6月份好評餐廳十強
2018-07-09

時間過得真係快,眨吓眼2018年已經過咗一半喇!唔知大家有冇留意到,6月飲食界被一種食品…應該係飲品攻陷咗!就係台灣嘅珍珠奶茶、黑糖鮮奶!大大話話開咗十幾廿間,你又有冇飲過?今個月嘅新餐廳氣勢好強,而今個月嘅冠軍,毫無懸念係你喇。即刻睇睇龍虎榜名單先:


第10位    玖五牛肉麵

太多新餐廳,將上月榜首位置嘅超蓮牛肉麵打落第十位,雖然唔少食評話貴,但人氣仍然不減。牛肉麵有紅燒、麻辣同蕃茄,湯底濃郁無味精,配料亦燉得腍身軟滑,材料都係由台灣直送,小食好似係麻辣鴨血、滷味等都好有台灣風味架。

圖:emilykaaachowsmall.food


第9位      Shake Shack

同上月穩佔同一位置,呢間來自紐約嘅漢堡店,想食繼續排隊啦!幾乎人人都係為咗Shack Stack而嚟,餡料有芝士、牛肉、炸芝士大啡菇、蕃茄、生菜同秘製醬汁,牛味重,大啡菇有流心芝士同埋香脆,配埋芝士波浪薯條同埋奶昔,邪惡度係十分滿分。

圖:lamlamyukmibbykay


第8位    篤篤車 (*新上榜)

呢間元朗開咗冇耐嘅麵店,將港式平民美食車仔麵加入新元素,竟然有泰國鱷魚湯!湯底帶奶白色富鮮甜味,加埋杞子紅棗都幾滋補,另外仲有冬蔭功、咖喱同牛腩湯底。配料可以揀海鮮類,珍珠元貝、白蝦仁、青口、墨魚仔等,即刻升呢咗!

圖:yee128槐月


第7位    旺記冰室 (*新上榜)

呢間茶餐廳只係憑幾道招牌菜,由灣仔開到鰂魚涌,最近殺埋去九龍,人氣好勁!必吃嘅當然係自家製叉燒滑蛋飯,加咗北海道4.3牛奶炒成嘅雞蛋超滑,叉燒肥瘦適中,加埋甜甜哋豉油同葱花,仲可以搭蝦仁、牛肉,而鮮薑汁豬膶鮮雞湯通粉、特濃蕃茄湯都足料好味。

圖:LingLing.1201最愛麻辣火鍋


第6位    柞木炭家(*新上榜)

韓燒越來越講究,好似呢間開喺旺角新商場嘅韓式燒肉店,有得用木炭炭火燒,香氣味道同普通鐵板燒、電爐網燒真係完全唔同!用類都係高質韓牛,部位食法亦夠刁鑽,肋眼上蓋、唔同切法嘅牛舌三吃,仲有濟州黑毛豬添,吸引一眾燒肉迷爭住去試。

圖:donaldszeto31


第5位    爆丼丼(*新上榜)

日式丼keep住都係受歡迎嘅,今次上榜嘅係荃灣呢間小店勝在抵食,植上魚生丼 $148,有齊海膽、拖羅蓉、帆立貝同埋三文魚籽嘅四重爆丼都只賣$158,安格斯牛肉鵝肝丼亦只係$108。而且選擇豐富,所以成為荃灣街坊嘅新寵!

圖:小慳妹吃好西Michaeaw


第4位    橘焱胡同燒肉夜食

雖然微跌3位,但已經連續4個月上榜,呢間來自台灣嘅燒肉店後勁仍然好凌厲!講真燒肉其實間間大同小異,所以食材質素同穩定性等就係關鍵所在。難得橘焱胡同保持到水準,價錢雖然比台灣貴,但真係有置身當地嘅感覺,服務同埋吧枱炭爐都係亮點,唔知下個月又會唔會繼續長駐?

圖:choyibebe技巧樹熊


第3位    Athletic Juice & Espresso Bar(*新上榜)

香港飲食界要走得夠快,先可以突圍而出,呢間果汁咖啡店賣IG大熱嘅牛油果latte,成功引起話題,旋即打入三甲位置!Avolatte其實係牛油果挖空裝住latte,加埋果肉一齊食又幾夾,加上靚靚拉花最適合打卡!其實Avolatte係澳洲一位咖啡師玩笑,估唔到又真係大紅…

圖:soya1314IE食神俠侶


第2位    NINETYs(*新上榜)

香港咖啡界越來越有趣,精品咖啡店不停開,而呢間連食物都兼顧到。店主曾喺澳洲開設咖啡店,將當地風格帶返香港,食物味道好而且精緻賣相,咖啡亦係當地烘焙,加上簡約型格嘅室內設計,咁有性格嘅café,好難唔like!呢度一到周末就有長長人龍,想食網紅店就要有俾啲耐性喇。

圖:kei_desserteatmoreforyourself


第1位    老虎堂(*新上榜)

呢間來自台灣嘅茶飲店有幾紅相信睇到條人龍就已經知,係咩驅使你咁辛苦都仲去排成粒鐘呀?係黑糖波霸鮮奶呀!黑糖虎紋賣相係吸睛嘅,雖然早前殺出負面新聞話黑糖並非手炒,但仍無阻大家去朝聖,唔知仲要洗多幾耐板呢?

圖:tadafoodya412004



文:Perrins

關鍵字
十強
排行榜
珍珠奶茶
黑糖
咖啡
cafe
燒肉
韓燒
冰室
車仔麵
漢堡
burger
牛肉麵
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
兩位台灣媽媽返嚟啦!吃什麼中環新店直擊(有片)
2018-08-25
逐gram計錢! Meter主理日式鐵板熟成牛扒
2018-08-21
8月份好評餐廳十強
2018-09-06
4cm厚班戟+招牌刨冰抵港!京都人氣甜品銅鑼灣店直擊(有片)
2018-09-12
日本人氣大阪燒登陸旺角!席前炮製足料大阪燒+廣島燒(有片)
2018-08-30