5月份好評餐廳十強
2018-06-08

如果大家有留意開飲食界,就見到由四月開始就有唔少過江龍登陸香港,率先同大家見面嘅Shake Shack,仲有超蓮BB嘅玖五牛肉麵,都順理成章打入咗今個月嘅十強!預告定嚟緊將會越來越多名店抵港,究竟可唔可以陸續上榜呢?即刻睇睇今個月嘅十大好評餐廳先!


第10位   Fûhn (*新上榜)

越南菜其實都幾啱夏天食,一碗牛河或者撈檬,加埋酸酸甜甜嘅魚露,都幾refreshing。銅鑼灣呢間新派越南菜,由美國過江來港,雖然開業咗一般時間,但水準保持到。湯粉有分4個size,湯底帶濃郁牛香,安格斯牛肉亦夠軟滑,香草香料十足,係北美地區嘅口味。

圖:lamnnysafood


第9位   Shake Shack (*新上榜)

呢間美國漢堡店風頭有幾勁,相信都唔使多講,由宣佈開業、快閃pop-up到正式開業,人龍只有長冇短過,為咗個漢堡可以排成粒鐘,真心佩服一眾粉絲!招牌炸原隻大啡菇芝士漢堡確實有唔少人讚好,流心芝士夠邪惡,仲有芝士薯條同香港獨有嘅frozen custard同飲品,睇嚟會紅多一排!

圖:soya1314Ming Pui


第8位   鮨丼 (*新上榜)

海鮮丼由上年hit到今年,夏天相信會特別受歡迎添。呢間新開嘅海鮮丼店,因為大搞半價優惠,旋即吸引人潮。款式幾多吓,人氣款式包括北海道海膽、大拖羅丼及左口魚邊拼三文魚丼等,平得嚟水準都唔錯,食評稱海鮮夠新鮮而且足料,並冇將貨就價。

圖:twentieSe7endays


第7位  ATUM Restaurant

於3月上過榜嘅新派西餐廳,今月再度登上第7位,始終香港以賣相精緻嘅份子菜式為主打嘅餐廳唔多,難得菜式做得靚又好味。除咗晚餐,仲有下午茶食,一口一件嘅鹹甜點整齊排列喺白碟上,雖然唔係三層架,但睇落似畫咁有藝術感,相信影相都要影好耐!

圖:spotthefoodemilykaaa


第6位  渝味曉宇重慶老火鍋 (*新上榜)

早前來自大陸嘅重慶四川火鍋一間接一間咁開業,多到數唔晒!曾於著名節目《舌尖上的中國》亮相嘅渝味曉宇都算係始祖之一,來港一年半左右,竟然去到今個月先上榜!因為湯底同配料味道每次食都keep得住,麻辣夠香唔係一味死辣,亦多地道配料如耗兒魚、苕粉及燕餃等。

圖:kristywongwongl.tsui


第5位  日悅極尚日式放題

又係再次上榜嘅餐廳!放題餐廳成行成市,但做得好嘅實在唔多。呢間放題回本必吃燒乳豬、和牛薄燒及各式凍海鮮等,豐富到似酒店級自助餐,當然唔少得刺身、燒物及炸物,選擇勁多而且每款質素唔錯,兼且甚少漏單或等得耐情況,細心到有親子空間俾小朋友放電,唔少人食過返兜呀。

圖:Gigi PigSkull_couple


第4位   羲和雅苑

北京填鴨係唔少人嘅飛佛,不過專門店唔多,亦唔係間間做得好食。呢間真係由北京開過來,填鴨以特製烤爐製作,隻隻飽滿,亦跟從現時流行食法。一口酥鴨皮點砂糖食,油香十足,再分為胸位及髀位,可以點藍莓醬及爆炸糖同吃,好獨特!加上無敵海景,抵佢又重返十強嘅。

圖:zoolookBobby Rabbit


第3位   玖五牛肉麵 (*新上榜)

牛肉麵店同樣係今期流行,仲要係超蓮BB開架播,人人爭住去朝聖啦!玖五牛肉麵來自台灣,有超過50年歷史,牛肉麵湯底以大約15-20斤美國牛骨同藥材等一同去熬煮超過48小時,味道濃郁帶藥材味,招牌三合一有齊牛肉、牛筋、牛肚三款配料,另亦必試香港獨有蕃茄牛肉麵。

圖:ilovefood1314chowsmall.food


第2位  % Arabica (*新上榜)

應該係近年最紅嘅咖啡店之一,源自香港揚威國際,而家全球包括日本京都、德國、科威特、杜拜、上海等地都有分店,將來更遍佈更多國家,係勁嘅!創辦人於夏威夷有咖啡農場,亦選用來自唔同產地嘅咖啡作自家烘焙,更請到世界級人馬山口淳一任咖啡師。咖啡味道純淨,無論係濃縮咖啡定抹茶latte均出色,簡約裝修舖面更係打卡勝地。

圖:yimloisSweetdiegrandpa


第1位  橘焱胡同燒肉夜食

連續3個月上榜,今次終於登上榜首嘅係你喇!來自台灣嘅燒肉店,有專人代燒已經加分,而且部分座位係堅炭燒,香港真係冇乜地方食到!肉類新鮮,而且調味精準,唔會一味鹹,難得海鮮類、豬肉及雞肉都係好食。價錢雖然比台灣店略貴,但叫做有台灣風味,當慳返張機票囉!


圖:this_is_nicolecarykof



文:Perrins

關鍵字
十強
排行榜
越南菜
漢堡
海鮮丼
西菜
麻辣
火鍋
放題
片皮鴨
牛肉麵
咖啡
燒肉
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
全港首間牛角Buffet旺角登場 全日任燒任食和牛(有片)
2018-05-28
台灣排隊三個鐘!虎紋黑糖波霸鮮奶抵港(有片)
2018-05-30
5月份好評餐廳十強
2018-06-08
日本神級燒肉店中環開業 午市食A5和牛五大部位
2018-06-02
六大主題 父親節自助餐推介
2018-06-06