5月份好評餐廳十強
2016-06-06
嚟到5月份嘅十強榜,繼續都係有好多新勢力上位,今次又有7間餐廳首次上榜喇!甜品餐廳依然佔咗幾個席位,不過值得留意嘅係頭兩位都係漢堡包店,仲要係上過幾次榜,甚至拎過獎嘅餐廳,似乎已經成為港人嘅寵兒。

第10位 地窖門(*新上榜)

果然港鐵延伸到堅尼地城之後,西環附近多咗唔少「好西」,呢間Wine & Tapas Bar就係例子之一。位於香港大學站附近一條安靜嘅小街,落到地窖環境氣氛都相當唔錯。小食同Tapas總共有18款任揀,Tiger Prawn & Pesto Pasta有大大隻吸睛海虎蝦,帶蒜香嘅青醬搭墨汁麵亦絕無欺場。Korean BBQ Ribs燒得啱啱好而且牛肉夠腍,亮點係非常惹味嘅韓式燒汁。甜品Chocolate Brownie朱古力味濃郁,加上飲品價錢相宜,Chill Out好選擇又多一個。


Photos by 手瓜起展joggling


第9位 糖室(*新上榜)

隱藏喺石硤尾屋村冬菇亭當中嘅新甜品店,裝修骨子舒適之外,甜品行中西Fusion路線,無論同FD子定屋企人去,都總會搵到你嘅心水。西式代表有心太軟,共有五款唔同口味而且仲配埋特製雪糕,例如檸檬夾心餅心太軟配蜜糖乳酪雪糕,值得一讃嘅係帶酸嘅檸檬味心太軟味道真係好似係個食嘅檸檬夾心餅味,童年回憶即刻返哂嚟。而且流心度高,相機食先一流。中式代表就有玫瑰杞子雪耳露,養生滋潤又唔太甜。


Photos by heidimawander2wonder


第8位 阿麥廚房(*新上榜)

位於銅鑼灣屬於同名書店嘅Cafe,雖然地方唔大但勝在有旺中帶靜嘅感覺,而且食物水準穩定,一班人嚟一邊食餐飯聚下舊就啱啦。由一開始嘅餐湯就先聲奪人,黑松露菌忌廉湯嘅黑松露香味濃郁,配埋未完全打碎所以特別有咬口嘅蘑菇係無得輸嘅絕配。主菜方面就推介BBQ 烤辣味西班牙豬肋骨同德國式燒咸豬手,前者大份得嚟又惹味,後者皮脆內嫩唔油膩。總括嚟講性價比甚高。


Photos by ronronyip


第7位 HeSheEat

上個月旺角店重登4月10強之後,憑住五月超強優惠,只要身份證上有指定字母就會送甜品、飲品甚至意粉,今次輪到銅鑼灣店第6次進入10強!無論係鹹食定甜品都保持到水準,例如微辣嘅墨魚汁魷魚扁意粉香氣四溢,魷魚亦新鮮彈牙,就算因為墨魚汁而會食到個嘴黑哂都依然有唔少捧場客。綠茶心太軟賣相吸引,切開有流心效果亦有茶香,配埋豆腐雪糕,滿足甜品胃之餘亦解膩。


Photos by ChloeDeng3677Captain Gourmet


第6位 鍋呵呵(*新上榜)

香港人有幾愛打邊爐?我唔直接答你,我用例子嚟答你:又有一間火鍋店上10強榜啦!初夏天氣開始熱,要開冷氣之餘食嘢口味亦變得Light咗,所以深水埗呢間樓上小店嘅原味椰子雞鍋就順利跑出。湯底用咗新鮮椰青同椰子水再加大大件雞件,完全唔洗加咩味精雞粉都夠清甜滋潤。二人餐拼盤嘅配料亦分量十足,肥牛、海鮮、豚肉同蔬菜一應俱全。另外仲有蒸氣鍋同傳統火鍋,嚟多兩次都唔怕悶。


Photos by tempbond


第5位 February(*新上榜)

