5間中環打工仔平價食堂

相關餐廳:南記粉麵 ( 港式 ) 及其他4間餐廳
13
APR 16
35929 0
而家樣樣都加價,一個杯麵8、9蚊,一底雞蛋仔10幾蚊,就連買個包食都差唔多要成10蚊,仲要係食完都唔飽嗰隻。普通區仔都係咁,一向貴字行頭嘅中環就更加首當其衝,難為一眾喺中環返工嘅打工仔,餐餐捱貴飯,閒閒地食個lunch坐底都要五、六十蚊落樓,為咗慳錢,一係就餐餐帶飯囉,一係,就睇下呢篇平價食堂推介啦!

南記粉麵



Photos by 福如飯堂 & mochachocolatarita

南記出名係窮人恩物,就咁叫碗單併米線廿零蚊,想豐富啲叫碗小窩米線咩料都齊晒,都只不過係30零蚊。韮菜、芽菜、腐皮、肉碎索晒個湯嘅精華,係惹味嘅,當然唔少得加埋呢度嘅招牌春卷啦。雖然條春卷對比舊時,係有啲瘦咗嘅感覺,但依然都係炸到脆脆地,就算浸住湯都唔會咁快變軟變腍。加上米線嘅份量都仲係咁多,食晒一碗絕對係會有飽嘅感覺。而且個個都快食快走,要喺午飯時間搵個位都唔係話太難,等多一陣仔就有。

革新會食堂



Photos by 美食焚化爐

如果齋講大份夾抵食,唔計環境唔計服務,革新會食堂係一個幾好嘅選擇。佢位於中環一幢舊式大廈裡面,每日有6款家常小菜,好似蒸肉餅呀、炒時菜呀、蒸魚、炆肉、煎雞扒、炆豬手等等呀咁,任揀兩款,40蚊有找。重點係,白飯同湯都係任裝呀!抵到一個點!炒菜又夠鑊氣、蒸肉餅啲肉又唔會太肥,配料有時有魷魚有時有馬蹄,送飯最啱,胃口好嘅肚餓嘅咪裝多兩碗囉,好似食緊屋企餸咁。自己一個去搭枱又得,一班同事一齊去搵張圓枱坐又得,夠晒方便。

沾仔記



Photos by hphbhk1984 & annfung

要喺中環搵平價雲吞麵食都唔係一件容易嘅事,沾仔記係幾符合條件嘅,不過門口就成日都大排長龍,諗住嚟食嘅打工仔要預多少少時間喇。冇計啦,28蚊碗雲吞麵就有3粒大大粒嘅鮮蝦雲吞,每粒雲吞裡面最少有兩隻又爽口又彈牙嘅蝦,抵到咁,係會多少少人㗎喇。如果唔想淨食雲吞咁齋嘅,可以叫個至尊三寶,三寶一樣咁大粒,除咗雲吞,仲有多粒拳頭咁大嘅鯪魚球,同埋牛肉,都係咁爽口入味,飲埋個湯呀記住,好有鮮味㗎,唔好嘥。

筷子記



Photos by christy.cheng & SuSu9205

筷子記喺招牌上面已經開宗明義咁寫明「澳門平民麵食茶檔」,以平價做主打,食嘅都係好平民化嘅撈麵。除咗平時都有得揀嘅咖喱、沙嗲醬等等揀之外,呢度嘅撈麵仲有少少辣嘅沙茶醬揀添呀,鹹鹹地好惹味,想清啲嘅就可以揀招牌豉油湯底。餸料方面,三餸都不過係30零蚊,有成廿幾款可以揀。有選擇困難症嘅,諗諗餐廳推介嘅澳門包心卷啦,唔使傷腦筋。澳門包心卷說穿了其實即係用魚肉包豬肉,食落好有層次同口感。打工仔要喺度填飽個肚,其實唔難。

祖樂比



Photos by Dog Gor & chanelvina

如果唔想餐餐都中餐嘅,都可以去呢間喺干諾道中嘅快餐店,食返個漢堡同炸雞。同其他快餐店差唔多,都係30零蚊個餐。炸雞一客兩件,分別來自上脾同下脾,炸到金黃色咁但又唔係好油喎,炸粉又唔多,皮簿令佢嘅質感更加鬆脆,而滑捋捋嘅雞肉亦帶有肉汁,炸雞嚟講都算係水準之上。打工仔求快求平求飽肚,呢度都的確係個唔錯嘅選擇。補充少少,呢間快餐店全香港就得返中環呢間咋,同埋食客大多係菲籍人士嚟。

文:Kar

隨時接收最新資訊
讚好OpenRice專頁!










相片
講到隨手可得嘅基本款甜點就非布甸莫屬,一諗起用匙羹挖落去布甸搖搖晃動個樣就異常心動!但係而家市面上嘅布甸大多只...
相片
問:Sangiovese 有什麼特性? 答:Sangiovese(桑嬌維塞)是意大利種植最多的確黑葡萄,但其...
unknown
文章搜尋
更多
年份
推介文章
台灣人同香港人一樣咁熱愛日本甜品,好多人赴日旅遊時總把握機會品嘗夢幻甜品,吸睛外表同特殊滋味都讓人倍感幸福!來自北海道嘅ZAKUZAKU棒棒泡芙,曾席捲新宿、原宿、池袋等地,成為東京最強時尚相機食先甜品,佢哋宣佈即將跨出日本開海外唯一店,12/23進駐台灣新光三越信義A11~ 更多
過去熱門文章
是咁的,飲食界一向金句輩出,今日就有10句榮獲提名第一屆(或最後一屆)「我最喜愛飲界金句大獎」,究竟係人氣王坤哥、大王安德尊定Treegun博士……嘅金句最受歡迎,成為至尊飲食界金句?就靠你一票決定!投票仲有機會贏iPad同其他豐富禮物! 更多
Top