4月份好評餐廳十強
2018-05-14

4月份咁多假期,大家有冇留港消費周圍食吓好嘢先?今個月嘅排行榜都有唔少新面孔,包括主題餐廳、過江龍燒肉店以及人氣餐廳分店等,亦有首次或者重新上榜嘅舊餐廳。立即睇睇4月十強,有冇邊間未試就好快啲去喇!

 

第10位 古今Premium (*新上榜)

本身喺觀塘開店,主打創作特色卷物,好似有虎蝦、三文魚製成嘅極金龍卷、有齊海膽、吞拿魚、三文魚、牛油果同芝士嘅倫敦橋,選擇勁多而且餡料好豐富!其他菜式都有好多花臣,包括鰻魚pizza、 九州豚肉海鮮韭菜鍋等。

圖:djscommerce阿咩


第9位 茶聊 (*新上榜)

台式飲品店大熱,不過大多都係外賣店為主,呢間就有得坐有得食,食物就中西日式兼備,招牌菜包括有軟殼蟹牛油包、榴槤梳乎厘班戟、巴馬火腿黑松露意大利飯等,而且環境簡約亦好開揚,以旺角嚟講算係好坐。

圖:katherine.paris.73foodie_tasty


第8位 Odelice! (*新上榜)

呢間由法國人開設嘅法式crepe小店,喺灣仔一向都幾受歡迎,尖沙咀分店位於商場入,地方更大,菜式選擇更豐富。法式薄餅即叫即製,鹹嘅蕎麥薄餅有黑松露、煙三文魚等六款口味,甜嘅有成13 款,必吃海鹽焦糖鮮忌廉同芒果椰絲口味。

圖:hkfoodelicious小新888


第7位 Mr. Steak Buffet à la minute (*新上榜)

雖然係新上榜,不過呢間餐廳都唔係新架喇,鍾意食牛或者buffet嘅一定識!自助餐款式多而且一直keep到水準,仲有唔少回本嘅食物如佐賀和牛、生蠔、龍蝦、蟹腳等等,亦不時有折扣優惠。不過人多要排吓隊,有耐性先食到架。

圖:Toasty Viviansophiawong0127


第6位 極尚大喜屋日本料理

放題、自助餐果然係不死,新店或者新主題好多,但保持水準嘅老實講真係要揀過!呢間餐廳今次再度上榜,就知質素唔錯,款式如自助餐咁豐富,燉湯、海鮮、中西日東南亞菜都有齊晒,而且環境闊落,放題嚟講好少有。

圖:蓉蓉skyungkalai88888888


第5位 Beefar's 鹿兒島燒肉 (*新上榜)

呢間主打鹿兒島薩摩牛嘅燒肉店來自日本,4%奇跡之牛係A5級數而且霜降達BMS 12嘅部位,油花爆瀉,喺香港好少地方食到!盛合可以食到極上牛肩肉、上等牛腰肉、牛柳扒等唔同部位作比較,款式部位多到真係好似去咗日本食燒肉咁。

圖:glai5393Ego


第4位 橘焱胡同燒肉夜食

又係燒肉!不過呢間就來自台灣,仲連續兩月上榜添,今個月微跌兩級。牛肉以外仲有其他海鮮、豬五花等,亦有小鮮肉店員幫你燒。必吃前菜蟹膏生干貝、鹽葱牛舌、達拉斯等,所有配料即叫即調味,味道校得啱啱好。

圖:YungKwokfood.ooh.yeah


第3位 Grubers

來自摩納哥嘅漢堡店,上個月已打入十強,今個月更加升至三甲,走勢強勁!可由7款漢堡扒自選口味、配料等,雖然其貌不揚,但就好有內涵,肉夠juicy又厚切,而且餡料份量足,麵包又鬆軟,好有誠意,所以抵佢得到第三位嘅!

圖:Gigi PigSweetdiegrandpa


第2位 魔衣櫥咖啡廳 (*新上榜)

呢間新餐廳以魔幻電影為主題,開業冇耐已經登上排行榜第二位,唔係magic咁簡單!餐廳裝修落足本,先有神秘通道入內,更放滿有魔法袍、魔術棒等,環境充滿中世紀feel,食物就以歐陸菜為主,有三道及五道菜兩款套餐揀,菜式包括馬賽海鮮湯、慢煮野生灰鯛魚等。

圖:糖小妹Foodie_mCnNi


第1位 香港海賊王餐廳 (*新上榜)

雖然開業咗一段時間,但仍然有唔少海賊王粉絲去朝聖!場內有齊主角路飛、烈陽號同唔同角色嘅公仔,還原度超高,打卡位多到影唔晒!而且播住動畫同歌曲好有氣氛。連食物造型都好有心思,草帽咖哩飯、喬巴帽子蛋糕同三刀流串燒等,味道都唔錯。

圖:Skull_couplemj712


 

文:Perrins

關鍵字
十強
排行榜
卷物
日本菜
台式飲品
法國菜
自助餐
放題
buffet
燒肉
和牛
漢堡
cafe
西菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
8月份好評餐廳十強
2018-09-06
4cm厚班戟+招牌刨冰抵港!京都人氣甜品銅鑼灣店直擊(有片)
2018-09-12
日本人氣大阪燒登陸旺角!席前炮製足料大阪燒+廣島燒(有片)
2018-08-30
一年容易又中秋 流心、特色新款月餅巡禮(有片)
2018-09-11
鼎爺中環再開店! 設散叫手工懷舊家常菜
2018-09-03