6月份好評餐廳十強
2023-07-07

2023年話咁快就過咗一半,呢半年有冇食咗咩好嘢?睇下6月好評有咩餐廳上榜,計劃下嚟緊暑假去邊開餐啦。

第10位  小野人(*新上榜)   

 圖:hilda gunsosnorlaxolaf

將軍澳少有嘅串燒店,最窩心嘅位係每枱仲會有個爐仔可以keep住為串燒保溫,即使食到最尾都唔會凍晒,係值得加分嘅。串燒款式多樣,推介芝士烤生蠔同大漠烤羊肉串,前者生蠔肥美又juicy,仲有拉絲效果:後者香味十足,鍾意食羊嘅朋友嚟到記住試。

第9位  The Old Book Store by The So Lonely Club(*新上榜) 

 圖:jamieatingfoodstalkers_hk

銅鑼灣呢間玩味十足嘅café,裝修以木系為主,而且帶有英倫復古書店嘅感覺,絕對係打卡勝地。幾乎枱枱都會嗌嘅青檸凍的蜆,冰爽感十足,味道酸酸辣辣,好啱夏天食。Pizza比較特別嘅有鵪鶉蛋肉鬆比薩,批邊脆口帶焦香,鹹甜有致。飲嘢方面必選近期大熱嘅開心果系列,有開心果奶蓋咖啡,開心果味都幾濃架。

第8位  坡椰坡囉咪(*新上榜) 

 圖:yoooosifrostiewithfood

想喺灣仔搵間相對冇咁貴嘅餐廳,呢間新加坡菜可能都係其中一個選擇,唔少試過嘅朋友都稱讚性價比高、價錢親民。肉骨茶係新加坡名物,嚟到當然要嗌下。藥材味濃郁,叫個餐有飯有肉仲有油炸鬼同油菜,真心幾抵。另外推介可試焗咖喱農夫包,包身外脆內軟,淋埋咖喱汁上去食真係一流,咖喱微辣惹味。

第7位  The Pantry & Chips Republic(*新上榜)

 圖:cookandbakeladycyrus1818

位於旺角嘅日式西餐廳,坐擁地理之利,閒時lunch都會見到有人排隊。意粉、漢堡等主食固然有水準,但重點記得放返喺甜品度,尤其是梳乎厘厚班戟,可以話係必嗌。Pancake有多款口味選擇,全部即叫即做。Tiramisu嗰款撒滿朱古力粉,仲有配咖啡糖漿、咖啡忌麻同慕絲,陣陣啡香;焦糖燉蛋款亦相當受歡迎,甜品控請留肚。

第6位  TAP - The Ale Project(*新上榜) 

 圖:fatbelly.foodiesfoodiehkboy

旺角呢間精釀啤酒餐廳,係好多精釀迷嘅飯堂,無論酒水定係食物都好有水準,要chill out嚟呢度就啱晒。多個tap頭會不定期更換酒款,外國定本地嘅啤酒都有。炸雞翼配腐乳醬、蔥油漬蠔、黃金薯條等都係推介嘅佐酒小食。要食正餐嘅,荽人就梗係揀炸茜漢堡,另外特別推介Smash Burger,唔係好多地方食到,亦唔係好多地方整得好食,但呢度嘅漢堡煎到個邊邊真係好鬼脆,中間一咬又有肉汁咇出嚟,值得一試。

第5位  GRIND SIZE

 圖: _.foodism._Eathkgirls

打卡café向來係十大榜嘅常客,旺角呢間純白裝修搭乾花裝飾嘅café再度上榜,樓高兩層,樓上嗰層仲有塌塌米兼 #見字飲啡 牆,係最搶手嘅打卡位。呢度嘅甜品做得唔錯,心太軟係凍檸茶味都幾特別,茶味香濃但又唔會好甜,配埋檸檬雪葩幾清新;另外髒髒牛角包窩夫賣相亦係打卡之作,牛角包鬆脆,夾埋朱古力味道唔錯。

第4位  Homeland(*新上榜)   

 圖:momo__lovegdpoint

大埔本店以前係十強榨嘅常客,荃灣嘅分店終於都上埋榜。荃灣店同樣裝修得七彩繽紛,一入到去個人嘅心情都舒暢啲。冬陰公赤蝦闊麵啖啖椰香,小辣幾開胃;龍蝦汁鐵鍋海鮮炒飯則擺盤夠晒吸引,青口、蜆、鮮蝦全部大大隻舖晒喺飯面,好豐富。

第3位  Mr. K Pizza N Chicken   

 圖:Big_Kyatis

人多嚟食開心啲,因為pizza、炸雞全部都好啱share,人多啲可以試到多啲款。彩虹炸雞配芝士包就可以試勻晒8款味道嘅炸雞,蒜香蜜糖呀泡菜蛋黃呀全部都好惹味。炸雞粉漿薄薄地,雞皮脆卜卜,雞肉仲係嫩嘅,最過份係點埋農夫包內嘅芝士一齊食,係滿足感。海鮮狂熱芝加哥薄餅以黑糖包做底,超多海鮮料,批邊仲有蜜糖醬同勁量芝士,口感好豐富。

第2位  荷華庭園景餐廳(*新上榜) 

 圖:lst.aauncommon.common

大埔呢間餐廳絕對係靚景首選,既可親親大自然,有庭園有錦鯉魚,又有小木屋等用餐位置,每個角落都係打卡位。好多人都好鍾意呢度嘅酥皮龍蝦湯焗蒜茸包,因為勁足料,有粒粒龍蝦肉食到,酥皮亦夠酥化。肉食獸建議可選燒美國牛小排,厚身得嚟肉質仍然嫩滑,肉味仲好香添。

第1位  Starò(*新上榜) 

 圖:leetszhineatwithdumbo

以星空為主題嘅酒吧餐廳,裝修浪漫至極,火速成為IG寵兒。設有海鮮魚缸,所以啲海鮮全部都好新鮮,鮮拆龍蝦手工闊條麵啲龍蝦肉好鮮甜,闊條麵煙韌彈牙仲好掛汁,啖啖都係香濃嘅龍蝦醬味。芝士控就無懸念,一定係傳統四式芝士手工薄餅,芝士味鹹香濃烈,食完有種幸福感。


文:Kar


關鍵字
十強
十強名單
十強報榜
旺角
尖沙咀
大埔
灣仔
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2024生日餐飲優惠放送
2024-06-04
【隨時更新】最後倒數!2024即將結業人氣/老字號餐廳
2024-06-04
【2024新店精選】6月更新! 嘆和風鰻魚飯、雞白湯拉麵
3天前
【隨時更新】零食速報 每周新款零食、酒品點評
2024-06-11
香港4大西班牙餐廳推介 屹立26年老字號、必食紅蝦熱狗
2024-06-07