5間睇演唱會前醫肚餐廳推介 - 亞博篇
2021-09-20

之前已經介紹咗紅館九展同旺角麥花臣場館附近有咩好食畀大家,今次就到之前好多韓星鍾意去嘅亞洲國際博覽館,雖然因為疫情關係暫時無得睇韓星住,但嚟緊一樣有萬眾期待嘅林家謙 x 姜濤 x 柳應廷 x Tyson Yoshi拉闊音樂會於亞博舉行,一於睇下附近有咩好餐廳,睇show前同朋友搵食都唔使頭痕!


經典美國菜 華岸酒吧扒房

想食飽啲嘅,大大份嘅美國菜就最啱。呢間位於酒店嘅經典美國菜係唔錯嘅選擇,主要供應牛排及海鮮等菜式。燒美國頂級牛扒最受歡迎,牛肉嘅脂肪紋如大理石般,肉質鮮嫩而且肉味香濃,無論加少少香草鹽或自家製醬汁食一樣咁perfect。另外仲有多款招牌菜都值得試,如鮮味突出嘅龍蝦濃湯、烤地中海紅蝦同松露煎鵝肝等~

同亞博距離:步行約10分鐘


高質鐵板燒 空港居酒屋

日本菜永遠都咁受香港人歡迎!睇show前想食好啲,可以試下呢間一樣位於酒店內嘅日本菜,主打鐵板燒、吉列菜式同空運新鮮刺身,仲有爐端燒、串燒、烏冬、壽司及天婦羅等,選擇超多元化!鐵板燒當然要食海鮮,鹽焗龍蝦同鮑魚都好新鮮彈牙,佐賀A4和牛油脂豐富,入口即溶~吉列菜式都係另一招牌,炸漿薄薄一層好鬆脆,而且一啲都唔油膩,推薦吉列黑豚豬柳、吉列大蝦同吉列蠔~仲有日本空運新鮮刺身都係必試,無論海膽定拖羅都好新鮮鮮甜!不過食呢間嘅話,要時間充裕先得啊。

同亞博距離:步行約10分鐘

圖: eunice2046elasro


簡約現代風西餐 Arena Kitchen

趕時間嘅朋友仔,其實亞博內都有間質素唔錯嘅西餐廳㗎~主打菜式澳洲和牛漢堡,麵包皮烘得外脆內軟,配埋牛味極重嘅漢堡扒、煙肉、芝士同流心蛋,一啖入口真係超滿足!除咗傳統西餐都有一啲異國菜式,如娘惹咖喱牛肋條配白飯、印度烤餅及烚薯,咖喱香料味都幾突出,好惹味,牛肋條都炆得軟腍,無論配飯定烤餅都咁夾。另外仲有梳乎厘同蛋糕等甜品,睇show前補充下糖分就啱啦。

圖: awesomefoodie


多元化泰國菜 My Thai Bar & Restaurant    

如果睇show前有啲時間又想多啲選擇,可以喺東涌嗰邊食完再去睇演唱會都幾好。呢間泰國菜裝修富異國風情,味道都幾正宗。推介明爐青檸爐魚,湯汁加入香茅、南薑、辣椒、芫荽同青檸等,魚肉吸收晒湯底酸辣嘅味道,愈食愈開胃~泰式青咖喱蝦炒飯都幾特別,加入青咖哩醬及椰奶炒香,再以九層塔葉增加層次感,出色呀!另外炸蝦餅、菠蘿冬陰功海鮮清湯、燒原隻魷魚、鐵板蠔仔煎蛋同粉絲虎蝦煲都值得一試!

圖: 焦啤梨mythaitc


韓國菜小店 美談韓國

再行入少少,東路花園有間韓國菜小店喺區內口碑都唔錯,由韓國人主理味道好正宗,質素唔錯之餘價錢仲好抵食,門口仲放咗一對韓國couple公仔坐陣,行過一定認得~韓式海鮮煎餅係人氣菜式,好足料而且煎到脆卜卜,鍾意食香口嘢嘅人啱晒。想補身可以試下人蔘雞湯,酒味同人蔘味味都好突出,而且雞肉燉得好軟腍又夠滑~

圖: ubu852





文: Yanica

關鍵字
演唱會
亞博
日本菜
西餐
泰國菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2021生日優惠】持續更新!10月壽星半價嘆自助晚餐/免費放題
2021-09-30
【隨時更新】零食速報 每周新款零食、酒品點評
6天前
4間大閘蟹食店集合!米芝蓮食府大閘蟹宴+最平$368任食大閘蟹
2021-10-06
9月份好評餐廳十強
2021-10-08
初秋甜蜜蜜!10月份下午茶提案
2021-10-07