4月份好評餐廳十強
2021-05-06

又嚟到每月報榜嘅時間!4月份嘅十強名單,整體嚟講都係以裝修有格調嘅café為主,睇嚟食飯同打卡已經成為香港人密不可割嘅日常。

第10位  Lady Nara(*新上榜)

 圖:ctang927holidaymood2020

以夢幻粉紅色做餐廳主題,喺起跑線上已經先贏到一眾女生歡心,再加多張打卡專用嘅藤造鞦韆,就更易得到人氣。食物質素都有一定水準,龍蝦冬蔭意粉同香茅燒雞係香港限定嘅菜式,前者啖啖龍蝦鮮香;後者用咗18款香料醃製,一聽就知夠晒香濃。

第9位  九份飽(*新上榜)   

 圖:sogoodwithfoodliuliu1234

掛住台灣美食嘅朋友,嚟到呢度應該可以滿足到。香酥雞扒魯肉飯只係40幾蚊,大大塊雞扒炸得香脆,同時仲好juicy。魯肉飯醬汁香濃惹味。食完唔使走下場,呢度有埋甜品直落,仲係大家嘅飛佛煙韌芋圓,一碗有齊仙草、芋圓、珍珠、地瓜圓等,相當足料。

第8位  濟洲燒肉食堂(*新上榜)   

 圖:juilletkinkiagnesng

望住個海食韓燒會唔會太chill?有多款牛肉選擇,豪快和牛燒油花較多,入口即化;特選黑毛和牛上貝身肉嘅肉味濃郁,啖啖肉汁,各有口感。爐邊蛋同芝士仲可以任食添。Lunch時亦有提供熟食套餐。

第7位  福岡漢堡扒

 圖:hkfoodphotoPenguin Blog

呢間嚟自韓國嘅石燒和牛漢堡扒餐廳再次上榜,足證佢嘅受歡迎程度。大部分客人當然係為咗佢哋嘅100%澳洲和牛漢堡啦,芝士蛋和牛漢堡、芝士蛋蒜和牛漢堡、墨西哥辣椒和牛漢堡、菠蘿煙肉和牛漢堡等,幾款口味全部自己燒自己食,脆脆地又有肉汁,過足癮。

第6位  哈豆(*新上榜)  

 圖:Miss叮kathy889

又一間台灣料理上榜,呢間係由台灣人開架,供應各式各樣嘅台灣美食,無論係牛肉麵、滷肉飯、鹹酥雞定係吐司等都有。好多人嚟到都會嗌份芋見檸奶凍吐司,爆焰架,芋泥綿密香滑,仲有清新檸檬碎中和返,唔使怕膩。另外推介台式麻油雞湯,湯頭清甜,雞肉嫩滑。

第5位  No Money So Lonely(*新上榜)   

 圖:kanaheipp側民

以懷舊玩味風格裝修作招徠嘅呢間餐廳,原來係人氣café Mamaday嘅姊妹店,唔怪得個feel咁似。餐廳同樣得到大眾喜愛。推介啖啖蟹肉擔擔飯,冇改錯名,真心啖啖蟹肉,仲有蟹籽添,帶微微辣香。芫荽黨員就必點牛油果芒果芫荽沙冰啦,濃濃嘅荽味過後就會有芒果甜架喇。

第4位  齋啡(*新上榜)  

 圖:食神大媽 Foodie AuntieKeilwk

以白色為主調café,總係有種難以抗拒嘅吸引力,可能係容易畀人一種舒服relax又好打卡嘅感覺啦。呢間café都唔例外,佢哋供應多款自家製作嘅輕食,同埋無蛋奶嘅純素食品。最受歡迎嘅甜品係純素榴槤蛋糕,加入新鮮果肉製作架,真材實料!而latte則選用燕麥奶沖製,想要香甜口味嘅可試焦糖竹炭latte。

第3位  牧羊少年咖啡館    

 圖:DesireforFoodnyung0609

多得港島區朋友嘅愛戴,將呢間café再次推入十強榜。推介日式大阪燒風味煙三文魚薄餅,大阪燒醬汁酸酸甜甜,煙三文魚又有淡淡煙燻香,連埋木魚碎同紫菜絲,就好似食緊脆口嘅大阪燒咁。香煎黑椒蒜蓉日本帆立貝鮮味十足,仲滲有陣陣牛油同蒜蓉香。

第2位  十二鍋(*新上榜)

 圖:starthysasaCwongx

想打邊爐又想安全衛生啲,一人一鍋就啱晒。呢間火鍋店仲有12款湯底選擇,深得火鍋之友歡心。食得辣嘅就唔使諗啦,一定揀台式麻辣鍋,用豆瓣醬、花椒、辣椒、洋葱等炒香過嘅湯底麻香刺激,配埋鴨血、牛肉、台式蛋餃等真係冇得輸。想要養顏嘅就有美肌牛乳鍋,花膠、鮮淮山、蟲草花等,夠晒滋潤。而多款食材、配料都係由台灣直送。

第1位  何蘭正(*新上榜)

 圖:ahhbeRaindybabe

一向深受beergeeks歡迎嘅呢間餐廳,最近搬咗新舖位,轉咗做樓上舖,裝修更懷舊,既有舊式通花鐵閘又有霓虹燈,比起舊店更多打卡位置。酒水食物方面繼續保持水準,招牌菜順德風情雙籽三文魚他她配香脆雲吞皮不能不試,口感豐富;24小時慢烤伊比亞叉燒配豬油飯亦係推介,係肥仔架喇,但慢煮豬肉肉質軟腍而又有燶邊效果,撈埋豬油梗係香口,食咗先算啦。


文:Kar


關鍵字
十強報榜
好評十強
十強名單
中環
銅鑼灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
6天前
【2021生日優惠】持續更新!7月壽星半價嘆和牛燒肉套餐
2021-07-09
榴槤Buffet真的很興奮~ 九龍區酒店7、8月限定榴槤盛宴
2021-06-30
尖沙咀新開燒肉Omakase 專人燒日本A5和牛+特級寶盒鑽石肉
2021-06-28
投奔盛夏 7-8月份下午茶推介
2021-07-08