6月份好評餐廳十強
2017-07-07

2017年貶下眼已經過咗一半,上半年嘅飲食界都算幾精彩,好多矚目餐廳隆重登場,亦創造咗唔少飲食潮流。好似今個月嘅走勢,好幾間餐廳都係最近流行嘅菜系代表,好似越式牛肉粉、吉列牛、餃子等等,即刻睇睇排行榜啦!


第10位 名館 (*新上榜)

網上瘋傳一張麻雀造型甜品嘅相,就係來自呢間摩登中菜館。菜式賣相精緻,好似宮延點心盤以圓型木架上枱,似足西式下午茶,創作點心銀湖天鵝酥、老鼠愛大米及北極熊仔包就以動物造型亮相,梗係要相機食先啦!除咗點心,亦有水煮、焗飯、燉湯等多款選擇,價錢以中環地段嚟都算抵食。

圖:mjqueen7etwinkle_crystal


第9位 Season Oyster & Wine Bar (*新上榜)

呢間蠔吧位置都幾偏,喺銅鑼灣與天后之間嘅信德街,所以食物價錢相對平啲。款式唔算多但抵食,每個月都有唔同優惠,好似之前曾推出過$9生蠔同$29法國蠔,吸引唔少生蠔控去試。生蠔以外亦有其他嘢食,好似凍海鮮、海膽多士、雞翼等小食,主菜就有意粉、薄餅同扒類,仲有唔少酒可以配蠔。

圖:SelinatsoiAlex cheung1113


第8位 坂奈 (*新上榜)

豊海鮮丼喺隔離開咗間日式燒魚專門店,只得一排幾個對住開放式廚房嘅吧座,似日式食堂feel。每日約有十款魚可以揀,有日本來貨嘅BB喜之次、吞拿魚腦天、竹籤魚、鯛魚同鯖魚等等,油脂、肉質同味道各有所長。所有魚都係原條即叫即燒,火光熊熊好有氣氛,魚皮燒到脆身香口,魚肉仲係又滑又juicy。

圖:bridalskelvinfoodki


第7位 Pho 778 (*新上榜)

呢排多咗好幾間越南餐廳,而呢間小店嘅老闆由加拿大回流,主打當地嘅越式牛肉河。安格斯牛肉河肉味重肉質嫩滑,湯底呈啡色,入口濃郁而且有少少藥材味。仲有食牛河必有嘅芽菜、九層塔、青檸同辣椒等配料,加埋是拉差辣醬,就係北美嘅食法!因為抵食又好味,每晚都有長長人龍。

圖:天財Cherry Sk


第6位 九份•十分 (*新上榜)

台灣菜都係香港人最愛之一,沙田河畔呢間新台式餐廳相當,招牌菜紅燒牛肉麵,牛肉入味,連牛筋都燜得好腍。鹽酥雞配埋六種調味粉,有芝士、原味、咖哩、梅子、香辣同紫菜味,用試管裝住好特別!其他食物包括厚多士、甜品就有窩夫同大大杯嘅沙冰,食完真係會掛住台灣架。

圖:ccrreami小砂糖


第5位  風雲丸

呢間日本過江龍沾麵店,連續兩個月都上榜。主打豚骨魚介湯,個湯底用咗兩種豬骨湯、再加魚介粉、魚介醬油等落足料去熬㗎,上枱之前仲會加埋現場即磨嘅魚介粉,啲味唔濃郁就奇喇。每條沾麵沾落去,都索晒啲精華,最尾記住要追加香鬆飯呀。

圖:City Tribechanging


第4位  吉列牛忌廉烏冬專門店 (*新上榜)

位於旺角嘅呢間吉列牛店,由韓國開到過嚟香港。嚟到唔使諗,食吉列牛,食忌廉烏冬。牛肉上枱之前都輕輕炸過下嘅,但最後嗰步都係交由食客,自己夾上塊鐵板度燒多燒,想要幾成熟可以自己控制。點秘製沙律醬、豉油同wasabi食係幾香口。而忌廉烏冬就係忌廉加烏冬,仲混入咗薯蓉,奶香味都幾突出。

圖:為食妹hckeudrat


第3位  芝樂坊餐廳

稍稍回落兩級,但依然保持三甲位置嘅The Cheesecake Factory,人氣都仲係好高企,想去食嘅要預多少少時間等位,又或者選擇外賣。佢哋嘅menu有超過200幾款主食同30款甜品,選擇困難症嘅朋友,推介可以試芝樂坊漢堡,長漢堡夾住大蕃茄、烤洋蔥、車打芝士、牛肉漢堡扒,超厚超足料,幾juicy,蛋糕就可以試下Tiramisu呀。BTW,提多句,佢哋每樣嘢嘅份量都幾大㗎。

圖:Hoilam12kennistpm


第2位  餃掂手工餃子雲吞專門店

呢間餃子店,由上個月嘅第9位,躍升到今個月嘅第2位,同佢哋多款特色餃子不無關係。龍鳳松茸雙灼餃係將松茸豬肉餡混埋黑松露、白松露,幾香呀,唔使加醬都夠味,當然如果你鍾意加都得,每張枱都有好多款醬汁喺度:青瓜呀、四川麻辣呀、芝麻呀、香辣呀之類。

圖:野藤麻sophronia1995


第1位 Meat King (*新上榜)

榮登6月榜首嘅Meat King,係第一次上榜㗎咋。呢度係食和風漢堡扒嘅,每塊都厚厚der,配上唔同嘅醬汁同食材,配搭多變。最受歡迎之一嘅漢堡扒應該係溫泉蛋他他汁漢堡扒,賣相吸引,洋蔥圈圍住溫泉蛋,輕輕拮一拮,蛋黃汁湧流出嚟好有畫面,仲令人好有食慾。塊扒本身肉汁都多,加埋酸酸甜甜嘅他他醬同辣辣地嘅洋蔥,層次豐富。

圖:lokyanyanfoodsearcher87


文:Perrins、Kar


關鍵字
十強
排行榜
餃子
沾麵
旺角
太子
尖沙咀
吉列牛
漢堡
甜品
台灣菜
牛肉河
生蠔
點心
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22