5間新派特色韓國菜推介 高級韓風扒房、韓式居酒屋
2022-12-05

一提起韓國菜,好多人第一時間都會諗起炒年糕、紫菜包飯同石頭鍋飯等傳統菜式,如果食到悶悶地想試下新意思,不妨去試下開飯仔以下介紹呢5間新派韓國菜,有高級韓風扒房、韓式居酒屋同韓國米芝蓮名廚首間海外餐廳,每一間都有驚喜㗎。


目錄

  ►高級韓風扒房暨酒吧:JJJ
  ►韓式居酒屋:Obp
  ►海景韓式fusion菜:奇納百川
  ►韓式omakase:Mosu Hong Kong
  ►韓國米芝蓮名廚主理:Hansik Goo


高級韓風扒房暨酒吧 JJJ

打破大家對韓式燒肉嘅諗法,呢間餐廳主打高質靚牛,保留傳統韓國菜精髓再揉合西式方法處理牛扒~亦都將牛肉分成幾個食法,At Grill可以食到包括USDA Prime Grade的45日熟成肉眼、牛頸脊、封門柳及已醃製的韓式牛肋骨,亦可選擇韓式傳統食法Ssam Wrap,用新鮮韓國芝麻葉及生蒜頭中和燒肉嘅油膩。Beef Rice亦係食完肉後嘅必叫之選,用牛肉湯炒飯,加上炸香咗日本大蒜及青蔥,呈上時更會喺客人面前將牛骨髓倒入炒飯,色香味俱全。


韓式居酒屋 Obp

中環區韓式Sool-Jip,乜嘢係Sool-Jip?簡單啲嚟講就係韓式居酒屋,主廚及大部份員工都係韓國人,供應自家製韓式傳統菜式及特色調酒,氣氛夠晒地道。飲酒又點少得韓式炸雞,韓式去骨炸雞配上秘製甜辣醬或蜜糖蒜蓉醬,辣醬加入士多啤梨醬增加甜味,減低辣度。韓式海鮮煎餅加入蝦、青口 及魷魚等海鮮,煎餅比起坊間嘅整得更薄身及脆口。韓式海鮮辣湯麵係高級版,湯底加入牛肉及海鮮熬製一小時而成,香辣得嚟仲充滿鮮味。仲有用米酒製成嘅cocktails,好特別呀~

圖: afoodstagramm


海景韓式fusion菜 奇納百川  

好創新嘅韓式cafe,好多菜式都令人驚喜。如韓式辣醬炸雞配鐵板芝士,外層濕潤嘅辣醬裹住炸雞焦脆嘅外皮,入口外脆內嫩,配上香濃嘅mozzarella芝士好誘人!三文魚子海膽忌廉醬烏冬係每枱必叫,烏冬煙煙韌韌每條都沾滿海膽忌廉醬,海膽味好濃又唔會太膩。另外明太子蛋卷紫菜包飯同香煎帶子炸醬烏冬都值得一試!

圖: leep001137


韓式omakase Mosu Hong Kong

餐廳由榮獲首爾米芝蓮二星嘅行政總廚Sung Anh及主廚Shim Jungtaek掌舵,巧妙運用時令食材重塑韓式料理~每日都會有唔同菜單,好似日本omakase咁,前菜Sea Urchin芝麻豆腐令人印象深刻,外皮以芝麻豆腐做成,內裡包裹著新鮮嘅北海道海膽,配帶甜味嘅柴魚高湯同芥末,係好有層次嘅味道。清蒸馬頭魚都令人驚喜,用上3款唔同的芥末同甘藍配襯新鮮嘅馬頭魚,嫩滑得嚟仲好鮮味。

圖: 車媽媽


韓國米芝蓮名廚主理 Hansik Goo

另一間米芝蓮名廚主理嘅韓國菜,餐廳由首爾米芝蓮兩星食府及亞洲50最佳餐廳「Mingles」主理人姜珉求開設,一樣會不定時轉下menu~呢排嘅menu就有人蔘雞Risotto,結合咗西式煮法同兩款經典韓國美食,分別係韓國人參雞湯及韓式炸雞。先以雞骨熬湯製作Risotto,然後慢煮雞胸肉及雞腿製成雞肉卷,塗上粘米粉,炸至外脆內嫩。前菜方面有鮑思粥、牛肉他他撻等,都好高質!

圖: reireifoodie





文: Yanica


關鍵字
韓國菜
創意
fusion
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2023生日優惠】持續更新!2月壽星嘆免費薄餅/自助餐
2023-01-31
【2023新店精選】持續更新! 2月嘆中式任食早午餐+意大利菜
5天前
【隨時更新】零食速報 每周新款零食、酒品點評
6天前
【專訪】均香日賣300磅角仔 兩代老闆上陣 陪深水埗街坊走過40年
2023-01-11
12月份好評餐廳十強
2023-01-10