雪糕仲要係用Heogaarden 玫瑰味整嘅紅桑莓啤酒雪糕，酸得嚟帶有酒味，但加埋topping嘅朱古力爆炸糖之類，又有埋應有嘅甜味。另外8月份仲有靜岡焙茶、大阿蘇牛乳同實生柚子幾隻味，9月就唔知喇。
Photos by eddie_ilovefood777 & patfish521第2位 CHOO CHOO
大家就算冇食過，但對呢間長沙灣嘅餐廳應該唔會感到陌生。冇錯，就係嗰間用火車做主題，卡位同似火車卡嗰間餐廳。潮流興慢煮，呢度就有慢煮三文魚柳，要健康啲但又唔想太dry，就有芥末籽燒雞牛油果沙律配溏心蛋，一碟有晒幾款餸，啱晒貪心鬼。不妨嗌多杯嘢飲，mixed burry啱唔啱？你多數都會想用嚟呃like，事關係用燈泡裝住㗎，個杯墊仲要係地圖，好符合環境嘅設定。
Photos by lokyanyan & 傻大姐中的傻小妹第1位 沙拉姆咖喱屋（*新上榜）
嚟到8月嘅第1位，係印度咖喱菜呀！講起印度嘢，唔係薄餅就係咖喱，冇錯，嚟到都係要試呢兩樣。話說薄餅除咗原味同咖喱味，仲有隻會引起尖叫嘅芝士味，薄餅中間堅係夾住一大塊芝士喺中間㗎！至於咖喱就有白咖喱都幾推介，少辣，配羊幾好。仲有印度烤雞，鐵板上㗎，酸辣甜味集於一身，因為加埋yogurt落去整嘛，又幾特別。
Photos by edmond890 & 碌地沙文：Kar、Cathy
隨時接收最新資訊
讚好OpenRice專頁！
