6月份好評餐廳十強
2016-07-07
2016年咁就過咗一半,去到6月,十強嘅走勢都幾平均,甜品店、西餐、串燒、拉麵甚至bar都榜上有名,百花齊放。對食家嚟講,當然希望有愈嚟愈多唔同類型嘅餐廳出現啦。不過值得一提嘅係,當中有一間餐廳已經係第10次上榜喇,受歡迎程度可見一斑。

第10位  串燒咖啡(*新上榜)

唔知係咪因為大學生Sem Break加上中學生放暑假,多咗人嚟OpenRice搵啱哂Gathering嘅Cafe。呢間樓上Cafe喺聚腳點旺角,有Board Game玩有嘢飲之外,仲有樓上Cafe少見嘅串燒!串燒選擇由海鮮、肉類到蔬菜都有,全部有板有眼而且環境企理唔洗食到成身油煙味,抵讃。另外方便開心Share嘅小食拼盤,或者飽肚嘅意粉飯類都有齊。甜品仲有抹茶窩夫同朱古力香蕉鬆餅配雪糕揀,連甜品胃都照顧埋。


Photos by <IVY>


第9位  Moreish & Malt(*新上榜)

觀塘工廠區越嚟越多優質餐廳,呢間會唔會都係你嘅心頭好之一?餐廳樓底夠高而且枱同枱之間唔太逼,空間感十足,嗌多支手工啤酒更有身處Soho區嘅感覺。睇睇個Menu,菜式以西餐為主,最多食家推介嘅美國西冷牛扒大大份,網燒牛扒切開肉質細嫩唔嚡,食肉獸實滿足。Happy Hour時段仲有小食拼盤加任飲Sapporo啤酒嘅套餐,水牛城辣雞翼香辣惹味,粗炸薯條外脆內糯,CP值高。


Photos by 小年糕


第8位  Grill ขุนทอง

呢間蘭桂坊泰式串燒店Grill ขุนทอง最近新出咗個抵食嘅特別版串燒盒,可以自己揀8串雞、牛或豬,難怪係炎炎夏日重新登上10強榜。串燒紙盒乾淨企理之餘仲有保溫作用,串串都啖啖肉好滋味,加埋特製醬汁例如沙嗲醬或者芫茜酸辣醬更惹味。仲有其他串燒,特別推介爽甜多汁嘅燒菠蘿,解暑一流!嗌多個海南雞飯當正餐,或者飲返支啤酒當Happy Hour都啱哂。


Photos by chloehahahaha


第7位  (*新上榜)

之前喺佐敦賣抹茶蛋卷嘅宏,今年搬到尖沙咀一間商場裡面變身Cafe,抹茶甜品同鹹食都有。夏日炎炎,正餐可以先嚟一客冷烏冬,烏冬特別加入海藻粉同小麥,口感豐富。重頭戲甜品方面,招牌抹茶蛋卷嘅蛋糕扎實豐盈,抹茶忌廉有茶香之餘又唔澀,屬於比較輕盈嘅口味。心多多嘅朋友仔可以嗌抹茶甜品Set,有迷你版嘅抹茶蛋卷再加其他抹茶甜品,夠豐富。最後嗌多杯宇治抹茶軟雪糕芭菲,無論你係抹茶控定甜魔都應該夠滿足。


Photos by cutely3001 & ayoying


第6位  Deer Kitchen(*新上榜)

又一間觀塘工廈食肆,呢間以鹿為裝修主題嘅西餐廳有種小清新感覺,可以畀大家好好relax一下以外,食物出品亦相當出色。前菜、沙律、小食、薄餅、主菜等一應俱全。最多人食嘅黑松露野菌意大利飯有香濃黑松露加分,野菌味道亦同樣突出,意大利飯飯芯有少少硬,夠Chewy。火焰黑毛豬肋骨仲係即席喺你面前用火燒,燒到外面微焦香脆,難得係肉質依然嫩滑,帶少少酒香更滋味。


Photos by 八寶飯團 & 聽見下雨的聲音


第5位  Channel 3 Tapas Bar & Restaurant(*新上榜)

有時收工想同朋友飲返杯,唔想下下過海落老蘭嘅,可以試下太子呢間吧。脆脆粟米片無限refill,主食揀豬手或者pizza吖,豬手夠晒juicy。如果唔係叫返幾碟輕食都唔錯,忌廉芝士煙三文魚波幾香口。不過落得吧當然要嗌返杯嘢飲啦,夏天飲Sangria係爽歪歪嘅,另外有杯叫sweet day嘅,女仔應該幾鍾意,係似益力多味嘅cocktail。


Photos by icecreamhk & ★朱迪☆


第4位   HeSheEat

第10次上榜喇喂,HeSheEat無論係甜品定鹹食都保持到一定嘅水準,門口長期都有人龍排隊嘅。如果你嚟開都係食甜品嘅話,下次不妨試下佢嘅墨魚汁魷魚扁意粉,雖然會食到啲牙黑麻麻,但意粉彈牙魷魚香口,仲有少少辣。另外軟殼蟹沙律都唔錯,脆得嚟蟹肉又唔乾身,沙律菜又有啲西柚汁咁,酸酸地幾開胃。


Photos by KIKING3292 & ckm.carmen26


第3位   Ufufu Café(*新上榜)

上個月先新開嘅日本過江龍,一開就即刻打入三甲,來勢洶洶呀。不過佢飲品又多款、芭菲又多款揀,又好難怪佢咁受歡迎嘅。成30cm高嘅生日芭菲用嚟代替生日蛋糕都冇問題呀,一杯有成15球雪糕、6款生果咁多,其他豆腐花x芒果芭菲、港式鴛鴦芭菲(即係奶茶同咖啡)等等又咁特別,想試多幾款,一係多啲人食,一係就要去多幾轉喇。


Photos by kawingkam & apple


第2位   霸嗎拉麵

連續兩個月上榜,今個月仲上升多1位添。拉麵都幾多款揀,但其實主要都係揀辣定唔辣,炙燒豚肉定好似叉燒嘅雞肉叉燒拉麵,兩款各有特色,但無論邊款都好,隻溏心蛋係要講一講嘅,原隻上,真流心,仲好香甜,食完1隻係會想食多隻囉。


Photos by blessvicky & JJcaptain


第1位   屋喔

台式風味為主,盬酥雞呀三杯蝦呀溏心蛋呀珍珠奶茶呀等等都唔使我多介紹,不過佢嘅窩夫就都幾特別,係啤酒型嚟㗎,幾軟熟,而且唔止得個窩夫㗎,成碟仲有埋士多啤梨冬甩同士多啤梨雪糕,冬甩裡面都有層士多啤梨醬㗎,成件事都好pink~


Photos by 山區麵包王 & KATRINA_吃遍世界



文:Kar、Cathy

隨時接收最新資訊
讚好OpenRice專頁!
關鍵字
排行榜
芭菲
串燒
台灣菜
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
初夏清新之選 酒店芒果主題下午茶
2017-05-19
【開飯熱店入圍名單巡禮】渡過美好的小食甜點時光
2017-02-27
法式輕甜泡芙Pop-up店登陸尖沙咀(有片)
2017-04-07
3月份好評餐廳十強
2017-04-06
香港春季限定士多啤梨甜品
2017-03-08
尖沙咀區酒店高CP值 宇治抹茶主題自助餐
2017-03-24
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22