雖然而家已經係6月,但係呢間以2月為名嘅餐廳一樣都咁受歡迎。主打德國菜,嚟到一定要試火焰鹹豬手,上枱嗰陣成隻喺你面前燒著佢,等你拍夠片影夠相,就幫你切埋,怕肥嘅都要食一次層皮,因為真係好脆,而肉質亦燒到啱啱好,又有啲肉汁,唔怪得開張一排咁快就上位。


Photos by siu shan


第4位 Tom N Toms Coffee(*新上榜)

嚟自韓國嘅咖啡店,咖啡固然之有返一定嘅水準,但係呢度嘅吐司實力都不容忽視。招牌嘅有蜂蜜奶油吐司,啲蜂蜜多到流漿咁,仲有一大堆cream喺面,忌廉怪一定好鍾意。但如果怕cream嘅朋友就可以揀蜂蜜芝士吐司,兩層厚多士中間夾住芝士層,店員已經預早幫你切好九宮格,輕輕叉落去一拉出嚟,就好容易咁做到拉芝嘅效果,真真正正外脆內軟呀!


Photos by 為食MoJil & foodlife


第3位 霸嗎拉麵(*新上榜)

尖咀分店嘅menu同老銅嗰間又有啲唔同,嚟呢間嘅話記得要試下雞肉叉燒拉麵,即係將啲雞整到成嚿叉燒咁嘅樣,又幾似喎整得,仲係厚底嘅添。而麵質亦煙韌彈牙,幾爽口。另外,呢度嘅辛辣拉麵淨係齋睇色水都知真材實料,成個湯底鮮橙色咁,聞都聞到陣辣味,加埋啲麵索晒汁咁係好有料到嘅!


Photos by kkngkk2 & Raul L.


第2位 Burger Joys

話呢間餐廳係香港人嘅新寵兒絕對唔過份,單係2016年頭5個月,佢哋已經上咗榜3次!冇計,啲burger即叫即整,上到枱仲係熱辣辣,而且充滿驚喜。每日限量供應嘅Hiro burger中間塊扒係和牛嚟,而磨菇漢堡中間係真‧磨菇扒嚟,用磨菇碎整成,好似平時漢堡扒嘅質地咁,其他配料都有好多,個口細少少都唔可以一啖食晒!


Photos by BoBo_Chow926 & apuruw


第1位 Burgeroom

貴為「開飯熱店大賞2016」至尊大獎嘅得主,而家榮登埋5月份嘅榜首,進一步肯定佢喺漢堡界嘅地位!佢嘅漢堡有幾咁特別應該唔使我再多介紹,鵝肝鍾意嘅打孖上咁夾住落塊漢堡度都得,仲邊有得輸?今次想講下呢度啲小食,漢堡固然要襯薯條,有芝士醬仲有牛油果醬,好惹味!仲有薯絲蝦,薯絲炸到一個個圈咁包住鮮蝦肉,脆卜卜!


Photos by 阿古獸 & Shir Berry



文:Kar、Cathy

隨時接收最新資訊
讚好OpenRice專頁!
關鍵字
排行榜
burger
拉麵
甜品
鹹豬手
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
初夏清新之選 酒店芒果主題下午茶
2017-05-19
【開飯熱店入圍名單巡禮】渡過美好的小食甜點時光
2017-02-27
3月份好評餐廳十強
2017-04-06
法式輕甜泡芙Pop-up店登陸尖沙咀(有片)
2017-04-07
香港春季限定士多啤梨甜品
2017-03-08
2月份好評餐廳十強
2017-03-06
餐廳資料
更多
收起
本月熱門
【隨時更新】便利店尋寶 每周新品速報
2019-11-29
【2019聖誕】早鳥優惠! 聖誕自助餐推介
2019-11-27
高CP值放題推介
2019-11-07
秋風起!5間大閘蟹放題食店集合
2019-11-19
【2019聖誕】年尾叉電 聖誕下午茶集合推介
2019-11-19