8月份好評餐廳十強
2022-09-07

又到每月數榜時間,要喺同行餐廳中突圍而出,獲得大眾好評,用心製作食物就梗啦,另外,創新嘅諗法都好重要架。今次上榜嘅餐廳,就有唔少特別嘅菜式配搭,好似雞皮餃子、芒果魯肉飯同麻辣牛肉燒賣等。

第10位  直燒和牛商店(*新上榜)

 圖:berber0201Kayeeeeb

主打熱石石燒和牛嘅呢間燒肉店,最抵玩係有得任食吉列牛脷,可以無限追加!一碟牛脷本身已經圍滿成隻碟咁好壯觀,每邊輕輕燒一燒就食得,肉質軟嫩。另外推介雞皮餃子,用脆卜卜嘅雞皮包住肉碎,特別酥脆。

第9位 麵賜園(*新上榜)   

 圖:faiton513Kathy200

呢間café嘅特別,食港式牛筋牛腩麵食,但又有高質本地焙烘咖啡,完全好似冇關係嘅兩樣嘢又夾得埋一齊喎。去到唔想揀就嗌牛隊長湯麵啦,一次過食晒4款唔同牛嘅部位,包括牛肚、牛筋、牛腩同澳洲和牛封門柳。鮮牛骨湯底用咗成幾十斤牛骨去熬6個鐘架,仲加埋腩肉同藥材,唔係邊得嚟咁濃味,兼自帶甜香?

第8位  Follow(*新上榜)  

 圖:di_nosaur_aryboulo_bao

木系裝潢嘅西餐廳係有啲feel嘅,入到去見到枱枱都有碟搶晒火嘅德國火焰豬手,當然都唔可以執輸啦。店員會喺客人面前即席澆酒點火燒豬手,記得準備好boomerang了。燒完即食,皮脆肉厚。另外有道幾特別嘅配搭:酸奶忌廉封門柳手工闊條麵,creamy得嚟帶微酸,口感豐富。

訂座預付套餐:意式情迷火焰豬手2人餐 86折   (按此預訂)

第7位  辛手村(*新上榜) 

 圖:eunicehau0802ericalo12

旺角川式串燒干鍋店,夾埋有30幾款川式同日式川燒揀,多數都係辣辣地嘅,辛燒魚腐串係推介, 仲有日式燒鰻魚,兩串都勁香。干鍋可以自選幾款食材,不過怕辣嘅朋友仔就要慎重考慮下,麻辣味都幾刺激,就算溝埋咗黑松露嘅麻辣黑松露干鍋,松露嘅香味依然唔能夠蓋掩到川辣嘅感覺,但嗜辣嘅朋友仔就會食得好過癮。

第6位 啖啖燕窩(*新上榜) 

 圖:Keilwkheaeatwalk

觀塘呢間養生燉品店近期人氣急升,有多款燕窩同其他養生甜品供應。主打嘅雪燕可以配搭唔同嘅生果,8月盛夏最受歡迎就梗係限量嘅日本山梨縣水蜜桃,清甜可口。花膠仲有得揀要麻辣版,過足口癮。

第5位  La Moo Moo' s Steak and Fries

 圖:Nei bbPoorjjfoodie

呢間扒房嘅選擇唔多,但就係夠精夠專。個個去親都實揀安格斯肉眼扒,大大份又Juicy,牛肉味又濃,牛魔王表示滿意。而且跟配嘅幼身薯條仲可以無限encore,非常抵食。

第4位  井巷子 by 鋒膳(*新上榜)

 圖:lankiman6330food_bearbear

又一間辣辣川菜上榜,佢哋嘅招牌菜係成都青湯水煮魚,用上4種唔同辣椒製作,麻香強烈。片皮鴨亦係必食之列,皮香肉嫩,最特別係會加入金奇異果同哈密瓜,油膩感即刻輕咗。麻婆嫩豆腐伴炸饅頭又係索晒啲辣汁之後,慢慢享受嗰份刺激感嘅菜式,每款菜式都花上心思創作,絕對值得入圍。

第3位  舍利鮨

 圖:Msdevilsiushanlamlamfood1

廚師發辦係近年冇得去日本後,深受港人擁戴嘅餐廳類型。呢間喺元朗,裝修充滿日本特色,座位闊落,師傅仲會好細心咁同客人講解菜式同交流,氣氛相當唔錯。刺身、壽司等食材新鮮,特別一提呢度有一夜干香魚,肉質有彈性。

第2位  壹.01(*新上榜)   

 圖:hun9gryhk.good.food

台灣菜必食魯肉飯,呢間啲魯肉飯就夠晒特別,加埋芒果落去變咗芒果魯肉飯,一甜一鹹但你估唔到又幾夾,清甜嘅芒果有助中和返重口味嘅肉香,愈食愈開胃。小食不妨揀拉絲芝士火腿蛋餅,分分鐘有驚喜畀到你!

第1位  龍點心    

 圖:wlamkcwaisikmao.

今時今日,創意真係好重要。榜首呢間點心店,就係憑創意上位。將傳統點心重新包裝,燒賣變龍蝦汁墨魚燒賣同麻辣牛肉燒賣、腸粉變咗粉紅色,蝦餃都可以加酸菜魚,吸睛又開胃。另外有個豆腐布丁都好得意,淋上熱情果醬,酸甜有致。


文:Kar



關鍵字
十強
十強報榜
十強好評
旺角
元朗
觀塘
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2022生日優惠】持續更新!12月壽星嘆免費生日蛋糕、甜品
2022-12-02
【隨時更新】零食速報 每周新款零食、酒品點評
4天前
神還原韓國復古大排檔!大角咀新打卡餐廳 必點招牌醬油蟹醬油蝦
2022-11-17
【2022聖誕】又食又玩 聖誕市集巡禮
2022-11-28
5大叻沙推薦!鮮甜龍蝦喇沙、娘惹風濃湯口味
2022-11-18