4月份好評餐廳十強
2019-05-07

對香港人嚟講,打卡已經成為生活日常。唔淨止返工要打卡,行街、旅行,就連食飯都要打卡。而4月份嘅十強名單,就有好多間打卡熱店喇!

第10位 The 747 Galley by Cafe Proud Wings(*新上榜)

 圖:LornaLi4372kitkatgggggg

如果就咁話你聽,呢間係間位於大角咀嘅西餐廳,可能你會覺得好普通。但如果話你聽,呢間係737客機主題餐廳,裝修整到成個離境大堂同機艙咁,食嘅都係飛機餐(經濟艙、商務艙、頭等艙晚餐),是咪即刻吸引勁多先?當然佢哋嘅嘢食都有返咁上下質素,燒美國牛小扒肉色粉嫩,多汁富油香。

第9位  立鮨(*新上榜)

 圖:chongjackyKathyPun

立食壽司喺日本好 common,但香港就比較少有喇。呢間位於旺角嘅立食壽司店可以話係少數,人氣不受「冇櫈坐」嘅影響,長期排隊。識食一定食入口即溶脂肪又肥美嘅大呑拿魚鮫壽司,同爽口嘅火灸左口魚邊壽司。但講到要滿足,就非食海膽特盛不可喇,鮮甜海膽連埋香濃赤醋飯,好啱打卡。

第8位  滾火鍋(*新上榜)

 圖:iflovefood88yamyann

唔知幾時開始,打邊爐已經唔再受季節嘅限制,成為全年活動。4月回南天嘅日子,仍然能打入十強,就知道呢間火鍋店有啲料到。開喺深水埗嘅平民地方,但裝修一啲都唔曳,大理石風格,兼有卡位坐,舒舒服服打邊爐。湯底選擇有芫茜皮蛋、沙嗲、麻辣等,仲有飲得嘅燉蟲草鎯豬骨湯、濃湯花膠雞湯。不可缺少嘅手切本地肥牛,肉味香又腍身,係每日去街巿新鮮採購㗎。

第7位  緣屋 札幌元袓蝦湯拉麵

 圖:小東

上個月第10位嘅上環蝦湯拉麵店,今個月晉升3級。蝦湯赤味噌拉麵長期受客人歡迎,湯底鹹中帶甜,平衡有致,麵條掛湯力高,口感彈牙,質素甚高。另外有幾款香港限定嘅和風蝦料理小食,例如日本直送櫻花蝦炸雞,外脆內嫩,雞肉多汁。

第6位  粒粒果甜品

 圖:Donaldchit雷囡媽媽

能夠喺眾多甜品舖中突圍而出,喺十強中佔一席位,呢間旺角甜品店自然有佢過人之處,就係夠晒新意。款款甜品嘅賣相都好鬼精緻,仲有粒粒透明嘅水果星球,打卡呃like冇難度。龍珠星球內嘅係紅火龍果肉、提子等,球體狀用蒟蒻做成,彈牙又帶果香。另外芋圓仙草、窩夫、糖不甩等甜品同樣都係呃like-able。

第5位  雞翼山

 圖:Eatwithhu天天食好野

連續第3個月上榜嘅小食店,氣勢如虹。仲有冇雞翼控未去過試?玫瑰、、泰式冬蔭公、鹹檸七、避風塘、山葵蟹籽、黑松露、三重芝士、鹹蛋黃等味試勻晒未?泰式冬陰公酸酸辣辣、玫瑰味淡但蜜糖甜香,款款各有特色,望住就算只係得9款選擇嘅menu都會選擇困難症發作。佢哋最近喺銅鑼灣又開咗分店,港島朋友都可以去打卡啦。

第4位  一起食堂

 圖:海之鹽estherltt

喺年頭上過榜嘅中環台式便當餐廳,重新入圍。話明台灣嘢,梗係唔少得紅燒牛肉麵,湯底濃香仲有微辣,好入味;蔥油土雞肉飯亦相當香口,但記住要留肚喺度食埋甜品,係大家最愛嘅芋圓仙草凍呀,一碗有晒紫薯圓、芋頭圓同地瓜圓,煙煙韌韌,芋圓入面仲真係有粒粒芋頭添,完全冇欺場。

第3位  Victorian Rose Tea Room(*新上榜)

 圖:hkfoodeliciouschowkayi

講到打卡聖地,呢間新開冇耐嘅茶室必然上榜。一入門口已經好似去咗個高貴華麗嘅英國宮廷咁,主打正宗英式下午茶,由裝修到食物,每個位都絕對係個打卡位嚟。女生們約去食tea嘅話記得要著靚啲。手工製嘅伯爵茶戚風蛋糕係呢度嘅招牌甜品,以澳洲乳酪製作,茶味濃香,口感輕盈軟熟。

第2位  ULURU(*新上榜)

 圖:Jennyivorybobochan111503

第2位嘅fusion菜餐廳,裝修黑白手繪畫為設計,食物色彩就非常豐富,形成強烈對比,又係一間打卡chill點。要特別介紹下佢哋嘅甜品,因為真係太靚仔!以食用花啫煙製作嘅花見,下層係檸檬芝士餅,連埋crumble同玫瑰醬一齊食,小清新~ 而粉色拉糖嘅粉蝶花之丘,冇想像中咁甜,但brownie朱古力味就好濃郁。

第1位  刕舙馫麵館

 圖:eateatcinl.tsui

上月第7位嘅紅磡小店,一躍成為榜首。呢間以刀削麵為招牌嘅麵館,刀削麵都係人手製作,有嚼勁又滑身,而且仲好有掛湯力,所以如果嗜辣嘅朋友,叫個麻辣湯底,就啖啖都會食到心心眼喇。麻辣牛筋腩、麻辣安格斯牛肋條等都係推介之選,肉味香,辣味夠。


文:Kar


關鍵字
十強
排行榜
旺角
紅磡
尖沙咀
打卡
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
1天前
4月份好評餐廳十強
2019-05-07
實現夢想 開一間聯繫社區嘅咖啡館 上水獨立Cafe粉嶺重開(有片)
2019-04-29
泰國手標奶茶登陸香港!銅鑼灣ChaTraMue旗艦店直擊(有片)
2019-04-25
銅鑼灣設全港首間日本酒放題 逾100酒款 最平$98可任飲
3天前