4月份好評餐廳十強
2022-05-05

4月中期嘅時間,防疫措施終於放寬,晚巿又可以重開返,飲食業界可以話終於再次見到曙光。大家餓咗咁耐,到底一可以出返嚟食,咩餐廳會係最受歡迎呢?

第10位  就是偏偏喜歡你 (*新上榜)

 圖:jcpigpigzhuhappyjoejoe123

近期IG 嘅大熱店,由花藝師主理嘅花花主題餐廳,由環境到食物擺盤都係打卡位,熔岩石山有朱古力同抹茶兩款口味,嗜甜嘅揀朱古力,唔止面層有大量可可粉,就連中間都有朱古力醬同埋朱古力粒,一切開啲醬就湧出嚟,好澎湃。cute cute嘅特飲仲會有隻熊仔喺上面,好有童心。

第9位  喫茶ちょうぼ (*新上榜)

 圖:混血小妹or#ta67015105

位於大埔嘅和洋料理,裝修行vintage風。好多朋友嚟到都會叫蛋包飯,賣相吸引,輕輕一切,半熟蛋漿就會完美咁「打開」蓋住啲飯,校準時間影boomerang啊。蛋包飯可配壽喜燒風牛肉或日式燉紅酒牛肉等。甜品推介伯爵茶戚風蛋糕,口感鬆軟,淡淡茶香,最緊要唔膩啊。

第8位  不籽是咖啡 (*新上榜)   

 圖:kimoooooomanwhykimmy

西營盤開多咗好多café,其中呢間空間感十足,木系簡約嘅裝修風格吸引咗唔少文青去打卡影相。餐廳以西日菜式為主,其中比較特別嘅有北海道干貝火龍果燉飯,成碟飯都係紫紅色好搶眼;另一主打推介係龍蝦湯配牛油果大蝦稻庭烏冬,有茶壺慢慢倒入熱龍蝦湯,香濃鮮甜,鳥冬又掛湯,味道唔錯。

第7位  Ikigai Concepts

 圖:SollebReginanana~

每個月嘅十強,總唔少得日本餐廳。今次呢間再度上榜,實力不容置疑。成萬二平方呎大嘅餐廳,分咗唔同區域,又有Omakase、又有鐵板同日式料理食。日式西西里紅蝦意粉有大大隻紅蝦,爽口彈牙,鮮味滲埋入意粉度。另外,炭燒美國肉眼又係大大塊,外脆肉嫩仲好juicy添。

第6位  鐵花村 (*新上榜) 

 圖:manchip08loveonew4ever

主打台東美食嘅台式小店,老闆都係台灣人,加上滿天燈籠等裝飾,的確畀人有種去咗台灣嘅錯覺。推介各款蛋餅,包括松露芝士、粟米芝士、肉鬆等,全部都足料爆餡。麵線最好就係揀綜合麵線,唔使揀,一碗有齊蚵仔同大腸等熱門配料,香口惹味,係台灣嘅味道啊。

第5位  ASOK Thai Garden

 圖:couplelovefoodmissfatsum

  呢間泰式café,又係近期嘅大熱餐廳,setting chill到好似去咗泰國啲沙灘渡假咁。食物款式亦比其他分店多元化,推介可試泰式羊膝配烤餅,羊膝慢煮處理,唔會好羶,香料味濃郁。另外幾乎枱枱都會有個樽仔喺度——泰式奶茶——樽身好靚,重點係泰奶特別調製過,冇平時飲開嗰啲咁甜,綠色嗰款仲會加埋lemongrass落去,好香。

第4位  合十 (*新上榜)

  圖:Joannekwok王诗欣

打卡café繼續稱霸十強榜,呢間係波希米亞風,有室內同室外嘅位置,室外嗰啲真係成個帳幕咁搭喺度,好有feel!巨型豬扒一樣咁有feel,堅巨型架,分分鐘大過你塊面。不過咁大塊都好啦,肉質依然都係軟腍嘅,調味唔多,可以食返原汁原味。咖啡方面都幾有新意,好似法式焦糖燉蛋咖啡咁,飲落真係有陣焦香同甜香。

第3位  HIKARI    

 圖:nelsonk17mantingHo

再度上榜嘅荃灣兩層高café,簡約白色主調帶出悠閒嘅感覺,過嚟食返餐西式輕食,心情都放鬆啲。賣相唔錯嘅海鮮牛油果他他,幾層配搭和諧,作為前菜幾醒胃。慢煮美國安格斯牛板腱新奥爾良飯都幾有特色,有啲似risotto嘅感覺,而牛板腱厚得嚟都幾軟嫩。

第2位  南越南咖啡廳  

 圖:ShanLi5129SiuShuenChan

以南越菜作招徠嘅餐廳,喺香港又的確唔多見。多款具南越街頭特色嘅美食,當然帶畀港人新鮮感。菜式融入各處嘅食材同創意,例如雞軟骨就進化成Shake Shake雞軟骨,連埋辣味調味粉一齊放入袋度shake,脆卜卜又粒粒沾滿辣粉,夠刺激。烤蔞葉雞配青蘋果條都係少有嘅配搭,雞皮香脆,配青蘋果條又多咗份清新。

第1位  Boy n Burger 

 圖:Vian.SianFredHon8

漢堡一直都係大家comfort food,呢間漢堡店仲要又平又抵食,開得喺灣仔都係$28就買到個包。而且佢哋耐唔耐就會有期間限定嘅新嘗試,4月就係佐世保漢堡喇,有黃金豆腐同黃金炸魚漢堡,就算成日幫襯都唔會悶。當然,煙肉雙層芝士漢堡係長期皇牌,香脆惹味,牛肉又juicy,性價比高。


文:Kar


關鍵字
十強
報榜
十強名單
荃灣
大埔
灣仔
漢堡
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
3天前
【2022生日優惠】持續更新!5月壽星+指定月份補祝生日 嘆火鍋78折起
2022-04-29
晚市堂食恢復!最新酒店自助晚餐一覽 低至78折、龍蝦/海膽主題
2022-04-20
好消息!6間老店/人氣小店 結業重開
2022-05-11
8大必試片皮鴨!超平$178/隻、特色北京填鴨三食
2022-04-27