7月份好評餐廳十強
2020-08-06

正當以為飲食業開始復甦之際,第三輪疫情又來襲,政府對食店嘅措施再次收緊,甚至一度全日禁堂食,一眾餐廳叫苦連天。喺7月入到十強嘅餐廳,都唔容易啊,希望各位行家都可以撐得過啦。

第10位  Outdark 

 圖:loverabbit1314gchi.hk

長期人氣之選嘅旺角韓國炸雞店,即使喺疫情下仍然有大量捧場客。5款口味嘅炸雞固然吸引,香蒜蜜糖味夠晒甜香,外皮脆口嘅同時入面仲係juicy肉汁。另外都可以試下海鮮煎餅,相當足料,好有口感。

訂座優惠:全單9折優惠 或 學生可享85折優惠

第9位  雅 ‧悠蔬食(*新上榜)  

 圖:gigileungg_eatateeaten_hk_

裝修型格嘅新式素菜店,款款菜式都色香味俱全,打破素菜沉悶嘅格局。最有驚喜嘅係香芒牛油果手卷,啖啖清新苜蓿芽,好多回頭客唔多唔少都係因為佢呢。椰香冬蔭鮮蔬意大利飯口感creamy,陣陣酸辣甜嘅冬蔭功香。疫情下人人都想食得健康啲,呢個水準要打入十強,唔難吖。

第8位 Contrast(*新上榜)

 圖:RheaChim

走黑白型格風嘅café,就連食物都係咁大contrast。特別推介糯米窩夫配自家製牛奶雪條,一黑一白,打卡啱晒。窩夫以糯米粉加竹炭粉製係,有淡淡米香得嚟,口感又濕潤煙韌。自家製牛奶雪條亦係焦點所在,奶香濃郁。

第7位 Honbo(*新上榜)

 圖:mmnwilliamBorn.To.Eat

7月唔知係咪多咗人去南豐紗廠,入面嘅餐廳喺十強內佔咗兩個席位。其中一間就係呢間打入Bloomberg「全球最佳漢堡2020」嘅美式漢堡店。佢哋嘅漢堡包面香脆,牛肉肉汁香濃,連埋半溶芝士同醬汁等好夾;限定嘅炸蠔漢堡同樣出色。

第6位  KOKO Coffee Roaster(*新上榜)

 圖:sleepbeautyimbean2

另一間南豐紗廠店,就係佢,自家烘焙咖啡店。啡迷去到嘆杯ice drip,坐低放空半日絕對係種享受。有兩款咖啡豆選擇,喜歡酸酸地嘅果香啡迷可選Ethiopia咖啡豆,咖啡細滑,仲有強烈嘅after taste,層次豐富。要食嘢嘅話可以試下24小時慢煮日式醬油豬軟骨配珍珠米,軟腍香口。

第5位  Non Kitchen(*新上榜)  

 圖:ccchloeeewingshuen1123

觀塘太多好餐廳,今次輪到呢間上榜,空間感大,環境闊落,啱晒呢期去。去得當然要食牛扒,炭燒安格斯西冷,燒得好靚,肉質軟腍,啖啖肉汁。黑松露野菌薄餅 好足料,仲好多火箭菜,加黑醋做醬汁,幾開胃。

第4位 阿木台灣麵 

圖:foodiechans笨小主

好耐冇快閃過台灣,可以去住呢間由台灣人主題嘅小店先,除咗紅燒牛肉麵,蕃茄牛肉粗關廟麵都好值得試。湯底用牛骨、牛肉加埋新鮮蕃茄熬製,酸甜濃香,麵條彈牙。呢度仲有芋圓食添呀,煙煙韌韌,飯後要食甜品可以一站過。

第3位  HoiHoi Pancake House(*新上榜)

 圖:takoyakikknatfoodiary_

疫情都唔能夠阻擋香港人對日本梳乎厘班戟嘅熱情,第三位係被稱為「名古屋No.1行列店」嘅過江龍pancake店。法式焦糖梳乎厘班戟係香港限定,食材都由名古屋直送,質感軟滑,面層香脆,啖啖都係日本嘅味道啊。另外有供應夏威夷果仁忌廉班戟,同梳乎厘班戟嘅口感完全唔同,呢隻係帶有煙韌感der。

第2位 DAMA 

 圖:P.J.chloeyuen1122

主打健康輕食嘅舖頭,呢期特別吃香。雖然佢哋有好多雪糕同蛋糕,但絕不邪惡,雪糕係冇牛奶成分、純素嘅,而蛋糕則係低糖嘅。既能滿足想食甜食嘅慾望,又唔使怕肥,nice~ 推介鹹蛋黃心太軟,滿滿鹹香。

第1位  韓閣(*新上榜)

 圖:chowkayibonobo

榜首呢間韓國菜餐廳,人氣一向高企,而且幾乎枱枱都會叫碟芝士岩漿炒飯。鐵板上,一大圈半溶芝士圍住晒中間嘅飯,仲可以不斷做到拉絲。炒飯夾有泡菜,辣辣地撈埋芝士好惹味,你以為好大碟咩但你會食得晒。仲有亞之媽炸雞外脆內嫩,辣得嚟有甜味中和返,都係必食。


文:Kar


關鍵字
十強
十強名單
報榜
韓國菜
日本菜
芝士
荃灣
旺角
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
1天前
悠閒時光 9月份下午茶推介
2020-09-02
【2020中秋】台式流心奶皇、電車限量版月餅 早鳥優惠及限量預購精選集合 (不斷更新)
2020-08-20
飲得嘅抹茶富士山!日式茶室旺角重開 必試抹茶系列、焦糖布甸拿鐵
2020-09-10