8月份好評餐廳十強
2020-09-09

喺禁晚巿堂食同二人限聚令下嘅8月,餐飲業界繼續苦苦堅持,香港人嘅用餐習慣亦要有所改變。以下嘅餐廳能夠跑入十強,絕對唔容易,當中有唔少都係茶飲或輕食店呢。

第10位  Twist & Buckle Churros Specialists (*新上榜)

 圖:hnhnfoodieKellyC.

呢間啱啱先開業嘅Churro專門店,立馬就喺十強榜內佔一席位,可以見到香港人對churros嘅熱愛程度有幾高。冇計啦,香港一嚟本身好少churros專門店(以前有過又執咗),二嚟又冇得飛,所以好多朋友仔知道有新嘅正宗churro店開業就好興奮啦。加上佢哋嘅churros全部都整得好靚,又有色彩繽紛嘅糖衣又配雪糕咁,係吸引嘅。

第9位   Superhooman (*新上榜)

 圖:foodie_bunnychau fanny

同樣都係新開業冇耐就上榜嘅餐廳,以pet friendly作招徠,吸引到一眾毛孩主人帶埋毛孩去朝聖。呢度嘅甜品絕對係打卡之選,特別推介鬆軟小班戟配山楂士多啤梨汁及雪糕,pancake鬆軟,整體酸酸甜甜,冷熱交融。

第8位    Nuttea (*新上榜)

 圖:chillwithpolafhoikiwong522

以腰果、核桃、杏仁、榛果、 夏威夷果5種堅果,配搭台灣紅玉紅茶製成嘅堅果茶,健康得嚟又好飲,啖啖都係濃郁嘅堅果香,最緊要係唔使怕肥。紫紅色嘅繽紛火龍果奶蓋茶 相當受女生歡迎,鹹鹹甜甜嘅奶蓋夠晒creamy,火龍果汁又清甜,清新解渴。

第7位  蕃茄仔   (*新上榜)

 圖:silverthoughtsGWlovefood

香港有唔少蕃茄控,呢間以蕃茄湯做主打嘅餐廳就啱晒佢哋。製作充滿誠意,蕃茄味濃香得嚟,仲要可以食到粒粒蕃茄蓉,就連冷麵都有蕃茄湯底呢。配料有約十款選擇,包括安格斯牛肩胛、烤厚鰻魚等。

第6位   汴京茶寮 (*新上榜)

 圖:soya1314igfoodtaste

起源於澳門,佔地2000呎嘅茶室,空間寬廠,好適合各位茶迷去享受慢活嘅嘆茶時光。主打多款日本、中國茶,當中部分更係同當地茶農獨家合作嘅茶飲!另外特濃抹茶雪糕茶味濃郁,回甘突出,深得抹茶控歡心。和菓子仲要超靚,由日本職人手工製作,微甜配茶一流。

第5位    HAND3AG

 圖:fattyfoodie.kJohnnakawai

隔咗一個月再度上榜嘅鐵板三文治店,每款三文治嘅配搭都充滿新鮮感同創意。有啲會夾住拉麵同叉燒,可以拎住嚟食嘅拉麵感覺都幾得意。掛住旅行感覺嘅話可以試早安西西里鐵板三文治,餡料充滿西西里島特色,有甜酸燴菜、厚燒蔬菜奄列、馬蘇里拉芝士等,酸甜開胃。

第4位   古早牛肉麵

 圖:sweetiepeachhilda gunso

 呢度嘅紅燒牛肉麵個湯底,用成80斤牛骨同蔬菜熬成,肉味當然香啦,仲有淡淡嘅藥膳味道,層次豐富。麵條煙靭彈牙,掛湯力高。鍾意香口嘢嘅話實會鍾意鹽酥雞扒肉燥便當,大大塊雞扒,外脆內嫩,陣陣鹹香,好惹味。

第3位   Boholic (*新上榜) 

 圖:food.chroniclenoknokyuen

長沙灣一帶近年多咗好多文青café,呢間就行波希米亞風嘅,主打多國菜。餐牌選擇豐富,咩都想食啲又唔想諗嘅話,叫個小食拼盤就啱晒,mini burger又有,炸魚、薯條、雞翼等全部都有,一次過滿足幾個願望。

訂座優惠:消費滿$300全單85折

第2位  SuperNormal   

 圖:A homemade foodie波子V V

去到呢間位於九龍灣嘅酒吧餐廳,招牌麥啤脆皮德國鹹豬手係必食item,豬手用啤酒浸過再焗,再喺面頭噴多層麥啤,又香又脆,記得要點埋柚子醬食,精髓嚟。就算外賣走都無損佢嘅惹味程度。另外推介香煎鵝肝露筍牛肝菌意大利飯,滿口脂香。

第1位   阿木台灣麵  

 圖:mylittlegourmandleetszhin

係台灣嘅味道呀!呢間由台灣人主理嘅正宗台灣菜餐廳,已經係第3次上榜喇,仲坐埋榜首添。無論咩時間想去食,門口都會有條人龍喺度嘅就知佢有幾受歡迎。麵條每日手工製作,彈牙爽口,湯底用牛骨牛肉同藥材等熬成廿個鐘,梗係入味啦,所以紅燒牛肉牛筋麵絕對係必食。另外芝士肉鬆蛋餅都混合咗兩種雞蛋去製作,即叫即做,蛋香味濃。


文:Kar

關鍵字
十強
十強名單
報榜
旺角
台灣菜
九龍灣
長沙灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
2天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11