海鮮控留意啦~有咩開心過成餐係咁食龍蝦?今期搜羅咗4間以龍蝦為主題嘅餐廳畀大家,有小店同埋酒吧餐廳,每一間都好有水準,快啲bookmark定!
目錄
► 龍蝦海鮮塔三層架:Lobster Shack |
龍蝦海鮮塔三層架 Lobster Shack ![](https://static5.orstatic.com/userphoto/Article/0/88/001MI89DBCF5A1CC88C8A6j.jpg)
以龍蝦作主打嘅海鮮專門店,用新鮮龍蝦烹調出唔同嘅菜式。所有菜式都選用加拿大波士頓龍蝦,彈牙鮮甜,負責人話希望客人可以喺輕鬆嘅環境下享用到價錢合理又高水準嘅海鮮。必試超邪惡龍蝦Mac & Cheese,將意大利通心粉連同大量車打芝士一齊煮,然後面層再加上大量芝士拎去焗,每一啖都有芝士香濃同龍蝦鹹鮮,同朋友share食會冇咁heavy!另外仲有新出嘅龍蝦海鮮塔三層架,包括頂層嘅生蠔、中層嘅蟹餅、魷魚圈同辣椒仔同埋底層嘅爆膏龍蝦、薯條及沙律,每一款都好鮮甜呀~溫提想食要早一日訂。另外仲有Lobster Roll同龍蝦奶油扁意粉都值得一試。
龍蝦吧扒房 龍蝦吧餐廳
金鐘一間龍蝦吧+扒房餐廳,主要供應傳統西式龍蝦餐點。好似法式龍蝦濃湯,味道濃郁creamy又鮮甜,店員會即席倒湯保證熱辣辣,龍蝦肉份量都好多。傳統法式芝士焗龍蝦都好出色,成份都係芝士同cream sauce,芝士醬帶微酸,唔會蓋過龍蝦鮮味,配料有菠菜蘑菇,配麵包食好夾呀。
圖:joyceclt
西貢龍蝦小店 Lobster Une ![](https://static5.orstatic.com/userphoto/Article/0/88/001MI89DBCF5A1CC88C8A6j.jpg)
放假想去chill下,呢間餐廳就啱你啦,餐廳位於西貢市場街,鄰近海邊,吹住海風食飯真係好舒服。食物方面以龍蝦海鮮為主題,選取優質澳洲龍蝦,推介龍蝦燴西班牙飯,龍蝦肉爽口彈牙,選用西班牙米,吸汁能力比意大利米強同埋口感較有嚼勁,芝士用Parmesan及Macarena西班牙芝士等製成芝士汁,醬汁非常濃郁。另外仲有龍蝦炸春卷、西式香草蒜香龍蝦及火焰雙重芝士龍蝦薄餅都好吸引㗎。
新鮮龍蝦本地小店 Lobster & Mussels by Paul's Kitchen
中環歌賦街一間西餐小店,店舖細細但食物幾有驚喜。招牌Lobster Bisque,口感稠密,一入口就食到好濃嘅龍蝦味,仲有粒粒龍蝦肉添~Grilled Half Boston Lobster Linguine都唔錯,龍蝦肉爽口鮮甜,加埋微酸嘅番茄意粉,食落更開胃。lobster roll都好好食,佢哋嘅麵包用咗丹麥麵包,牛油味好香又鬆軟,配埋鮮甜嘅龍蝦同醬汁冇得輸!
文: Yanica