唔少人都覺得將軍澳係美食沙漠，想搵啲好嘢食都難，不過最近就有間台灣菜進駐啊！餐廳食物主打台南口味，材料八成由台南進口，所有師傅都有親自去台南考察，味道夠晒正宗。裝修方面都好有心思，文青風格，以木色為主調，牆壁上有滿滿嘅書本同打氣字句做裝飾～

三盛紅燒牛肉麵

牛肉麵可以話係台灣菜嘅代表之一！首先講吓最重要嘅湯底先，湯底用上50斤牛骨、紅羅白及洋蔥熬製而成，味道有濃濃牛香之餘仲好清甜。而麵底就選用台灣手打麵，彈牙有口感！配料腱心牛肉、牛腩、牛丸一樣在水準之上～

鹽酥雞扒滷肉飯

食肉獸食呢個就啱晒！滷肉用上台南進口滷肉，鹽酥雞扒亦選用美國雞髀肉，肉厚之餘外炸得好香脆～

台式雞肉飯定食配涼菜、蔥油時菜及紫菜魚丸湯

唔想食得咁肥，都可以試試呢個雞肉飯。同樣沿用台南配方，香氣十足。不過因為台南口味有少少偏甜嘅關係，師傅故意將甜度減低，遷就返港人口味～而上層嘅自製炸油蔥都有錦上添花嘅效果！

滷水豬手飯、煲仔塔香三杯雞飯

豬手慢煮四小時，外皮夠腍仲有咬口，肉都好入味～另外三杯雞飯都係用三黃雞，雞件先用麻油炒香，最後加埋九層塔就香上加香啦！兩味都係送飯之選啊～

餐廳供應多款小食，呢個桂花蜜糖雞翼皮脆多肉汁，點埋桂花蜜糖食可以清除油膩感。另外仲有古早味滷水拼盤、椒鹽花枝丸、煎手工餡餅 配原味豆乳等，選擇真係好多！

飲品方面有一系列健康主題飲品，如桂圓杞子菊花冰茶、夏日水漾鮮果茶、蜂蜜檸檬蘆薈 同梅子金萱冰茶，另外都有緊貼潮流之選嘅芝士奶蓋飲㗎～

最後一提餐廳而家舉行咗一個漂書活動，只要拎兩本書藉(不太於20cm)就可以換取店內書籍一本或$10現金券，不過就唔接受雜誌、漫畫、寫真同埋內含色情、暴力、意識不良嘅書籍。

四季良晨

地址: 將軍澳貿業路8號新都城中心2期UG樓UG051F號舖

文、相、片: Yanica