5月份好評餐廳十強
2022-06-06

每個月嘅報榜,都可以見得到香港人嘅用餐習慣或喜好。近幾個月,主要都係靚仔裝修嘅café或者唔同類型嘅日本餐廳佔據榜內較多嘅位置,今個月都唔例外,鍾意四圍搵食嘅你哋,又有冇啲係你心水呢。溫提一下,而家經OpenRice網上訂座,可按出席人數賺取相應嘅Rice Dollars,而賺到嘅Rice Dollars亦可於OpenRice各樣服務中當錢使呀!

第10位  合十

 圖:alan_lawkh

連續兩個月打入十強榜,咁室外嘅帳幕加埋一串串嘅燈海,又真係好有feel 好得人鍾意嘅。除咗第一次嚟一定要試嘅名物——巨型豬扒外,好香牛油味嘅牛油香草白酒蜆,同泰式風味嘅冬陰功海鮮扁意粉都值得一試呢,份量多又有特色。

第9位  GRIND SIZE(*新上榜)

 圖:cowwpollyng1994

第9位嘅呢間café,純白裝修、乾花裝飾,加埋門口大大個「窮」字,全部都係打卡元素。但當然淨係得個靚字係唔夠啦,食物同樣有心思。日式蟹膏‧三文魚籽‧帶子‧明太子手捲粉幾過癮,人手做嘅手捲粉彈牙有質感;蟹肉明太子流心西班牙蛋餅唔係講笑,流心效果一絕,仲有得拉絲,鹹香合宜。就連心太軟都特別過人,係檸檬茶口味,酸酸甜甜都幾濃味。

第8位  Trois Cafe(*新上榜) 

 圖:tiffanylee090507多姐_Dora

分別以粉紅色同湖水綠色為主調嘅café,餐牌食物同裝修有樣咁有驚喜。水牛城辣雞鎚係推介之一,假如你鍾意食辣嘅話,辣得嚟又滲有酸汁,好惹味。上海菜先有嘅小籠包,呢度變咗用蘑菇黑松露汁浸住上,中西合壁但又幾夾。

餐飲券:手沖精品咖啡 (指定咖啡豆)+手作卷蛋 (只限灣仔店)
餐飲券:人氣粉紅咖啡店 意粉配全日經典早餐二人餐 (只限灣仔店)

第7位  AGE Cuisine Express(*新上榜)  

 圖:Kimmybbgfoodiecouple_ms

位於太古工廈內嘅餐廳,Pizza做得幾出色,蒲燒鰻魚或秘汁和牛薄餅都試得過,好有驚喜。即叫即整當然夠晒熱,批邊香脆,仲好鬼足料,最正係芝士拉絲嘛。另外推介慢煮半生M6和牛西冷配黑醋,蜜糖芥末醬,肉色粉嫩,仲好鬼多汁添。

第6位  漁舍酸菜魚(*新上榜) 

 圖:carman仔食食食悠悠~~~

酸菜魚係近年好多人都鍾意食嘅嘢,北角嘅街坊舖,主打酸菜魚,配龍躉又得、配鱸魚又得,魚肉都係咁滑,酸酸辣辣好鬼開胃。另有多款四川小炒同樣深受歡迎,最重要係價錢親民呀。

第5位  鮨竜(*新上榜)   

 圖:dingbu

每月嘅十強名單內,日本菜式總唔會少。呢間主打廚師發辦嘅餐廳,採用日本直運嘅時令食材,壽司、刺身等固然新鮮甜美,迷你丼亦份量十足,一碗集齊吞拿魚蓉、三文魚籽同多款切粒刺身,最平嘅廚師發辦套餐$500有找。

第4位  一瀧(*新上榜)

 圖:KathyPunIvywingyanNG

壽喜燒既香且甜,係好多人嘅飛佛。呢度嘅壽喜燒仲可以加埋棉花糖!視覺滿足之餘,味道當然滿分。宮崎牛本身肉質軟腍,牛味又夠香,加埋棉花糖之後,和牛更會帶有鮮甜味。鍋內嘅配料例如蒟蒻麵同芋絲等更索盡精華。

第3位 麵屋神匠(*新上榜) 

 圖:PPPUPUhk.eateateat

連續3間都係日本嘢,嚟到第3位則係充滿裝修富日本風格嘅拉麵店,而湯底則主打蝦湯。每日限量供應嘅神匠蕃茄蝦湯沾麵,以日本甜蝦、赤蝦、蝦乾等熬成,口感濃稠,麵條掛汁。最特別嘅係仲有配羅勒醬法包片,香草味濃。

第2位 MEMOIR 

 圖:L_CYfuukkkar_sharingg

隔咗幾個月再度入榜,呢間西餐廳好有主題,連本menu都整到好似本回憶簿咁,又相又畫。豆腐牛油果配XO醬呢個配搭幾有新鮮感,雖然食落冇乜咬口,兩樣嘢都滑捋捋嘅,但又出奇地夾同埋香口,加咗XO醬少少辣辣地,過癮。肉食獸要搵肉食,可選香煎澳洲10oz西冷扒配韓式燒肉汁,大大塊扒實滿足。

第1位  黑布小巷(*新上榜)

 圖:mantung88wingcc

第一位係新上榜嘅台式小店,吐司幾出名,嚟到記得食。慢烤雞腿芝士蛋吐司陣陣鹹香,麻辣鬼椒豬扒蛋吐司則夠晒刺激,啖啖肉得嚟都辣你一辣。食台灣嘢冇可能唔食芋圓甜品,芋頭椰汁三色圓係人氣之選,粒粒芋圓都好有嚼勁架。



關鍵字
十強報榜
十強
十強名單
紅磡
觀塘
西餐
日本菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
7天前
【隨時更新】最後倒數!2022即將結業嘅人氣餐廳
1天前
尖沙咀最新露營主題日式燒肉店!3700呎室內Glamping體驗
2022-07-25
全港8大人氣沙嗲牛麵!煲仔沙嗲牛肉麵、 沙嗲牛肉沾麵
2022-08-03